Bazothi ukuphefumula abezimoto kule nyanga ephezulu
Angazi ukuthi abakhuluma isilungu bakususela kuphi ukuthi uma bebona izinto zingahambi, kube kuwusuku lwangoMsombuluko bathi uMsombuluko oluhlaza.
Thina boHlanga asiluchazi ngombala lolu suku, kodwa sibheka izinto ezenzekayo. Akubanga kuhle ezimakethe zemali kuqala ilanga langoMsombuluko. Zozintathu izimali esijwayele ukuqhathanisa nazo irandi lethu liqale isonto zilimise kabi. Nokho intengo kawoyela ithande ukwehla yasibeka ethembeni.
Kuyethusa ukuthi iMoody’s isalokhu igida eduze kweNingizimu Afrika. Kunemikhonzo engemihle ethunyelwa yiNhlangano iMoody’s exwayisa ngokwehlisela iNingizimu Afrika ezingeni likavobo elingaphansi kwaleli ebekwe kulo manje, ngenxa yezikweletu elikuzo nokuthi umthamo wemikhiqizo awukhombisi ukuthi uzoligcina leli zwe likwazi ukuphefumula.
NgoMsombuluko zingama-28 kuMandulo 2020
Kuvule izimakethe ngoMsombuluko irandi lingaphansi kwengcindezi, idola lase-USA lithole amandla lagcina lilingana namarandi ali-17,07. Lokhu kusho ukuthi irandi lilahlekelwe ngamasenti angama-27 ngempelasonto, kwathanda ukuzwela kulo irandi.
Uphinde wagadla uPondo waseBritain erandini ngempelasonto laze laphunyukwa ngamasenti angama 24 ngoba kuvukwe ngoMsombuluko kudingeka amarandi ahlangane abe ngama-21,80 ukuze alingane noPondo owodwa waseBritain.
Belidudula iYuro ngempelasonto laze lehlisa umdlandla erandini, lephuca irandi amasenti ayisi-9. Kuvule izimakethe iYuro lilingana namarandi ali-19,85.
Izimakethe zomhlaba ziyenqaba ukuba igolide libe nesikhundla lizinze ezindaweni eziphezulu. Iqhubeke nokwehla intengo yegolide ngoba kuvule izimakethe i-awunsi legolide libiza amadola ase-USA ayi-1 859, kanti ngoLwesihlanu olwedlule yayimi kumadola ase-USA ayi-1 867.
Kwenza ubuso babanikazi bezimoto bumoyizele ukuqala isonto intengo kawoyela ikhombisa ukuthoba. Kuvule izimakethe zomhlaba ngoMsombuluko intengo kawoyela ongahluziwe ingamadola aangama-41,50, wehlile kulokho owawuyikho ngoLwesihlanu.
NgoLwesibili zingama-29 kuMandulo 2020
Kuvukwe ngoLwesibili lisimeme irandi likwazile ukubuyisa amasenti amane ebeliwaphucwe yidola lase-USA, kwavula izimakethe idola lase-USA lilingana namarandi ali-17,03.
Lizabalaze lehluleka irandi uPondo unqathuza ungafuni lutho, kwavula izimakethe uPondo ulingana namarandi angama-21,90 ngoLwesibili.
IYuro lilidonsela phansi irandi kodwa ziyabonakala izimpawu zokuzabalaza kwerandi ngoba kuphunyuke amasenti amathathu kuphela labambelela, kwavula izimakethe iYuro lilinye lilingana namarandi ali-19,88.
NgoLwesithathu zingama-30 kuMandulo 2020
Aliphumelelanga ukugoloza idola lase-USA ngenkathi lilungisa isimo salo, idola lagcina liphunyukwe ngamasenti ayisithupha, lathola ukuzinza kancane irandi. Kuvukwe ngoLwesithathu idola lase-USA lilingana namarandi ali-16,97.
UPondo waseBritain awuzibekile phansi ugadla uphindelela erandini, laze laphinda irandi laphunyukwa ngamasenti ayisikhombisa ekuseni ngoLwesithathu. Amarandi bese kudingeka aqoqane abe ngama-21,97 ukuze abe namandla alingana noPondo waseBritain owodwa.
Uma sivuka ekuseni ngoLwesithathu kubonakele ukuthi impi phakathi kweYuro nerandi ayivumi ukuphela. Kunalokho irandi libonakala licindezeleka okwamanje. Kuvule izimakethe iYuro lilingana namarandi ali-19,91, okukhomba ukuthi irandi liphunyukwe ngamasenti amane kulo mzabalazo wasemakethe.
NgoLwesine lulunye kuMfumfu 2020
NgoLwesine liqhubeke lapho ligcine khona irandi emfuthweni walo kwavula izimakethe idola lase-USA lilingana namarandi ali-16,60.
Umzuliswano wangoLwesine ekuseni ophakathi kukaPondo waseBritain nerandi uthathwe yirandi lathi ukuncipha igebe phakathi kwalezi zimali emakethe. Kuvukwe uPondo ulingana namarandi angama-21,30 ngoLwesine.
Ligcine liphumelele irandi ukuguqisa iYuro kulo mzuliswano, kwavula izimakethe iYuro lilingana namarandi ali19,49 ekuseni ngoLwesine.
Intengo kawoyela ongahluziwe ngoLwesine beyimi kumadola ase-USA angama-41,98.
Intengo yegolide ithe ukwenyuka yafinyelela e-1 896 wamadola ase-USA.
Ziletha ukumoyizela kwabezimoto izinkulumo zokwehliswa kwentengo kaphethroli nodizili osekuqinisekisiwe manje. Lokhu kuqinisekiswa wuzinzo olubonakala luqhubeka phakathi kwedola lase-USA nerandi laseNingizimu Afrika, okuyisimo ebesingekho enyangeni uNcwaba. Ngokunjalo intengo kawoyela ongahluziwe ayiqhubekanga nokwenyuka enyangeni kaMandulo.