Okusha ngeGlebelands
Ayipheli inkombankombane ngesimo sehositela lezimanga iGlebenlands. Ngeledlule elaboHlanga libike kabazi ngokwenzeka kuleli khaya lezinsizwa. Kwelamuhla thola ukuthi uthini uMasipala i-Ethekwini ngodaba lwaleli hositela.
Kubukeka lizogaya ngomunye umhlathi emaqenjini amakhulu KwaZulu-Natal okuyi-IFP ne-ANC njengoba iqembu elisha kwezombusazwe lizowaphonsela inselelo okhethweni lokuchibiyela oluseNquthu naseMvoti.
Leli qembu elisungulwe owayenguSihlalo we-ANC eNkosi Bhambatha futhi owaba iMeya eMvoti, uMnu uPhilani “PG” Mavundla, okuyiAbantu Batho Congress (ABC), lingenele ukhetho lokuchibiyela oluzoba mhla zili11 kuLwezi wezi-2020.
Kuthiwa imikhankaso yalo eNquthu iqhutshwa obeyiMeya ye-IFP, uMnu uSiyabonga Mabilabila Kunene, osanda kushiya ku-IFP kanti ukhishwe esikhundleni ekuqaleni konyaka ngemuva kokungagculiseki kobuholi beqembu ngokuphatha kwakhe.
UMkhulumeli we-IFP, uMnu uMkhuleko Hlengwa, uthe sekusele kuye uKunene ukuba ageze igama lakhe asho noma useyiyo i-IFP noma usejoyine i-ABC.
“Akukwazi ukuthi umuntu kungalokhu kukhulunywa ngaye kuthiwa usejoyine elinye iqembu kodwa yena ethule engaphawuli lutho ngalokhu. Yingakho sithi sekusele kuye ukuba aphumele obala ukuze uma eseyishiyile iNkatha ayeke ukuqhubeka ahole imali yayo emkhandlwini,” kuchaza uHlengwa.
UKunene wayeyiphini le Meya nyaseNquthu esekuNFP nokwathi uma eyishiya ngowezi-2016 ngoba ingasakwazanga ukungenela ukhetho ngenxa yezimali, wagxumela ku-IFP nalapho afike wanqoba iwadi maqede waba iMeya.
Kumanje kuthiwa isimo sibi eNquthu njengoba kungasathenjwene nanokuthi amanye amakhansela sekunezinsolo zokuthi ahlela ukuhlubuka alandele uKunene.
Umthombo ocele ukungadalulwa uthe isimo sibi kakhulu futhi awumsoli uKunene ngokushiya ngoba ubesehlukumezeke kakhulu.
“UKunene ubesebuthwalile ubunzima njengoba kugcine sekufika noMphathiswa uHlomuka ngoba kwavele kwabekwa iMeya ekhona esikhundleni sasesiba nezimeya ezimbili. Akugcinanga lapho kuphinde kwafika abanye abaholi bazophoqa ukuba kuxoshwe ezinye izikhulu kuMasipala ebekusafakwe ukubuyekezwa kwesinqumo sokuchithwa kwazo inkantolo yaseMgungundlovu eyayilahla ukuqashwa kwazo. Amakhansela amaningi lapha eNquthu ashaywa uvalo ukuthi uma kubuywa kulolu khetho kuzoba njani. Amanye aseyasihlupha ngaphakathi acela siwaphendlele izikhala zomsebenzi ngoba esaba ukuthi uma i-IFP ithukuthela iwaxosha ngoba ingasawethembi azolamba,” kuchaza umthombo.
UKunene uke wakhala ngokuthi baningi abaholi be-IFP abangamfuni wathi: “Indlela abangizonda ngayo kungathi uma bengifica ngilele phansi banginyathele ngesondo lemoto ngife, abangifuni labaya bantu.”
UKunene ubebuye abe nyamanambana ngokuthi izingwevu ze-IFP eNquthu zazingalibhekile igama lakhe kulawo ayezoqokelwa ozoba yiMeya kodwa kwakubhekwe elikaMnu uSipho Nyamane.
Kuthiwa kunamanje amakhansela amathathu aseMthonjaneni nawo asejombela ku-ABC kaMavundla kodwa aseke azama nokuthi afake isiphakamiso sokuba kuketulwe iMeya uSbonginkosi Biyela.
La makhansela elaboHlanga elinawo amagama awo kuthiwa abefuna kukhishwe uBiyela bese kufakwa owayeyiMeya ye-ANC uShadile Dlangamandla bese uMkhandlu uwela kuKhongolose.
UMavundla uvumile ukuthi kukhona amakhansela abahlomule ngawo eNquthu kodwa akathandanga ukudalula amagama awo njengoba ecashunwe ethi basazowamemezela.
Uqubuke ngonyaka owedlule esekhankasela iNFP nalapho afike kuyo wanqoba ukhetho lokuchibiyela kuWadi 3 eMvoti ehlula i-ANC.
Akahlalanga kuleli qembu nalo elikhungethwe izinkinga zokungezwani njengoba ebonakale esesungula elakhe okuyi-ABC abanye asebelibiza ngokuthi iqembu lama-“alphabet”.