Ukuxhuga kukaVukayibambe kumosha umgudu
Sekwethenjwe ukuthi ukungenelela kwezingwevu kuzobuyisa inqola esipolweni
“Ukufa” kwe-ANCYL kudale inkinga ngabaholi asebegcina behola uKhongolose bengamaklume futhi bengayiqondi inqubomgomo nefagugu kwale nhlangano endala kunazo zonke e-Afrika kwezazilwela inkululeko. Lokhu kubonwa njengenkinga esiqede umlando omuhle we-ANCYL wokuba yinkundla lapho kuphekwa khona isizukulwane esilandelayo sabaholi beqembu.
Lo mbono uvezwe nguNobhala weANC esifundazweni iKwaZulu Natal, uMnu uMdumiseni Ntuli, engxoxweni ekhethekile abenayo nelaboHlanga emahhovisi eqembu iDr Pixley kaSeme House, eThekwini.
UNtuli naye ongamdala ukuyaphi nohlonishwa kakhulu ngokuba nesineke ekuchazeni izindaba nezinqumo zeqembu uthe ukwanda kwabaholi abangaqeqeshekile kahle kudalwa ukubhidlika kukaVukayibambe obuwaziwa ngokupheka uphinde ukhiqize amalungu avuthiwe ngokusezingeni nobekwenza kube lula ukuthi angene eqenjini elibusayo enesipiliyoni esidingekayo.
UNtuli uthi yilokhu kanye okwenze baqhamuka nezinhlelo zokuhabulisa amalungu. Kulezi zinhlelo uthe bamema izingwevu zeqembu nobe eseveza ukuthi sekwale lona ukhuvethe ngoba njengoba babeqale ngoMzizi nje bebeza nabanye.
“Akugcini lapho kodwa baningi abaholi esisazobamema KwaZulu-Natal okungoMnu uKgalema Motlanthe noMnu uJacob Zuma. UMotlanthe sasihlele ukuba afike ngoNhlaba kodwa kuphazamise ukhuvethe kwama zonke izinhlelo zethu. Inhloso enkulu ngalokhu ukubuyisa isithunzi sombutho nokwakha amaqabane anamakhono adingekayo nahlakaniphile futhi awuqondayo uKhongolose,” esho.
Udalule izinhlelo zeqembu i-ANC zokubuyisa isithunzi salo nokuthi liphinde libe inhlangano abantu abayethembayo njengoba ezivumele ukuthi kuningi okungekuhle ngobuholi benhlangano okudalwa amahlazo nokungaziphathi kahle kwabanye babo okulimaza kakhulu isithunzi sombutho.
“Kodwa singubuholi sihlale phansi sazibuka sabheka amaphutha ethu lapho sivumelene ngokuthi ukuze sikwazi ukuqhubeka nokuphatha kumbe sihole abantu kufanele thina sibumbane kuqala ngenhloso yokuthi nezizwe zakuleli zihlangane ngale kokuhlukana ngokobuhlanga. Yingakho nje kumanje uzwa sekukhulunywa ngezinhlelo zokuqondiswa kobugwegwe kwalabo abanamabatha,” kusho yena.
Ebuyela odabeni lwentsha, ukugcizelele ukuthi yize uphiko lwentsha lukhona futhi lusaphila kodwa kalusafani ngoba iningi labaholi baphuma kuyona ngenxa yeminyaka yabo, bengaphekekanga kahle.
“Okuyiphutha elikhulu elidale sabhekana nalezi zinkinga esinazo yingoba abaholi abasaqeqeshekile ngokufanele kepha sekuya ngokuthi lelo gama eliphakanyiswayo lisekwa abangakhi kube sekuyathukwana, ” usho kanje.
Uthe lolu hlelo lokuthatha ubulungu be-African National Congress lwenziwa lwabalula ukuze noma ubani ofisa ukuyijoyina angazitholi esevinjwa ngoba nakhu exabene nomholi wegatsha.
“Kwezinye izinselelo ebesibanazo yilezo zokuthatha ubulungu lapho abantu bekhala ngokuthi abasawatholi amakhadi ngoba bavinjwe abathile. Lokhu kwenze kwabanzima kwabaningi ukuba bakwazi ukujoyina inhlangano ngokukhululeka. Njengamanje sinohlelo olwenziwa nge-online lapho umuntu efaka yonke imininingwane yakhe bese ebuthola ubulungu ngaphadle kokuthi aye kuNobhala noma kuSihlalo wegatsha,” kuchaza uNtuli. Ubuye wachaza ngezinye izingqinamba abafisa ukubhekana nazo wathi phakathi kwazo yilokhu kokuthi amalungu e-ANC asegcina engabonakali ezinhlelweni zomphakathi okungaba imibhikisho yokulwa nezinkinga ezikhungethe izakhamuzi nokunye.
UNtuli uthi i-ANC selokhu yaqala yaziwa njengombutho ongumholi womphakathi ngakho kubalulekile ukuthi uma kunabantu abanezikhalo amalungu abe khona azokhalisana nabo.
Ubebala nezinhlelo ezisuke zifana nemikhankaso yokulwa nobugebengu obehlukene nokuhlukunyezwa kwabesifazane nezingane okufanele izinhlaka zabo njenge-ANCWL ne-ANCYL zibe khona.