Owamagqubu oweMTN8
Ngabe iMaritzburg United isizoqhubeka nokuthwesa iKaizer Chiefs ubunzima njengoba yenzile ngesizini edlule? La maqembu atholana koweMTN8 kule mpelasonto.
UMandla Ncikazi uyinkunzi emidwayidwa nenamava kunobhutshuzwayo waseNingizimu Afrika. Lo mqeqeshi ungomunye walabo abathathwa kancane kuleli kodwa uma usukhuluma naye uyezwa ukuthi ibhola ligijima emithanjeni yakhe.
UNcikazi, ongazidli neze uma kumele adlane indlebe nabezindaba, usebe yiphini labaqeqeshi abaningi abahlonishwayo ngisho emhlabeni jikelele. KuLamontville Golden Arrows ungasho ngokungangabazi uthi yisekhaya kuNcikazi uma ubheka isikhathi asesihlale khona esebenza njengomqeqeshi.
Usebe yiphini kubaqeqeshi abafana noManqoba Mngqithi, uMuhsin Ertugral, uZoran Filipovic, uShaun Bartlet, u-Ernst Middendorp, uClinton Larsen, uMark Harrison, uKhabo Zondo noSteve Komphela osanda kujoyina iMamelodi Sundowns. UNcikazi useke waqeqesha ngokuzimela kuMaritzburg United ngemuva kokuhamba kukaLarsen. Nokho lapha waqeqesha imidlalo emihlanu kuphela.
Ukuqashwa kwakhe njengomqeqeshi ozongena endaweni eshiywe uKomphela ku-Arrows, akumangazi neze uma kubhekwa ukuthi usehlale isikhathi esingakanani kuleli qembu njengephini. Uzolekelelwa uMabhuti Khenyeza ozoba yiphini lakhe.
Izolo i-Arrows ikuqinisekisile ukuthi uNcikazi uzohola Abafana Be’sthende kule sizini ezoqala yeDStv Premiership.
UNcikazi uthatha iqembu nje lihluleke kancane ukungena kuTop 8 ngesizini edlule njengoba kudlala imidlalo yeMTN 8 ngempelasonto.
Amaqembu amaningi aphazanyiswe ukumiswa kwemidlalo ngenxa yokhuvethe. Amanye amaqembu afana neArrows ashayeke kakhulu ngokuhlala isikhathi eside kangaka engadlali. Kube nzima kakhulu ukuthola imiphumela ngemuva kokuhlala inyanga ezinhlanu engadlali. Ukunikwa kukaNcikazi umsebenzi wokuhola Abafana Bes’thende kusho ukuthi uzojoyina abaqeqeshi abazobe beqala ukuba yizinhloko emaqenjini abo uma sekuqala isizi. Lapha sibala uGavin Hunt, ozohlala okokuqala ebhentshini leKaizer Chiefs ngeSonto, uMngqithi, uRulani Mokwena noKomphela, abazobe behleli ebhentshini leSundowns okokuqala ngemuva kokuhamba kukaPitso Mosimane. ISundowns izobhekana neBloemfontein Celtic koweMTN 8 ngeSonto.
UDan Malesela uzobe esebhentshini leTS Galaxy okokuqala selokhu leli qembu lithenge isitifiketi sokudlala kuDStv Premiership. Nokho lo mqeqeshi useke wasebenza kuleli qembu lisadlala kuGladAfrica Championship.
UNcikazi akathandanga ukuphawula mayelana nokuqokwa kwakhe njengomqeqeshi ngesikhathi ethintwa elaboHlanga.
“Okwamanje angikho esimeni sokwenza lokho (ukukhuluma). Ngiyaxolisa kakhulu,” kusho lo mqeqeshi.
I-Arrows izovula imidlalo yeDStv Championship ngokubhekana neBloemfontein Celtic eDr Molemela Stadium zingama-24 kuMfumfu. Kuzocaca lapho ukuthi iphetheni kule sizini ezoqala ngaphandle kwabalandeli ezinkundleni.