KWEZINYE IZINGXENYE
E-England: Uphenyo luveze ukuthi iSonto laseSheshi (The Church of England) lehlulekile ukuvikela izingane kubanukubezi ngokocansi ezinhlakeni zalo iminyaka eminingi, livumela ukuthi abahlukumezi bacashe ngomzamo wokuvikela isithunzi salo kunokulandela umsebenzi walo wokuvikela izingane. Uphenyo oluzimele mayelana nokuhlukunyezwa ngokocansi kwezingane luveze ukuthi kusukela ngeminyaka yowe1940 kuya kowezi-2018 cishe abantu abangamakhulu amathathu namashumi ayisishiyagalolunye ababengabafundisi noma ababesezikhundleni zokwethenjwa ezihlobene naleli bandla batholwa benecala lokuhlukumeza izingane ngokocansi.
E-Ireland: UNdunankulu wakuleli lizwe, uMnu uMicheal Martin, ngesonto eledlule uthe leli lizwe kumele lisebenze kakhulu manje ukuvimbela ukubuyiswa kwemvalelwakhaya. Ngemuva kokungasivumi isincomo sabezempilo ukuthi kuvalwe umnotho wezwe ngokushesha kodwa esikhundleni salokho uhlele ukuba kuqiniswe imikhawulo ebekelwe ukudambisa izibalo zabantu abanokhuvethe. Ithimba leNational Public Health Emergency ngoMgqibelo odlule liphakamise ukuthi leli lizwe libuyiselwe esigabeni sesihlanu semvalelwakhaya ngemuva kokuthi ngoLwesine olwedlule libikele uHulumeni ukuthi isimo samanje sesigaba sesibili semvalelwakhaya ezweni lonke sasifanele.
E-Europe: Izidumbu eziyisikhombisa zitholakale esifundeni esinqamula umngcele weFrance ne-Italy ngasedolobheni iNice ngesonto eledlule ngemuva kokuba izimvula ezinamandla zikhukhule izindlu nemigwaqo, ngokusho kwezikhulu zalawa mazwe womabili. Izidumbu ezinhlanu zitholwe enyakatho-ntshonalanga ye-Italy, okufaka phakathi ezine ezitholwe ogwini phakathi kwamadolobha amabili iVentimiglia kanye neSanto Stefano al Mare, eduze nomngcele waseFrance. Kuphinde kwatholwa nezinye ezimbili eFrance, okubalwa kuzo esikamelusi otholwe yithimba labasizi nabatakuli base-Italy. Esinye isidumbu sitholwe emotweni ebikhukhulwe yizikhukhula ezinkulu esigodini saseSaint-MartinVésubie. Lokhu kubeka isibalo sabashonile kwabayisi-9 ngenxa yezikhukhula. Izicishamlilo zaseFrance zithe abantu abadukile bangatholwa babalelwa emashumini amabili nanye.
E-USA: Lowo ongumholi weqembu lamaDemocrats nogaqele isikhundla sobuMengameli kuleli zwe, uMnu uJoe Biden, kuleli sonto uthe inkulumompikiswano ehlelelwe isonto elizayo noMengameli wamaRepublicans kanye nowezwe uDonald Trump, akufanele iqhubeke uma uTrump esanokhuvethe. UBiden uthe le nkulumompikiswano ebihlelelwe umhla zili-15 kuMfumfu edolobheni iMiami kufanele ihlelwe kuphela ngaphansi kwemibandela eqinile yezempilo waphinda wabiza ukuqubuka kokhuvethe oseluhlasele uTrump kanye nezinye izikhulu eWhite House “njengenkinga enkulu”.