Lesi yisikhathi sezakhamuzi
Ukubhixana kukaZuma noZondo kuzosithinta sonke kanjalo nezinhlaka zezwe
Izwe liyazamazama. Akukhona ngoba kunezifo noma okucishe kufane nalokho. Lizanyazanyiswa wukududulana kwezinqanawe ezimbili. Ukungaboni ngaso linye phakathi kowayenguMengameli kaKhongolose nezwe, uMnu uZuma kanye naloyo onguSihlalo wekhomishini ephenya izinsolo zokugwamandwa kwamandla ombuso kuthuse abaniningi kuleli sonto.
Okuthuse kakhulu yisithombe sokungqubuzana kwepolitiki kanye nomthetho okuyinto engaba yingozi esimisweni sezwe kanye nesoMthethosisekelo. Lolu daba luhlukanise abantu kusuka kongoti kuya kubantu emphakahini. Babodwa abeseka uSihlalo weKhomishini nabathi wenza umsebenzi wakhe. Kanti abanye bayavumelana nencwadi yabameli bakaZuma lapho bethi uMehluleli uZondo usengene iqulu lalabo abangamuzwa kahle uZuma.
Khona lapho kukhona abathi uZuma yiqili elisebenzisa zonke izindlela ezikhona ukugwema ukuyophendula “ngamacala akhe”. Laba bathi lokhu okwenzeka manje yiqhingasu nje uZuma agabe ngalo.
Kungumbono wethu ukuthi njengezakhamuzi zezwe kumele singahlali nje phansi sibukele lokhu ngoba yinkulu ingozi engahle yenzeke uma lolu daba luphatheke ngesinxele. Zonke izinhlangothi, lezi ezeseka ukusebenza kweKhomishini kanye nalabo abaseka uZuma bazobe beshela umuntu oyedwa, okuyisakhamuzi saseNingizimu Afrika. Sishelwa nje isakhamuzi inhloso wukuba sikhethe uhlangothi okuyinto eyingozi.
Njengephephandaba sinxusa ukuba aboHlanga bangangeni kulolo bishi loku khetha uhlangothi. Kunalokho asikhethe izwe lethu, asikhethe ukubuyisela ukuhlonishwa nokuqhelelana kwezinhlaka zepolitiki kanye nezomthetho.
Ngokwenza njalo siyoqinisekisa ukuthi izwe kalibi ngumlotha. Yebo, uZondo noZuma cishe banawo amalungelo okungcweka kepha abangenalo ngelokusifaka obishini okuyoba lukhuni ukuphuma kulo. Ngakho sithi lesi yisikhathi sokuba kube yizakhamuzi eziphakamayo zilwele ukuba izwe leli liqhubeke nokuhlonipheka kwezinhkaka zepolitiki nomthetho.