Ukujokola kweWundlu kwakhonga isililo seNdlovukazi
Kuthe kusenjalo, iSilo basibona siphenduka sibheka iWundlu laso. Sabe seselula isandla saso, sasibhekisa eNkunzini encane sathi “xhawula”. IWundlu lelula isandla salo ngenkulu injabulo, sisibhekise kuyo iMbube yomhlaba, lasho laxhawula. Kwabe kuyisifiso sikayise ukuba abambe isandla salo ngaphambi kokuba alifulathele ingunaphakade. IMbube yathi: “Sala kahle ndoda”. Maqede yalifulathela iWundlu layo lingenalo izwi lokuziphendulela, ukuba lalinalo, mhlawumbe laliyothi nalo; “Hamba kahle baba!”
Lawubuka kahle umhlane kayise owawuthwele, futhi wembethe umhlaba wonke wezwe likaZulu emahlombe awo. Mhlawumbe ingane yakuqonda ukuthi kungani uyise wayo ezithola engenaso ngisho nesikhathi sayo. Noma ayesekuqonda kamhlophe ukuthi ngeyegazi lakhe uqobo, kwathi ngemuva kwalawo mazwi eSilo, iNdlovukazi yaqinisekisa ukuthi uMndlunkulu uMbuzikazi uyawagcina ngokushesha amazwi eNgonyama ngoba ayewumthetho ongaweli phansi. Yakhipha amadoda ayezophekezela iWundlu leSilo ukuba lihambe ngokuphepha kanye nonina walo baduke nezintaba zezwe likaZulu.
UNomagwebu owayengumzanyana weWundlu walithatha walibeletha emhlane wakhe, wazithola sengathi usebelethe itshe uqobo ngaleso sikhathi. UMndlunkulu uMbuzikazi wasifulathela iSigodlo seNdlovukazi engasenakubuye ayibone idlala nomzukulu wayo, imthatha, imnqakela phezulu, imbongela ngokuthi “iyakhula iNkunzi encane”. Baphuma bajokola njalo belibhekise ngalena kwezintaba zoBombo lapho okwakubusa khona uBukhosi bakwaTembe. Akuthathanga isikhathi eside iNdlovukazi yabhocobala, umzimba wayo wehla ngokukhulu ukushesha, yadunguzela.
Ukukhothama kweNdlovukazi uNandi Kunokushaqisayo okushiwo ngababhali ngeSilo uShaka lapho bethi khona iNdlovukazi uNandi emzalayo, yabulawa yiso ngonya olwesabekayo.
Lokhu bakuthatha ngaphakathi eNdlunkulu lapho sebeyisontela khona iNgonyama uShaka befuna ukuyisoconga, abagcina bekufezile lokho. Ngokwempela okuliqiniso kabakusho uma befika kule ndikimba yendaba.
Nakhu abangakusho ababhali ngeSilo uShaka ngokukhothama kweNdlovukazi uNandi: INdlovukazi uNandi yahlabeka ukugula ngesikhathi iseSigodlweni sayo saseMkhindini, endaweni yaseMatheku. Kwathi lapho sekubonakala ukuthi ukufa kuyayehlula, kwathunyelwa eSilweni uShaka kwaBulawayo. Ngale nkathi umuzi wakwaBulawayo wabe sewakhe endaweni yakwaMaqhwakazi. Isigijimi safika kwaBulawayo iNgonyama iphume inqina, iyozingela endaweni yaseMfolozi. Sedlula, sasiphikelela khona ngoba sasishiye kukubi, iNdlovukazi ixinekile.
Kwathi uma iNgonyama ithole lowo mbiko, yakumisa ukuzingela, yaphuthuma eSigodlweni ukuba iyozibonela leso simo esasibikwa ngeNdlovukazi.
INgonyama kule nqina yayo yayiphume nommlungu uFynn kuyozingelwa izindlovu. Umlungu lona wayefuna amazinyo ayo. Kwathi lapho iSilo sifika emzini weNdlovukazi eMkhindini, mhla izinsuku ziyishumi enyangeni kaMfumfu, ngonyaka we-1827 sathi uFynn akangene lapho kwakulele khona iNdlovukazi, asihlolele yona. Phela uMnumzane uFynn wayekwazi ukwelapha ngamakhambi asentshonalanga. Ngakho iSilo sasimjuba sinethemba elikhulu ukuthi angasisiza, aselaphele iNdlovukazi esimeni esabe sesibikiwe ukuthi ikuso. Nebala uFynn wangena naye enethemba lokuthi uzoyisiza ngamakhathakhatha ayewaphethe. Wafika umlungu, qede waseyihlola. Kwathi ekuphumeni kwakhe uFynn endlini wafike wayilandulela iNgonyama, ethi isimo usifice sesisibi kakhulu, ngangokuthi wayilahlisa ithemba lapho ethi akasaboni ukuthi lisayoshona ilanga kulolo suku isaphila. Kwathi lapho iSilo sizwa lowo mbiko kaFynn, sathi amabutho esasibuye nawo ekuzingeleni kawahlakazeke, abuyele emadlangaleni awo.
Ngale nkathi iNgonyama yahlala isebuhlungwini obukhulu nobesabekayo emphefumulweni wayo. Kuthiwa kwaphela isikhathi eside ibhekise phansi ikhanda layo, isosizini olukhulu, ingakhulumisi muntu, ininga ngonina. Kuyacaca ukuthi yayininga ijulile ngale ntombi kaMbhengi eyayimkhulise kanzima, yehla yenyuka nayo yaqoma ukuhlupheka ukuze yona iNgonyama iphile. ISilo sabona ukuthi ngalelo langa yabe izosishiya, sisale sodwa, singasenabani owayengabe esasizwela kulo mhlaba njengoba kwakwenza iNdlovukazi.
Ngale nkathi iNgonyama yayisingethwe yizikhulu zoMbuso wezwe layo kuphela. Bathi, kwathi kusenjalo kwezwakala sekuqhuma isililo esesabekayo endlini lapho kwakulele khona iNdlovukazi, esasisho ukuthi sekonakele. Sasukuma iSilo lapho sasihlezi khona, saphonseka eSigodlweni saso, salila singenakuthuliswa muntu.
Kwaba nesililo esikhulu esasabalala nezwe lonke. Kwathi ngemuva kwesikhathi eside, iSilo sakhipha izwi ngoNdunankulu waso uNgomane kaMqomboli sathi, onke amabutho kawavunulele iNdlovukazi ngemvunulo yempi. Sabuyela endlini, saphuma naso sesihlobe ngayo imvunulo yempi. INgonyama uShaka yeza ngaphambi kwendlu lapho kwakulele khona isidumbu seNdlovukazi ikakwe yizikhulu zayo, yafike yema lapho isikhathi eside ingakhulumisi muntu.
UMnu uFynn ubeka athi iSilo namabutho bema imizuzu eyingxenye yehora, bebhekise phansi amakhanda abo phezu kwezihlangu zabo, belila. Usizi lwaludlula umunyu, izinyembezi zazehlela, ziphophoza eSilweni uShaka. Kwathi kusenjalo kwezwakala iNgonyama isiqhuma phezulu ngelikhulu izwi isikhala, yehluleka ukuzibamba. Kwasuka esinamathambo isililo sekukhala wonke umuntu owayelapho. Kuthiwa uZulu waqhamuka izinkalo zonke ephikelele eMkhindini.
Kwakhalwa ubusuku bonke kungekho othulisa omunye. Abaqala isililo babelinganiselwa ezinkulungwaneni eziyishumi nesihlanu kodwa, kwathi kusa babebalelwa ezinkulungwaneni ezingamashumi ayisithupha.