IZindlovukazi sezikuTelkom Netball League
UMengameli weKwaZulu-Natal Netball (KZNN), uGugu Ngema, uthi bengabaphathi balo mdlalo babona iphupho labo lifezeka okuwukuwuthuthukisa lo mdlalo.
Usho lokho emveni kokuthi ngesonto eledlule kade kwethulwa ngokusemthethweni iligi yakulo nyaka yeTelkom Netball League (TNL), kwamenyezelwa nokuthi asezoba mabili amaqembu aqhamuka KwaZulu-Natal azoyibamba kuyo le ligi.
Amaqembu azomela isifundazwe iKwaZulu-Natal kuzoba iKingdom Stars ekade yaba khona neKingdom Queens okuyiqembu elisha.
“Ukuba khona kwamaqembu amabili aqhamuka kulesi sifundazwe kusho lukhulu. Kuzokwenza lo mdlalo uthuthuke, bese uvulela nabadlali abaningi amathuba. Engibona kuyikho okuklame indima enkulu kwaze kwenzeka lokhu ukuthi lapha KwaZulu-Natal yithina kuphela esineligi esiyibiza ngeSuper League okuyiyona esikhiqizela abadlali abanethalente eliyisimanga,” kusho uMaNgema.
Amanye amaqembu akhona kuKZN Netball Super League yiGilbert Stars, iHammarsdale Sunbeams, iMaritzburg Sprinters, iRebels, i-Ocean Dolphins, iSheppy Central, iThunderbirds noUlundi Central Movers.
IBAYEDE imbuza ukuthi yini abazoyenza ukwelekelela la maqembu ekutheni enze kahle, uthe kukhona kuningi abakuhlelayo.
“Sizimisele ukusiza la maqembu womabili, uMnyango Wezemidlalo kulesi sifundazwe kukhona ozosilekelela ngakho. IPrime-High Perfomance Institute lapho kuzilolonga khona abadlali abaseqophelweni eliphezulu iyalekelela ekutheni kuthi kuqala imidlalo abadlali babe sebekulungele ukudlala. Abanye abazolekelela abakwaKZN Sport Confederation neKZN District. Asifuni amaqembu kube khona akhala ngakho,” kusho uMaNgema.
Ngesikhathi inhlangano ephethe lo mdlalo iNetball South Africa (NSA) yethula ngokusemthethweni owakule sizini, okwagqama kakhulu ukuthi abakwaTelkom bazoqhubeka babe ngabaxhasi eminyakeni emithathu ezayo.
UMaNgema ephawula ngalokho uthe: “Kwangithokozisa kakhulu. Lokho kunginika ithemba lokuthi nabanye abaxhasi bazosondela baphonse esivivaneni, ikakhulukazi emazingeni aphansi okuthule kakhulu khona nokuyinto ebuhlungu.”
IKwaZulu-Natal kubadlali ebakhiqizile kubalwa uTarle Mathe noXolile Shange abadlalele iqembu lesizwe labaneminyaka yobudala engama-21, uPrecious Mthembu ongumdlali weqembu elikhulu lesizwe amaProteas, aphinde abe yiphini lomqeqeshi khona eqenjini lesizwe labaneminyaka engaphansi kwengama-21 kube uBongiwe Msomi ongukaputeni wamaProteas. Abanye uNokubonga Sibiya no-Elsunet du Plessis abadlalela iqembu lesizwe elikhulu, uJessica Khomo, uNontuthuko Khomo noSinethemba Mkhize abadlalela abaneminyaka engaphansi kwengama-21.
Imidlalo yeTNL izobanjelwa eMangaung Sports Complex, eBloemfontein, izoqala mhla zili-14 kuya mhla zingama-24 kuMfumfu. Kanti esinye isifundazwe esibe nenhlanhla ekutheni sigadle ngamaqembu amabili yiWestern Cape ezoba neTornadoes neSouthern Stings.
Umyalezo awudlulisele kula maqembu womabili uMaNgema uthi: “Isikhathi sokuzilolonga endawonye esanele awasitholanga kodwa engingakusho ukuthi ngiyafisa benze kahle bonke. Ngifisa umdlali ngamunye alwele ukuphakamisa ifulegi lakulesi sifundazwe, kuqhubeke kube nabadlali abaqokwayo ukuba bamele iqembu lesizwe. Kulaba abazobe beqala ukudlala kule ligi abazobe bedlalela iKingdom Queens, ngifisa leli thuba balibambe ngezandla zombili ngoba baningi abalidingayo.”