Ahlongoza unswinyo olubhekiswe kwabaseRussia
Amazwe iFrance neGermany ngesonto eledlule athe azophakamisa ukuba kube nonswinyo oluzoqhamuka enhlanganweni i-European Union (EU) kwabathize baseRussia ngemuva kokungazitholi izimpendulo eziqondile nezethembekile eziqhamuka kuleli lizwe ngokudliswa ubuthi kwalowo ongumgxeki omkhulu kaHulumeni waleli lizwe uMnu u-Alexei Navalny. Ohulumeni abaningi basentshonalanga bathe iRussia ephika izinsolo zikaNavalny zokuthi iyathinteka ekudlisweni kwakhe ubuthi kumele isize ophenyweni noma ibhekane nemiphumela.
Lesi sinqumo kanye nokushesha kwale mibuso emibili (Germany neFrance) emikhulu ezwenikazi i-Europe yokuqhubekela phambili nokubekwa konswinyo kufakazela isithombe sokuntengantenga kobudlelwano phakathi kwaleli lizwekazi neRussia.
Ukuthathwa kwalesi sinqumo kuhlukile kunalokho kowezi-2018 lapho kwathatha khona cishe unyaka ukuthi amalungu e-EU avumelane ngezijeziso ezazizobhekiswa kwabathize baseRussia ngemuva kokudliswa ubuthi kwenhloli yaseRussia eyayiseBritain.
“Akukho ncazelo ethembekile enikezwe yiRussia kuze kube manje. Ngalokhuke sibheka ukuthi ayikho enye incazelo ezwakalayo ngokudliswa kukaMnu uNavalny ushevu ngaphandle kokuthi iRussia iyabandakanyeka kulokhu,” kusho isitatimende esihlanganyelwe soNgqongqoshe Bezangaphandle uJeanYves Le Drian noHeiko Maas.
Osomaqhinga phambilini batshele abezindaba ukuthi la mazwe amabili ahlongoze ukuthi kubekwe unswinyo ezikhulwini zeRusssianGRU Military Intelligence, lapho kuzobe kuhlangene bonke ongqongqoshe bezangaphandle abakule nhlangano mhla zingama-27 kuMfumfu.
“Ukudweba isiphetho esidingakalayo ngalolu daba, IFrance neGermany bazokwabelana nabalingani babo kule nhlangano mayelana nokufaka unswinyo,” kusho ongqongqoshe bala mazwe.
“Iziphakamiso zizobhekiswa kubantu abatholakala ukuthi banaso isandla kuleli cala elibe wukwephulwa kwenkambiso yamazwe omhlaba, ngokuya kwemisebenzi yabo esemthethweni kanye neqhaza abalibambayo ohlelweni lweNovichok.”
Amasampula egazi athathwe kuNavalny akuqinisekisile ukuba khona kobuthi obuqhamuka emndenini wamaNovichok, ongavumelekile ngokusho kwenhlangano ebhekene namakhemikhali emhlabeni jikelele.
Ongqongqoshe bezangaphandle abaku-EU kulindeleke ukuba bakhombise ukweseka kwabo lokhu okuhlongozwa yiGermany neFrance, kepha unswinyo akulindelekile ukuthi luvunyelwe ngokushesha njengoba imibhalo yezomthetho kufanele ilungiswe futhi ihlaziywe ngongoti bezomthetho abazobe bephuma kula mazwe anngama-27 akule nhlangano.
UNgqongqoshe uLe Drian ekhuluma nekomidi lePhalamende edolobheni iParis uthe: “Sisho neGermany ukuthi ukucacisa okuqhamuka eRussia kubalulekile kakhulu kodwa uma ingazimisele ukucacisa, kuzodingeka ukuthi sizithathele thina isinqumo mayelana nalolu daba. Siyavumelana neGermany.”
Kodwa uphinde wakubeka kwacaca ukuthi iminyango yezingxoxo neRussia ayivaliwe. Kuzokhumbuleka ukuthi ngenyanga edlule uMandulo uMengameli wase-USA uDonald Trump wenqaba ukugxeka iRussia ngokudliswa kukaNavalny ubuthi yize abaholi emhlabeni jikelele nabanye abaseqenjini lakhe uTrump bebeka leli lizwe icala.
“Kufanele lolu daba silubheke ngeso elijulile. Uma kunjalo, futhi ngicabanga ukuthi sizokwenza njalo. Angazi kahle ukuthi kwenzekeni, ngicabanga ukuthi kuyadabukisa, kubi kakhulu futhi akufanele engabe kwenzekile. Asikabi nabo ubufakazi okwamanje kodwa lolu daba ngizolubheka,” kusho uTrump kwabezindaba.