Izinguquko nebhizinisi
Isikhathi esiningi uma kunezinguquko ezenzekayo engxenyeni ethile yemboni, kuyamphoqa umnikazi webhizinisi ukuba naye enze ezakhe izinguquko kwelakhe ibhizinisi. Thola incazelo ebanzi ngalokhu kwelanamuhla.
Abe-International Monetory Fund baqagela ukuthi ukukhula komnotho wezwe laseNingizimu Afrika kuzokwehla ngamaphesenti ayisi-8 kulo nyaka nokuthi isibalo sabantu abangasebenzi sizofinyelela kumaphesenti angama-37 kulo nyaka ophezulu. Lokhu kushayisa uvalo kodwa kuyinto ebonakalayo ngendlela ezenzeka ngayo izinto.
Usuku lwangoMsombuluko bekuwusuku lwama-200 izwe lingaphansi kwemvalelwakhaya egunyazwe wumthetho wokuBhekelela iNhlekelele. Kuyazisho ukuthi kunamabhizinisi osekusondela esikhathini esingangonyaka engasebenzi. Kushiya imibuzo engaphendulwa ngabanikazi bamabhizinisi ukuthi amabhizinisi abo asaphila yini nokuthi asayovuka yini. Kuyinto ebuhlungu kakhulu.
Ezimakethe zemali izinto bezibukeka zizinhle ekuseni ngoMsombuluko ngoba luqale usuku ezintathu kweziyisihlanu izigaba zemakethe esijwayele ukuzibuka kule ngosi zibukeka kangcono kunangoLwesihlanu.
NgoMsombuluko zili-12 kuMfumfu 2020
Irandi likwazile ukusimama lafinyelela lapho belingakaze lifinyelele khona ezinsukwini eziyisihlanu ezedlule. Kuvule izimakethe idola lase-USA lilingana namarandi ali-16,49 okukhombisa ukuthi irandi lisimame ngamasenti amane ngempelasonto.
Kuvukwe ngoMsombuluko uPondo waseBritain ulicindezele irandi laze lalahlekelwa ngamasenti ayisikhombisa, sekudingeka amarandi ahlangane aze abe ngama-21,50 ukuze alingane noPondo waseBritain.
Likhombise ukuthi alivumi ukuya phansi lingandlalelwe irandi. Noma iYuro lilithwalise kanzima irandi, ligcine liphunyukwe yisenti elilodwa vo, kwavula izimakethe ngoMsombuluko iYuro lilingana namarandi ali-19,49.
Abahweba ngegolide bathole ukumamatheka ngoba intengo yegolide kuvukwe ngoMsombuluko ifinyelele kumadola ase-USA ayi-1 958.
Uwoyela ongahluziwe kuvukwe ngoMsombuluko uthe ukwehla wabiza amadola ase-USA angama-42,45.
NgoLwesibili zili-13 kuMfumfu 2020
Likhombisa ukuba sebunzimeni irandi uma liqhathaniswa nedola lase-USA. Lishone elangoMsombuluko kunethemba ngoba liqale kahle isonto. Kwavula izimakethe ngoLwesibili idola lase-USA lilingana namarandi ali-16,52.
UPondo waseBritain bewulidudula irandi laze laphunyukwa ngamasenti ayisikhombisa, kwavukwa ekuseni ngoLwesibili uPondo waseBritain ulingana namarandi angama-21,57. Leli zinga elikulo irandi alikaze libe kulo esikhathini esingamasonto amabili edlule. Kulezi zinsuku awuvumi ukwehlela ngezansi uPondo waseBritain uma ubhekene nerandi.
Irandi belishayeka nxazonke kodwa lizabalaza uma liqhathaniswa nezinye izimali emakethe, kangangokuba neYuro alikwazanga ukunyakaza lapho belikhona ngayizolo, kwavula izimakethe ngoLwesibili iYuro lisamile lilingana namarandi ali-19,49 njengangoMsombuluko.
NgoLwesithathu zili-14 kuMfumfu 2020
Irandi lisimame ngamasenti ayisithupha kwavula izimakethe ekuseni ngoLwesine idola lase-USA lilingana namarandi ali-16,46.
Irandi lidudule kwaze kwezwela kuPondo wagcina uwadedelile amasenti alenze irandi lasimama, kwavukwa ekuseni uPondo waseBritain ulingana namarandi angama-21,29.
Kuvule izimakethe zemali iYuro lilingana namarandi ali-19,33, okuthokozisayo ngoba irandi likwazile ukubuyisa amasenti ayishumi nesithupha.
NgoLwesine zili-15 kuMfumfu 2020
Inqola ibonakale ihlehla nomthwalo irandi libhekene nedola lase-USA. Kwenzeke njalo ngenkathi idola laseUSA lephuca irandi amasenti ayishumi nanye, kwagcina idola lase-USA lilingana namarandi ali-16,57 ekuseni ngoLwesine.
Kuthiwa amanzi ajwayele ukuma lapho ake ema khona. Irandi liphindele lapho belikhona ngoLwesibili libhekene emehlweni noPondo waseBritain. Kuvulwe ezimakethe zemali uPondo waseBritain sewuphindele lapho bewukhona ulingana namarandi angama-21,57.
Bekunokuthokoza ngoLwesithathu irandi likhombisa ukusimama libhekene neYuro, kwavukwa ekuseni ngoLwesine zijikile izinto, lapho iYuro lephuce irandi amasenti ali-14, kudingeka amarandi ahlangane abe li-19,47 ukuze alingane neYuro elilodwa.
Intengo yegolide beyilokhu yehla phakathi nesonto, kwathi ngoLwesine kuvulwa emakethe intengo yegolide yabe imi ku-1896, isengaphansi kwalapho yayikhona kuqala isonto.
Intengo kawoyela ongahluziwe yehla yenyuka izungeza phezulu. Ayivumi ukwehlela ngaphansi kwamashumi amane. Kuvule izimakethe ngoLwesine yenyukile intengo yema kuma-43,37.
Kuleli sonto belehla lenyuka irandi lungekho uzinzo. Phakathi kwezinto obekulindelwe ukuba zenzeke, yinkulumo kaMengameli uMnu uMatamela Ramaphosa eveza izindlela uHulumeni azozisebenzisa ukutakula izwe esimweni elikuso ngokomnotho nezinhlelo zokwandisa amathuba emisebenzi. Uma isimo somnotho sinjengalesi, ngeke kube lula ukuvela kwamasu.