Ugagasa ukungenela okwesibili owaseCentral African Republic
UMengameli wakuleli lizwe uMnu uFaustin-Archange Touadera ngesonto eledlule ubike ukuthi uzongenela ukhetho lobumengameli lwangoZibandlela okuzobe sekuchaza ukuthi ufuna ihlandla lesibili kulesi sikhundla.
Kodwa emasontweni edlule kube nemibiko yokuthi amaqembu aphikisayo aphakamise ukuthi lolu khetho luhlehliswe ngenxa yokukhathazeka ngokubhaliswa kwabavoti.
Umfelandawonye omkhulu wamaqembu aphikisayo ungabaza ukwethembeka kokhetho ngemuva kokungazinzi esifundeni kanye nokuhlasela kokhuvethe oluphazamise uhlelo lwabavoti futhi lwagcina luphoqa ukuthi iPhalamende lishintshe ikhalenda lokhetho lwaleli zwe.
UTouadera wenze isimemezelo sakhe sokungenela lolu khetho esixukwini sabaseki bakhe abayizinkulungwane eziyisithupha ehholo lezemidlalo enhlokodolobha iBangui, ebelipendwe kabusha kwenzelwa lo mcimbi ngemibala eluhlaza okwesibhakabhaka nokumhlophe okuyimibala yeqembu lakhe.
“Izakhamuzi zaleli lizwe ngeke zisaya emuva. Izindlela zokuphila ezindala zepolitiki eseziholele leli lizwe ezinhlekeleleni azisamukelwa,” kusho uTouadera
Oyedwa kulabo abazobe bephonsela inselelo uTouadera ilowo owayenguMengameli waleli lizwe uMnu uFrancois Bozize owaketulwa esikhundleni ngonyaka wezi-2013 yinhlangano yedlanzana labenkolo yamaSulumane asenyakatho yaleli lizwe okwagcina kufake leli lizwe iningi lawo elingabenkolo bobuKhrestu empini yezakhamuzi eyayinobudlova obukhulu.
UTouadera, owayenguNdunankulu waleli lizwe ngaphansi kukaBozize, usebe sesihlalweni sobumengameli kusukela ngonyaka wezi-2016. Ihlandla lakhe lokuqala kulesi sikhundla libe nokubuyiswa kwezikhungo zombuso kanye nokusayinwa kwesivumelwano esiphikisana namaqembu ahlomile ngowezi-2019 esesihlulekile ukulethela leli lizwe ukuthula okuzinzile.
Ngokusho kwezibalo zenhlangano i-United Nations, udlame kuleli lizwe seludale isimo senhlekelele esikhulu emhlabeni jikelele kuleli zwe lapho abantu abangaphezu kwamakhulu ayizinkulungwane eziyisithupha bedukile, kwathi abanye abayizinkulungwane eziyisithupha bayobhaca emazweni angomakhelwano eCameroon, eChad nakwezinye izindawo.