Imigomo yokunqanda ukubhebhetheka kokhuvethe
Idolobha iMadrid kufanele libeke imikhawulo yezokuvakasha eyayikhishwe uMnyango Wezempilo emzamweni wawo wokunciphisa ukubhebhetheka kokhuvethe kungenjalo uHulumeni kazwelonke uzobeka leli dolobha ngaphansi kwesimo esibucayi esizophoqa leli dolobha ukuba lilandele imiyalelo yoMnyango. Lokhu kusho uHulumeni kazwelonke ngeledlule.
Okube esinye isithombe sokushuba kwezingxoxo phakathi kukaHulumeni kazwelonke nowendawo, okazwelonke uthe uzoba nomhlangano ohlukile nomangalisayo weKhabhinethi lapho uzonquma khona mayelana nokufaka leli dolobha ngaphansi kwesimo esibucayi uma lingabeki imikhawulo.
Kulandela umyalelo woMnyango Wezempilo, iziphathimandla zaleli dolobha, zabeka imikhawulo yokuhamba okungenasidingo kokungena nokuphuma eMadrid kwathi amadolobha ayisishiyagalolunye ayizungezile emasontweni amabili edlule nawo afaka le mikhawulo ukuze kuzanywe ukunqanda ukubhebhetheka kokhuvethe kuleli lizwe elibonakala njengesidleke esishayeke kakhulu sokhuvethe ezwenikazi i-Europe.
Kodwa inkantolo yesifunda kuleli dolobha yazichitha lezi zinyathelo zaziphathimandla, yathi uHulumeni uleqile igunya lawo futhi le mikhawulo iphazamisa amalungelo abantu ayisisekelo.
Ukumemezela noma ukubeka isimo esibucayi, kuwuhlaka olufanayo lwezomthetho olwalusekela ukuvalwa kwaleli lizwe ngesikhathi ukhuvethe lugadla okokuqala. Ukumenyezelwa kwalesi simo kwakuzonika uHulumeni kazwelonke amandla okuvimba ukuhamba kuleli dolobha.
UNdunankulu waleli lizwe, uPedro Sanchez, utshele umholi wesifunda wakuleli dolobha uNks u-Isabel Diaz Ayuso ukuthi kumele asebenzise noma afake imikhawulo okanye acele ukuba leli dolobha lifakwe ngaphansi kwesimo esibucayi kodwa uma engakwenzi lokhu kuzophoqeleka ukuthi uHulumeni kazwelonke ayifake yena imikhawulo ngokuthi afake leli dolobha phansi kwesimo esibucayi.
“Kunoma yikuphi kulezi zinyathelo ezintathu ezibekelwe lo mholi waleli dolobha, izinyathelo zizolingana ncamashi nalezo esezivele zisetshenziswa, okuwumehluko kuzoba indlela okusetshenziswa ngayo,” kusho isitatimende sikaHulumeni.
UNks u-Ayuso uthe izikhulu zalesi sifunda zizoludingida kabanzi lolu daba.
“Sethemba ukuvumelana ngesixazululo esizosiza izakhamuzi futhi siphinde sinikeze ukucaciseleka kwezinto okuqondile,” kusho uNks u-Ayuso esitatimendeni sakhe.
UMnu uSantiago Abascal, umholi weqembu iVox, uthe uzogqugquzela ukuba kube nemibhikisho kazwelonke uma leli dolobha lifakwa ngaphansi kwesimo esibucayi.
“AbaseSpain ngeke bavume ukuboshwa futhi,” ebhala ezinkundleni zokuxhumana.