Imeneja yoMkhandlu iKokstad inxenxe oNgqongqoshe ngezimali zokusiza idolobha
Ukukhula kwedolobha laseKokstad eningizimu yesifundazwe ngesivinini sekuholele ekutheni uMkhandlu wakuleya ndawo ubhekane nengcindezi kagesi.
Lowa Mkhandlu usucele ukusizwa ngemali ebalelwa ezigidini ezingama-R60 ukuze ukwazi ukwakha isiphehli sikagesi iSingisi Sub-Station esizokwakhiwa ngasezansi kwesibhedlela sendawo i-Usher Memorial.
IMeneja yalowa Mkhandlu uMnu uLulamile Mapholoba yenze isicelo sokuthi basizwe ngemali koNgqongqoshe ababili bakazwelonke ababehambele lowa Mkhandlu ngoLwesithathu okunguDkt uNkosazana MaDlamini Zuma woMnyango Wokubusa Ngokubambisana Nezindaba Zomdabu kanye noJackson Mthembu uNgqongqoshe oseHhovisi likaMengameli wakuleli uCyril Ramaphosa.
Bebehambele kuleliya dolobha ngaphansi kohlelo lukaHulumeni lokusheshisa intuthuko kubantu nokuyobheka izinkinga eziphuthumayo nezidinga usizo olusheshayo.
Ethula inkulumo yakhe uMapholoba uthe ngale kokuthi badinga isiphehligesi esinamandla banohlelo lwentuthuko edolobheni lwezigidi ezingama-R400 lokwakhiwa kwenxanxathela yezitolo nalo oluzodinga amandla kagesi njengoba iziphehligesi ezikhona zihluleka ukuphakela idolobha namalokishi endawo.
“Osomabhizinisi bayaqhubeka nokutshala imali edolobheni kodwa sibhekana nenkinga kagesi njengoba sibuye sibe nenkinga ka-Eskom osebenzisa amandla akhe ngendlela engelungile yokuphakela amapulazi endawo ugesi obekufanele ukuthi aphakelwa uMkhandlu,” kusho uMapholoba.
“Kodwa ke sesikuxoxile lokho nabe hhovisi lezimbiwa phansi ukuthi kukhushulwe ilayisensi yethu yokuphaka ugesi,” kusho uMapholoba
Uthe bawuMkhandlu ongatholi imali engakanani yengqalasizinda kuMnyango kaMgcinimafa njengoba bethola imali ebalelwa ezigidini ezili-R17 ngonyaka.
Uthe uMkhandlu wakhe uthembele emalini yamareyithi ekhokhwa osomabhizinisi nabahlali nokuthi okwenza imali yengqalasizinda esuka kuHulumeni ibe ncane kungenxa yenani labantu bendawo abangama-76 000 ngokwemininingwane yeStats SA yize kuneningi labantu abahlala endaweni abangaveli ezincwadini ngenxa yezinkinga zabo ezehlukene njengoba abanye behlala kuleya ndawo ngaphandle kwamaphephamvume beyofuna amatoho.
“Sisizwa ukukwazi ukuqoqa imali njengoba kusezingeni lamaphesenti angama-86 okwenza njengoba singakwazi ukuphila ngemali esinayo izinyanga ezintathu uma singanenkinga yokuqoqa imali” kusho uMapholoba.
Uthe ngale kwalokho banezinhlelo eziqhubekayo zokwakha izindlu zabantu abaphila kangcono abazogcina sebezidayiselwa uMkhandlu kube ngezabo.
ElaboHlanga lingakudalula ukuthi phakathi kwezinselelo ezadala izinkinga zikagesi kuleliya dolobha ukwakhiwa kwejele elikhulu kunawo onke akuleli iBhongweni okubikwa ukuthi lidla umthamo omkhulu kagesi wedolobha.
Uthe ngaphezulu kokuthi benalezi zinkinga ababhekene nazo kodwa basewuMkhandlu ohamba phambili ngokuphathwa kwezimali esifundazweni saKwaZulu-Natal njengoba bengenaso nesincane isikhweletu sika-Eskom.
UNgqongqoshe uMthembu ukushayele ihlombe lokho wathi uhlelo lokuthuthuka kwedolobha akufanele luphazanyiswe yingakho kufanele bangenelele ngokushesha ukuze izinkinga eziphakanyiswe iMeneja zisonjululwe ngokushesha.