Igobe uphondo iFacebook kwelifakwe abakwaCawood
Kuqopheke umlando ifemu yabameli baseNingizimu Afrika icoboshisa enkantolo inkampani enkulu ezinkundleni zokuxhumana iFacebook okuyinto ethathwa njengezokhomba indlela kuleli nasemhlabeni jikelele.
Kuleli sonto iNkantolo Enkulu eMiddelburg ivune ifemu yabameli yasePretoria iCawood Attorneys ebimangalele iFacebook Incorporated neFacebook South Africa ngokuphawula okwehlisa isithunzi nokunokucwasa ngokobuhlanga okwafakwa ngowesifazane wakuleli ongusomabhizinisi kuFacebook.
Leli icala lokuqala elibe yimpumelelo ebelibhekiswe kule nkampani ehlonishwa umhlaba wonke.
Nakuba bekunobungozi bokuthi uMnu uWerner Cawood onguphathina omkhulu kwaCawood Attorneys nefemu yakhe bakhale ngaphansi kepha baphikelelile baze banqoba ukuphoqa iFacebook ukuba ithathe indawo yayo enkantolo ecaleni lokunyundela le femu nomunye wabaqondisi bayo.
Ummangalelwa wokuqala kuleli cala bekunguNks uNS Mthimunye okunguye owafaka ukuphawula kuFacebook kokuthi inkampani yakhe ebidonsa kanzima ngaphambi kokhuvethe, ibifake isicelo sokuthi itakulwe ngeThe Rescue Company.
IThe Rescue Company iyibhizinisi elizimele elingahlangene neCawood Attorneys ngaphandle komqondisi oyedwa walena yabameli onobuhlobo nayo.
UNks uMthimunye wafaka umbhalo kuFacebook onezinsolo ezishiya imibuzo ngokwethembeka nobuqotho beCawood Attorneys okuhlanganisa nezinsolo ezingelona iqiniso zokuthi yebe imali yesikhwama sokhuvethe.
Le femu yabameli yaphendula kulo mbhalo khona ku-inthanethi inxusa uNks uMthimunye ukuba akususe ukuphawula kwakhe okwehlisa isithunzi.
UNks uMthimunye waphendula ngokuthi abalule ngegama umqondisi weThe Business Rescue wenza izinsolo phakathi kwezinye zokuthi iCawood Attorneys yabe “iyifemu ecwasa ngokobuhlanga edlala ngabesifazane boHlanga abaxakekile”.
Inkampani yabameli yabe isinxusa iFacebook ukuba ikususe lokhu kuphawula kodwa yaphendula ngokuthi ayiphikisani nokuziphatha komphakathi ngakhoke okubhaliwe ngeke kususwe. Lokhu kwaholela ekutheni abakwaCawood Attorneys udaba balufake eNkantolo Enkulu ebe isiyalela uNks uMthimunye ukuba “asuse ngokushesha konke akubhalile okungamanga, okwehlisa isithunzi, okuyinhlamba nokunokucwasa okubhekiswe kummangali wokuqala nowesibili nokuyeka ukufaka eminye imibhalo kunoma iyiphi enye inkundla”.
INkantolo imyalele ukuba akhokhe zonke izindleko.
Le Nkantolo iphinde yagcizelela ukuthi ungafunwa umyalelo wokuthi ummangalelwa wesibili iFacebook Incorporated akhokhe izindleko zecala uma kuba khona ukuphikisa. Lokhu kungenzeka nakuFacebook South Africa.
Akekho phakathi kweCawood Attorneys nommangali wesibili abacele ukunxeshezelwa abamangalelwa.
Emuva kwesinqumo seNkantolo Enkulu uWerner uthe ubehlale enalo ithemba lokuthi bazolinqoba leli cala wathi omunye umphumela ubuzobe ungenabo ubulungiswa hhayi kuphela kubona kepha kunoma ubani osebenzisa uFacebook emhlabeni. “Leli cala belibaluleke kakhulu kuthina njengoba izinsolo ezinzima bezenziwe ngefemu yethu ebezikhomba ukuthi singene ezenzweni zobugebengu, asithembekile, sicwasa ngokobuhlanga futhi sibandlulula izinkampani ezincane,” kusho uWerner.
Uthe kubuhlungu ukuthi baze bafinyelela esinqumweni sokuya enkantolo ngaphambi kokuthi iFacebook ilandele isicelo sabo esenza umqondo sokuthi umbhalo ususwe.
UWerner osebenza ngomthetho wabezindaba, uthe kubaluleke kakhulu ukuthi abasebenzisa izinkundla zokuxhumana baqikelele ngabakufaka kuzo.
Uthe lesi sikhathi sezinkundla zokuxhumana ngesoguquko emhlabeni ngokuthi okubhalwa kuzo kunamandla okushintsha indlela abantu abacabanga ngayo, abaziveza ngayo nokuthi bafuna ukuba ngobani.
“Ngakho-ke kubalulekile ukuqaphela noma yini umuntu ayifaka ezinkundleni zokuxhumana, abheke amalungelo abanye noma amaqembu angalinyazwa yimibhalo efakiwe,” usho kanje.
Ezinye izinkampani zabameli ziphawula ngalokhu zithe, iCawood Attorneys ibinalo lonke ilungelo lokuyisa iFacebook enkantolo ngalo mbhalo ngenxa yokuthi ulimaza ngqo isithunzi ngokomsebenzi sayo okungaholela ekuphazamisekeni kwebhizinisi layo.
Zithi ukwenqaba kweFacebook ukususa umbhalo kaNksz uMthimunye enkundleni yayo kuyenze le nkampani yaba ingxenye yokwehlisa isithunzi futhi ikuvumele ukushicilelwa kombhalo owulolu hlobo.
Kukhona abaveze ukuthi lesi sinqumo seNkantolo Enkulu sizoba ngesikhulu eNingizimu Afrika futhi sizoba umkhombandlela ekuphoqeni izinkampani ezinkulu zobuchwepheshe ukuba zithobele umthetho.
Enye inkampani yabameli ithe ikholelwa ukuthi lesi sinqumo sizoqinisekisa ukuthi abasebenzisa izinkundla zokuxhumana sebezowuthobela umthetho futhi akukho ukungabaza ukuthi sizokwehlisa izinga eliphezulu lokuhlukumeza, ukucwasa ngokobuhlanga nokwehliswa kwesithunzi okubonakala ezinkundleni zokuxhumana.
Ukufaka imibhalo engemihle nenokucwasa ngokobuhlanga ezinkundleni zokuxhumana kungaholela ecaleni lokulimaza isithunzi somuntu.
ENingizimu Afrika bakhona abanye asebeke babekwa amacala ngemibhalo yabo abayifaka ezinkundleni zokuxhumana okubalwa kubo uPenny Sparrow no-Adam Catzavelos.
- nguSabelo Mbatha