Impumelelo kowaseHowick
Zisheshe zamuhambela kahle izinto umsubathi waseHowick ozoba yingxenye yomjaho okumenywe kuwo abathile ozobanjwa ngohlelo lobuchwepheshe besimanje.
Kufanele ukube iyansonsotha inhliziyo kasomankomane uXolisani “Nomeva Wasp” Nomeva Ndongeni waseDuncan Village e-Eastern Cape uma ebona impumelelo kaDevin “The Dream” Haney wase-United States of America (USA).
Laba somankomane nyakenye batholane phezulu empini ebizocacisa noma ebiwumkhombandlela wekusasa labo kulo mdlalo.
Ibi mhla zili-11 kuMasingana eStageWorks, eLouisiana, e-USA kubangwa ibhande elingaphethwe muntu leWorld Boxing Council (WBC) International neleWorld Boxing Organisation (WBO) Inter-Continental Lightweight.
Sekuyindaba exoxwayo ukuthi kule mpi unondweba wayo okwakunguBruce McDaniel wakhona e-USA, laduma layithatha insizwa yakuleli, uHaney wanqoba ngamaphuzu.
UHaney akabange esabheka emuva njengoba kulezi zicoco waphinde wengeza ngeseWorld Boxing Association (WBA) International eshaya u-Antonio Moran waseMexico.
NgoMandulo wonyaka odlule uhlule uZaur Abdullaev waseRussia kweyokuhlungela iWBC World Lightweight kwathi ngoLwezi waqumba phansi u-Afredo Santiago waseDominican Republic.
Mhla ziyisi-7 kuLwezi, e-USA, uHaney leli bhande uzobe elivikela okokuqala. Uzolwa noYuriorkis Gamboa waseCuba. Abaningi babezitshela ukuthi kuyofika lezi zinsuku uNdongeni esezingeni noma elingaphezulu kwelikaHaney.
Kubukeka izinto zakhe ziphinde zaphazanyiswa wukhuvethe ekutheni abalwe nabafana noHaney.
Kuvalwe yonke into ezweni kumele ngoMbasa ayolwa no-Ernold Barboza eLas Angeles. Le mpi ibizondlalela ekaJohn Reil Casimero noNaoya Inoue. Ibizohlanganisa ibhande leWBO, eleWBA Super nele IBF World Bantamweight.
Ngowezi-2017 uNdongeni uke wafulathela elakuleli eyocijwa inkakha yomqeqeshi wase-USA ejimini kaFloyd Mayweather eseLas Vegas.
Lokhu wayekuhlanganiselwe iMecca and Events Promotions ngosizo lweMathews Phosa Foundation.
Ukuba nekhono ukuqale emncane egingqa osomankomane abadala abanjengoGodfrey Ndzimande enqoba isicoco sakhe sokuqala okuyibhande lakuleli leFeatherweight.
Uqhubekile nokungahloniphi abadala abafana noPatrick Malinga, uMzonke Fana amshaye kweyeWorld Boxing Federation (WBF) Lightweight, uJasper Seroka abukise naye kweye-International Boxing Organisatio (IBO) ukusho abambalwa.
UNdongeni ugcine ukuba seringini ngoMandulo wanyakenye ehlula uMbena Rajab ngomngqimuzo womlalisa phansi.
Kusasa, ngoMgqibelo, uNdongeni uzolwa noPrince Dlomo kweyokungcweka, okuzanywa ngayo ukubuyisa umgqigqo wakhe. Le mpi iyingxenye yezihlelwa iTLB Boxing Promotions kaLehlohonolo “Hands of Stone” Ledwaba noJoyce Kungwane.
Ziqala ngelesi-6 ntambama eKlipspruit Sports Centre, eSoweto.
Impi yosuku lapha iphakathi kukaThulani Mbenge ozobanga noKuvesa Katembo waseDRC ibhande elingaphethwe muntu le-African Boxing Union (ABU) Welterweight.
UDlomo usephenduke isitebhisi sabaningi kuleli nangaphandle. Kwagcine ukuyilwa ekuqaleni konyaka ushaywe uGeorge Chelokhsaev waseRussia. Ubephuma esibhaxwini sika-Iman Ahmadov wase-Azerbaijan. U-Ahmadov waya kule impi enezimbili kuphela ekubeni uDlomo wayenesipiliyoni sezingama-20.
Zihlelwe kanje ezinye izimpi zeTLB
UKabelo Bikitsha uzozama ukuphuca uKhaya Busakwe ibhande laseGauteng leLightweight. ULucky Monyembane uzotholana phezulu noSifiso Hlongane kuJunior Ligthweight bese kuthi uDoctor Ntsele ahluthane noThato Bonokoane kuJunior Featherweight. Kwabesifazane uMelissa Miller uzozwana amandla noEllen Simwaka waseMalawi.