Ichilo kuphela iminyaka izingane zigileka ebandleni
Umholi weChurch of England ngeledlule uthe kuyihlazo ukuthi lesi sikhungo sekuphele iminyaka eminingi sehluleka ukuvikela izingane kulabo abazinukubeza ngokocansi abakhona kulesi sikhungo futhi sikhombisa ukungabanakekeli abagilwa bokunukubezwa. Ngokusho kophenyo olwenziwe kusukela ngowe-1940 kuze kube ngowezi-2013, amalungu aleli bandla nabasezikhundleni kulo abangama-390 base betholwe benamcala okunukubeza izingane ngokocansi.
“Kuyihlazo, kuyichilo futhi kuveza ngqo lokhu abakushilo ukuthi kube khona isiko lokufihlwa nokuvikelana ngalolu daba,” kusho uSobaba Omkhulu waseCanterbury, uJustin Welby, ngesikhathi ekhuluma nabezindaba.
Uphenyo oluzimele obelubhekiswe ekuhlukunyezweni kwezingane ngokocansi luthole ukuthi leli bandla belibavikela liphinde libafihle abahlukumezi ukuze kuzovikeleka isithunzi salo.
“Akuyona into ethusayo. Asikabi kude kakhulu kepha ushintsho luyenzeka kancane kancane,” kusho uSobaba uWelby.
Iqembu labahlukumezekile lithe leli bandla lisakude kakhulu njengoba lisabhekene nezinsolo eziningi ngaphakathi futhi kufanele liqaphele noma libheke izidingo zempilo zalabo abahlukunyezwa.
“Kuzothatha okungaphezu kwezingxoxo ngaphambi kokuthi kube khona ukuthembana kuleli bandla,” kusho uMfundisi webandla kanye neqembu labahlukunyezwa iClergy Sexual Abuse Survivors Group.
“Ukuxolisa nokuveza amahloni nosizi kuyamukelwa kepha okudingekayo isenzo esisebenzayo nesinezinsiza kusebenza.”
‘Ukungabi nandaba’
IBandla lamaKhatholika nalo libe nokugxekwa okufanayo ngendlela elisingathe ngayo udaba lokunukubezwa kwezingane emhlabeni jikelele, yize selakhokha imali eyizigidigdi futhi noPapa uFrancis unxuse “impi yonke” yokulwa nokuhlukunyezwa kwezingane ngabefundisi noma amalungu ebandla asezikhundleni.
UWelby owaba nguSobaba omkhulu ngowezi-2013 uthe wazi ukuthi kunokuhlukunyezwa kwabantu nezingane ebandleni ngenxa yecala lwaloyo owayenguSobaba waseGloucester okwathi ngonyaka wezi- 2015 walivuma icala lokushaya.
UMnu uPeter Ball kusolwa ukuthi kubagilwa wayephakamisa ukuthi ukuthotshiswa okufaka phakathi ukuthandaza unqunu kwakuyizimfundiso zikaSt Francis futhi kwakusondeza umuntu kuMvelingqangi. Omunye owagilwa nguBall wagcina ezibulele.
UWelby uphinde wathi: “Besilokhu sehluleka ukubhekana nokwenza ubulungiswa, abagilwa kanye nabasindile, konke lokhu kungabi nandaba kuyashaqisa.”