Kudingeka izingxoxo ezinzulu ngobudlelwano ne-Israel eSudan
UNdunankulu waleli lizwe uMnu u-Abdalla Hamdok uthi izwe lakhe alizimisele ukuxhumanisa ukususwa kwalo ohlwini lwabaxhasi bezokushokobezi lwe-United States of America (USA) nolugcine seluphazamisa ukufinyelela kwemali yoxhaso evela kwamanye amazwe emizamweni yokulekelela umnotho walo kanye nobudlelwano baleli lizwe nelakwa-Israel. Imithombo engadaluliwe kuleli sonto ibike ukuthi iziphathimandla zase-USA ziveze ukuthi zifuna iSudan ilandele i-United Arab Emirates ixhumane futhi lilungise ubudlelwano ne-Israel. Ukufakwa kweSudan ohlwini lwabaxhasi bezobushokobezi kwaqala ngesikhathi leli lizwe lisaholwa yiloyo owasuswa esikhundleni uMnu u-Omar al-Bashir okwenza kube nzima ukuthi uHulumeni omusha wesikhashana ufinyelele ngokukhululeka emalini yezikweletu edingeka ngokushesha kanye neyoxhaso oluqhamuka emazweni angaphandle.
UHamdok ubike ukuthi ngesikhathi uNobhala wase-USA, uMnu uMike Pompeo, evakashele eSudan wakubeka kwacaca ukuthi kwakubalulekile ukuhlukaniswa kokususwa kwaleli lizwe ohlwini lwe-USA kanye nemizamo yokwakha ubudlelwano phakathi kwaleli lizwe ne-Israel.
“Lolu daba (izibopho ne-Israel) ludinga ingxoxo ejulile yomphakathi,” usho kanje etshela abezindaba lapho ebexoxa ngezinguquko kwezomnotho. Ukuncipha kwamandla emali kube yinselelo enkulu ekuphatheni isikhashana kukaHamdok kanye noHulumeni wakhe obusa ngokubambisana namasosha kusukela kwasuswa esikhundleni uBashir.
Leli lizwe lafakwa kulolu luhlu ngowe-1993 ngenxa yokuthi i-USA yayikholwa kuthi umbuso kaBashir wawusekela amaqembu alwayo. Kepha abaningi eSudan babona ukuqhubeka kokubekwa kwaleli lizwe kulolu luhlu njengokungafanele ngenxa yokuthi uBashir wasuswa esikhundleni ngonyaka odlule futhi leli lizwe lalibambisene neUSA ekulweni nobushokobezi.
Ubuholi base-USA bona bunqabile ukuphawula uma bubuzwa ngesimo sezingxoxo neSudan. Ukulunga kwezingxoxo phakathi kwe-Israel neSudan kuwudaba olujule kakhulu ngenxa yokuthi ngesikhathi uMnu uBashir esahola, leli lizwe laliyisitha esikhulu se-Israel.