Siqhwiza umentshisi ngoMgqibelo eGauteng
Emva kwezinyanga eziyisikhombisa kwagcina ukuthi kube khona imiqhudlelwano yamankomane kuleli eyamiswa ngenxa yokhuvethe,
kule mpelasonto kulindeleke ukuthi indlala yezimpi iphele kubathandi balo mdlalo.
Umqhudelwano ozobe ubhekwe ngabomvu kule mpelasonto ngoweGolden Gloves owaziwa nge-4@War ozobanjelwa e-Emperors Palace, eGoli kusasa ngoMgqibelo.
Okujabulisa kakhulu ukuthi abathandi balo mdlalo bazokwazi ukuwubuka kumashaneli akwaSuperSport okuyiSuperSport Action (DStv 210), iSuperSport Grandstand (DStv 201) neSuperSport Variety 3 (DStv 208).
Impi ezobe ibhekwe kakhulu ekaBrandon Thysse noBody Allen ozobe evikela ibhande lakhe leWBA Pan African Junior-Middleweight.
UThysse odabuka eGermiston, eGoli, le mpi kade ayilangazelela kwazise egcina ukuhlulwa washaywa nguye u-Allen empini eyayingonyaka odlule. Impi yakhe yokuqala yaba ngowezi-2015 lapho ayetholene khona noDennis Mbath odabuka eNigeria kodwa osezinze kuleli.
Empini ayilwile uThysse yokugcina ibingoLwezi nyakenye nalapho anqoba khona ngeKnockout (KO), equmba phansi uRoarke Knapp. Le mpi yayibanjelwe khona e- Emperors Palace.
Kanti okunguye oviikela ibhande u-Allen, ezimpini eziyisi-6 asezilwile kusukela ngonyaka wezi-2018 induku akayazi nhlobo. Empini yokugcina ayilwile ibe nyakenye lapho aginqa uTristan Truter.
Khonamanjalo, kwezinye izimpi ebezibhekiwe kodwa kwashintsha izinto uJonas Sultan wasePhilippines ubezotholana phezulu noRicardo Malajika kweyebhande elingaphethwe umuntu le-IBO Intercontinental Junior
Bantamweight. Enye ibiphakathi kukaJabulani Makhese obezovikela ibhande leWBA Pan Africa ne-IBF Africa Junior Welterwight kuHarry Simon waseNamibia.
Nangempelasonto ezayo zizokuba khona ezihlelwe iTLB Boxing Promotion, lokho kuqinisekiswe uNks uCindy Nkomo oyiBamba leSikhulu Esiphezulu kuBoxing South Africa (BSA).
ULehlonono “Hands of Stone” Ledwaba weTLB ukusho kwagcwala umlomo ukuthi ahamba kahle amalungiselelo omqhudelwano wabo nakuba bengeke benze nzuzo. Sebecabangela amabhokisa ukuze kuzothi uma kuvulwa konke aqhubekele phambili.
Uthe izimpi zabo zizoba seKlispruit ngaseMaponya Mall, eSoweto. ULedwaba owazakhela igama evikela i-IBF Super Bantamweight kahlanu phakathi konyaka we-1999 kuya kowezi-2001, uthe bazoba nezimpi eziyisikhombisa ngalolu suku.
Phezulu eqhulwini ngekaThulani “Tulz” Mbenge waseMdantsane, e-Eastern Cape, ozobanga noKatembo Kuvesa waseDemocratic Republic of Congo (DRC) ibhande elingaphethwe muntu le-African Boxing Union (ABU) Welterweight.
Kubukeka uMbenge kuzomele anqobe noma kanjani kule mpi. Uphuma esibhaxwini sikaSebastian Formella waseGermany omphuce ibhande leInterntional Boxing Organisation (IBO) Welterweight empini ebisekuhambeni ngoNtulikazi nyakenye.
UKuvesa akanamlando otheni kwezamankomane njengoba engakaze alwele nelilodwa ibhande. Ugcine elwe ngokulingana no-Obodaa Sai waseGhana ngoNcwaba.
UZandile Malinga weStarline Promotions uveze ukuthi bahlela ukwenza umqhudelwano ngasekuqaleni konyaka ozayo. Kuwo bafuna uGcina Makhoba avikele ibhande leWBF International Junior Bantamweight alithatha eshaya uMsawenkosi Ndwandwe ekuqaleni kwalo nyaka.
Umdlali weqembu lasesifundazaweni iKwaZulu-Natal iSharks uJames Venter, uthi bakulungele ukubhekana nobunzima emdlalweni wabo ne-Emirates Lions.
La maqembu azotholana phezulu emdlalweni wokuvula umqhudelwano obizwa ngeSuper Rugby Unlocked. Lo mdlalo uzobanjelwa eJohnsonn Kings Park Stadium, eThekwini, libumbene ele19:00 namuhla.
UVenter oyiloose forward uthe bawabonile amaphutha abawenza ngesikhathi bebhekene neBulls emdlaweni weSuperFan (okungumdlalo wesihle).
“Uma kubuyelwa emlandweni wethu weSuperFan sihlezi singenzi kahle siyiSharks ezikhathini eziningi. Akuyona indlela yokuzivikela, kodwa iBulls indlela eyadlala ngayo yayikhombisa ukuthi ifuna ukunqoba njengoba yayingabambeki nje. Kepha sifunde okuningi kulokho. Siziqeqesha kanzima futhi senza kahle kakhulu. Wonke umuntu unecebo kuze kufike umdlalo,” kusho uVenter.
Uthe uyawaqonda amaphutha abawenzile kwazise bekuwumdlalo wokuqala, kodwa ekuhambeni kwesikhathi izinto zizobuyela esimweni.
ILions ememezele abadlali bayo abangama-25 ngoLwesibili ezobasebenzisa kulo mdlalo ifake iqembu eliqinile. Kulaba badlali kukhona uWillem Alberts oke waba isithenjwa samaSharks eminyakeni edlule, akasalanga ngaphandle u-Elton Jantjies obuye adlale eqenjini lesizwe amaBhokobhoko.
ILions uma iphethe ibhola ithanda ukuthi igijime nalo igcwale inkundla kodwa isimo sezulu njengoba singesihle kulezi zinsuku lapha eThekwini, bazothwala kanzima. “Okumele sikwenze ukunamathela ezinhlelweni zethu, senze lokho esikwenza kahle okuwukuthi siye ngamandla phambili. ILions ngiyafunga ukuthi izoba nesikhathi esinzima lapha eThekwini.”
Ukwenza kahle kukaJantjies eSpringbok Showdown, eNewlands, ngoMgqibelo owedlule kukhombisile ukuthi ungunombolo-10 ohamba phambili njengamanje odlala kuleli.
“UJanjties ufana nomholi kumaLions yingakho kumele siqinise endleleni esizomuvimba ngayo ukuze angashayi amabhola amaningi,” kusonga uVenter.
Umqeqeshi weLions u-Ivan van Rooyen uthemba ukuthi bazokwenza kahle abadlali abancane abane abazobe beqala ukudlala eqenjini elikhulu.
Kulaba badlali abane abathole ingqayizivele yethuba lokumela leli qembu u-EW Viljoen, uRabs Maxwane, uBurger Odendaal noJaco Visagie.
“Kungijabulise kakhulu ukubuya kukaWillem Alberts, uqale ukuziqeqsha ngeledlule. Uyakhombisa ukuthi ubuye ngamandla. Njengoba ezodlala ewunombolo-4 ngiyathemba uzodlala kahle kuwona wonke umdlalo. Ukudlala ekuhambeni khona kuzosinika inkinga kodwa abadlali ngiyabathemba kakhulu ekutheni bazosinqobela lo mdlalo,” kusho uVan Rooyen.
Lithakwe kanje iqembu leSharks elizoqala
UManie Libbok, uJP Pietersen, uLukhanyo Am (ongukaputeni), uMarius Louw, uWerner Kok, uCurwin Bosch, uSanele Nohamba, uSikhumbuzo Notshe, uPhendulani Buthelezi, uJames Venter, uHyron Andrews, uRuben van Heerden, uThomas du Toit, uDylan Richardson no-Ox Nche.
Iqembu leLions elizoqala lithakwe kanje
U-EW Viljoen, uJamba Ulengo, uBurger Odendaal, uDan Kriel, uRabs Maxwane, u- Elton Jantjies (ongukaputeni), uDillon Smit, uLen Massyn, uVincent Tshituka, uJaco Kriel, uMarvin Orie, uWillem Alberts, uCarlu Sadie, uJaco Visagie noSti Sithole.
Eminye imidlalo yeSuper Rugby Unlocked iqhathwe kanje: ICheetahs nePhakisa Pumas eToyota Stadium ngele-16:30 ntambama, iBulls neTafel Lager Griquas eLoftus Versfeld Stadium, ngele-19:00 kusihlwa.
Le midlalo yomibili izokuba kusasa ngoMgqibelo