KWEZINYE IZINGXENYE
Indodana yesisebenzi sosizo, uSophie Petronin, owathunjwa iJihadists kuleli lizwe ngasekupheleni konyaka wezi2016 ithe ngesonto elizayo izondiza iye kuleli lizwe elisentshonalanga ne-Afrika ukuyolungiselela ukukhululwa kwakhe. UPetronin (70) kwakufanele akhululwe ngumholi weqembu eliphikisayo, uMnu uSoumalia Cisse, ngokushintshanisana ngokuthi uHulumeni waleli lizwe ukhulule abasolwa ngokuba kuleli qembu ababeboshwe ngamaphoyisa aleli lizwe. USebastian Chadaud-Petronin utshele abezindaba ukuthi ubehambela iBamako kodwa ubengakabi naso isiqiniseko esisemthethweni sokuthi unina uzokhululwa. Amadoda ayehlome ngezibhamu athumba uPetronin ngoZibandlela wezi-2016 edolobheni elisenyakatho yezwe iGao lapho ayephethe khona inhlangano eqondene nezingane ezingenabazali.
EMali:
Kuleli sonto abaholi beWest African Regional Bloc babike ukuthi lonke unswinyo olwabekwa phezu kwaleli lizwe ngemuva kokuvukelwa kombuso amasosha okwakhipha esikhundleni uMengameli uBoubacar Keita, luyasuswa noma luyehliswa. Lolu nswinyo obelukhubaza leli lizwe lususwe ngemuva kokuphakanyiswa kukaColonel uBah Ndaw osathatha umhlalaphansi njengoMengameli wesikhashana kwathi uMnu uMoctar Oune yena waqokwa njengoNdunankulu. Lo Hulumeni wezinguquko kulindelwe ukuba udonse izinyanga eziyishumi nesishiyagalombili.
Kulo leli sonto leli zwe limemezele abaholi abasha kodwa okubonakale kakhulu ukuthi izikhundla eziphezulu zinikwe noma zitholwe yizikhulu zamasosha. Okungase kube ukuhamba phezu komqulu wezepolitiki owawukhishwe ngamasosha othi izikhulu eziqokwayo uMengameli kufanele aqhamuke kuwo, kodwa lokhu kwathola ukugxekwa nokuphikiswa umfelandawonye wabagxeki bakaHulumeni waphambilini owawuhola imibhikisho eyayiqondiswe kuwo.
Abafuduki abayisi-8 bafile kwathi abali-12 baduka olwandle ngemuva kokuthi abashushumbisi bebaphoqe ukuba behle esikebheni ogwini lwaleli lizwe ngokusho kolunye uphiko lwenhlangano ye-United Nations olubhekene nabafuduki. Abafuduki ababalelwa kuma-34 abebegibele lesi sikebhe okukholwa ukuthi bonke ngabomdabu base-Ethiopia, bebezama ukubuyela emuva ngemuva kokwehluleka ukungena eYemen. Abasindile abali-14 bathole usizo lwezempilo khona kuleli lizwe ngokusho kwe-International Organization for Migration (IOM). Izinkulungwane zezisebenzi zase-Ethiopia ezisuke zifuna ukuya eSaudi Arabia ziwelela eYemen inyanga nenyanga, kepha imikhawulo ehlose ukunqanda ukusabalala kokhuvethe kuleli lizwe elihlaselwe yizimpi yenze lolu hambo lwaba yingozi enkulu lwaphinde lwaphoqa abaningi ukuba babuyele emuva.
EDjibouti: