Kumasha amabhokisa
Abahleli bemashi ebheke ekomkhulu leSouth African Broadcasting Corporation (SABC) esolwa ngokungafuni ukusakaza amankomane, bayaqhubeka nezinhlelo zayo phezu kokuba iBoxing South Africa (BSA) isabisa ngokuthi abazoba yingxenye yayo bazowukhomba umuzi onotshwala.
Abahleli bemashi ebheke ekomkhulu leSouth African Broadcasting Corporation (SABC) esolwa ngokungafuni ukusakaza amankomane, bayaqhubeka nezinhlelo zayo phezu kokuba iBoxing South Africa (BSA) isabisa ngokuthi abazoba yingxenye yayo bazowukhomba umuzi onotshwala.
Nakuba udaba lwale mashi ezohlanganisa zonke izinhlaka zamankomane ezifundazweni luqale ukugqama ngele dlule kodwa elaboHlanga lingakudalula ukuthi kade kwaqala ukuphekwa kwayo.
ISABC iyinyathele emsileni ngesikhathi ithatha isinqumo sokusakaza imidlalo yeligi yaseGerman, iBundesliga, neye-English Premier League (EPL).
Izinhlaka zezamankomane okukhona kuzo amabhokisa, abaqeqeshi, onompempe, ophromotha, yizimeneja nabanye zidinwe zathelwa ngamanzi.
Bebebabaza ihlazo bethi iSABC isingayekelala isibhakela sakuleli sife iqome ukubonisa ibhola langaphandle kwakuleli. Uma amankomane bengawasakazi abaxhasi bazowuxhasa kanjani lo mdlalo. Uphromotha uPius Dipheko weTeam Dida Promotions usungule umkhankaso obizwa ngeSave Our Boxing Movement osekwe ngabaningi ezinkundleni zokuxhumana.
Bekukhalwa kakhulu ngokuthi abantu abaningi kabanayo imali yokukhokhela iDStv esakaza ezamankomane. Ngaphezu kwalokho izinhlaka zesibhakela ziyayikhokhela ilayisense yethelevishini yeSABC.
ULebohang Mahoko ongusomabhizinisi waseFree State nonguphromotha ube eseqhamuka nomqondo wale mashi owesekwe ngabaningi. Ihlelelwa uLwesithathu lo mhla zizine kuLwezi. Izoqala ngele shumi ekuseni.
Izwa lezi zindaba iBSA ikhiphe isitatimende iziqhelelanisa nale mashi. Iveze ukuthi zikuvuthondaba izingxoxo neSABC, umbono wemashi uzoziphazamisa. Isabise nagokuthi abazotholakala beyingxenye yayo bazothathelwa izinyathelo. “IBSA ngeke ingabaze ukuthathela izinyathelo amalungu ayo azoba yingxenye yale mashi. Nakuba inhlangano ibuqonda ubuhlungu bokungasakazwa kwaSABC kwesibhakela kodwa kumele lolu daba lulwiwe ngendlela engeke ifake iBSA ehlazweni.”
Kungakapholi maseko iBSA ikhiphe lesi sitatimende, abahleli bale mashi abaholwa uMahoko bakhiphe esabo ebesiphendula le nhlangano phakathi kokunye bethi banelungelo lokuzibandakanya nanoma iyiphi imashi enokuthula
Bakhale ngokuthi iBSA ingaxoxa kanjani neSABC ophromotha bengekho okuyibo abanelungelo lokuxoxa nezinkampani zokusakaza. Ngowezi-2017 esigcawini sokucobelelana ngolwazi sophromotha esasikwaSABC, yathembisa ukusakaza lo mdlalo ngokuphelele kodwa kayikaze ikwenze lokhu.
UMahoko utshele elaboHlanga ukuthi ngeke bezwe ngeSikhulu Esiphezulu seBSA, uCindy Nkomo, ngoba siyafika kule nhlangano, asiluqondi usizi ababhekene nalo. UNkk uZandile Malinga weStarline Promotions noThulani Magudulela weLudonga bayahambisana nale mashi. UNkk uMalinga uthe kuyaxaka ukuthi kungani iSABC ingahloniphi isibhakela njengezinye izinhlobo zezemidlalo. UMagudulela yena uthe bekungamele kuze kufikwe kulesi simo. Okunye abakufunayo ukusakazwa komdlalo wabo emini noma ntambama njengoba kwakwenzeka phambilini.
UZola Koti ongumqeqeshi waseCape Town, uthe kuyihlazo ukuthi isibhakela sasisakazwa ngokugculisayo kusakhonya uhulumeni wobandlululo kodwa uma sekungowaboHlanga siyabulawa.