UMasiphula wethembeka kuZulu wabamba nezimpi
NgoMasingana 1906, abaseNdlunkulu babesondelene kakhulu nabakwaNtshangase ngalobo buhlobo. Ngisho uDinuzulu esefuna amabutho ayezomsiza ekwaCeza eHlathini ebhekene nabahlaseli bamaNgisi namambuka, waya khona eMgazini nasebaQulusini mhla zingama-26 Mbasa 1887 eyofuna amabutho wabuya nezinsizwa ezingaphezulu kwama-500.
Noma esebalekile kwaCeza eHlathini wahlala eMgazini izinyanga ezintathu ngaphambi kokuyozinikela ePhithamarizbheki ngowe-1888. Esebuyile eSt Helena ekudingisweni ngowe-1898 izinsizwa ezingama-400 zaseMgazini zatheleka oSuthu zizomemukela.
Kwakuthe ekukhothameni kukaDingane uMasiphula wathatha isikhathi ukufika kwaNodwengu/Nolele. ISilo uMpande sambuza ukuthi wayekade ebanjwe yini kangaka wasichazela ukuthi kade elinde ukuthi kwehle ihlahla ethuneni leSilo uDingane.
ISilo uMpande sakujabulela lokho sathi naso uyosifihla uma sesikhotheme. Nguyena uMasiphula owayephaka izimpi zeNgonyama uMpande ezazihlasela ikakhulukazi eSwazini.
Ngemuva kwempi yaseMaqonqo uDilikana kaHlakanyana Mbatha wathatha izinkomo zeNkosi yakwaMbatha uLukwabiti nezenkosana yakhe uNhliziyo. Isizathu salokhu ukuthi uLukwabiti noNhliziyo babengakuDingane eMpini yaseMaqonqo uDilikana engakuMpande kuleyo mpi.
Kwathi uma yonke impi yasemaMbatheni ngaphansi kukaLukwabiti noNhliziyo isiyobhekana noDilikana, iNgonyama uMpande yajuba uMasiphula ukuba akhiphe ibutho ukuyokwelekelela uDilikana. Nempela uMasiphula waphaka ibutho uNodwengu okwathi uma sekuhlaselwana nabasemaMbatheni wanqoba uDilikana.
Kwafa abantu abaningi basemaMbatheni abanye bahlakazeka bangena kwezinye izizwe. Impi yokuqala eyahlasela amaSwazi lapho uMntwana uCetshwayo atshengisa khona ubuqhawe bakhe yaba ngoNhlaba 1852. Nayo yaphakwa nguye uMasiphula.
UMasiphula nempi yaseNdondakusuka 2 Zibandlela 1856
Ingakabheduki impi yaseNdondakusuka phakathi kukaCetswhayo noMbuyazwe, iNgonyama uMpande yayicabanga ukuthi uMasiphula uzochema noMbuyazwe. Yajuba iqhawe uNtobolongwana kaMshwayibana kaSomungco Shezi ukuba agqugquzele izinsizwa eNkandla ukuba zeseke iZigqoza ezaziholwa nguMbuyazwe.
Kwathi uNtobolongwana engakakwenzi lokho, wathola umbiko kaMasiphula owawuthi agqugquzele abantu bakhe beseke uCetshwayo noSuthu olwaluholwa nguye. Wameluleka ngokuthi uma engakwenzi lokho impi uSuthu yayizobadudulela oThukela bonke ababephambene nayo. Waphinde weluleka uNtobolongwane ukuthi atshele uManqondo kaMazwana Magwaza, esinye sezikhulu zoMbuso kaZulu eNkandla ukuthi agqugquzele bonke abantu ukuthi bazimbandakanye noSuthu.
Nempela utobolongwane wasihlonipha iseluleko sikaMasiphula wenza njengoba wayetshelwa. NoManqondo naye wagqugquzela abalandeli bakhe ukuba bazibandakanye noSuthu. Kwathi uZulu wonke nxa ezwa ukuthi uNdunankulu uMasiphula wabe eseka uSuthu, engazeseki iZigqoza njengoba iSilo uMpande sasicabanga, izinkulungwane zikaZulu zazimbandakanya noSuthu.
Yingakho-ke abelungu ababejutshwe nguCaptain James Walmsely no-EF Ruthbone noJohn Dunn bagcina bekhande isaga seZigqoza esasiyimfihlo sokuqikelela ukubona izitha ezazeseka uCetshwayo. Leso saga esiyimfihlo sasithi “Ngubani owayeqale impi? Impendulo kwakufanele ithi “nguMasiphula” Ngakho-ke uMasiphula wabamba iqhaza elikhulu eNdondakusuka ukuba uCetshwayo adle umhlanganiso.
Ngemuva kwempi yaseNdondakusuka abantu abaningi base bethatha uCetshwayo njengeNgonyama yize uMpande wayesaphila. Iningi likaZulu lase izindaba ezinkulu zezwe lizibika kuye oNdono oLumnyama eNdlayangubo emzini wakhe owawungokaNsiyane uMaGumede, uNina kaDabulamanzi afakwa eza esizweni sakhe. Ngenkathi iNgonyama uMpande ikhothama ngowe-1872, uMasiphula wayesaphila.
Ukucela imvula eMakhosini
Nxa kuyocelwa imvula eMakhosini uMasiphula naye wayezisho izibongo zamakhosi kodwa yena wayengehli enyuka njengoMagolwana kaMkhathini wakwaJiyane imbongi enkule yezwe. Wayema nje asho izibongo. Kwakuthi kusaqhutshekwa kubonakala amafu entabeni yemikhonto lapho kuhlangana khona imifudlana; iMbilane, iMpembeni noMzinhlanga.
Ukufa kukaMasiphula kaMamba Ntshangase
Washona ngoNcwaba ngonyaka we1873, ngemuva kokuba uTheophilus Sheptone kade eseMlambongwenya. iSilo uCetshwayo sona sabekwa nguShepstone mhla lu-1 kuMandulo 1873. Kwakukhona uMasiphula, uNtshingwayo kaMahole Khoza, uMntwana uHhamu Zulu, uMnyamana Buthelezi, Mavumengwana kaNdlela Ntuli nabanye. UCetshwayo wacela uShepstone ukuthi atshengise ukuthi badubula kanjani ngezibhamu kodwa kungafakwa izinhlamvu.
Lo mlando ucashunwe encwadini: Izizwe ZaMakhosi AkwaZulu, Umqulu 3. Ukuthola le ncwadi enothe ngomlando wezizwe ungabhalela uSolwazi uMaphalala kule email: maphalala04@ gmail.com; noma ushayele kulezi zinombolo: 082 730 5782 noma ku-083 548 1918.