Kukhalwa ngoHulumeni kolwabalimi abamhlophe
Mhleli
Ithini into? Ithi asilwe, asibandlululane, sikhohlwe ukwakha izwe lethu sonke. Kodwa iqiniso lithi, uma kwakhiwa izwe kabusha yonke into iqala phansi. Uma nakhela phezu kwezisekelo zabanye abantu nihlala nithwele kanzima ngoba imfihlo yabo nisuke ningayazi. Isigwebo sentambo asisona isixazululo sidinga ukubuyekezwa ngoba sizobaqeda aboHlanga ngoba inhlupheko iphezu kwethu. Imali asifikanga nayo asiyazi sazi ummbila ngakho-ke njengoba siyifuna kangaka sisazofa uma sizovele sithathe izinqumo nje. Kuzomele silungise izwe sisonke, sibhekane ngqo nezinkinga ezilikhungethe singabheke bala lamuntu, singakhethi nhlangothi, umthetho kube umthetho, kungachenywa. Kodwa lokhu kuyosidinga ukuba sakhe uHulumeni oqondile, onesibindi sokuthatha izinqumo noma kungaba liyawa irandi noma aliwi.
Ezinye izinto empilweni ziyafelwa, uyalamba, uyazondwa uzondelwa zona kodwa ekugcineni ziyalakha izwe, ziyamakha umuntu. Sisonke sizolakha leli zwe, siyadingana. Eyempi phansi, izwe leli lidinga ukubuswa njengoba sabelwe lona ukuba silibuse izizukulwane zezizukulwane.
- nguKenneth Dlamini Mhleli
Lo Hulumeni uyenzelela kwabamhlophe ngevoti laboHlanga. Sesifikile isikhathi sokuthi akhishwe. Miningi le minyaka savotela uKhongolose kepha alukho uguquko empilweni yethu.
AmaBhunu ayazenzela emapulazini nasezinkampanini ezinkulu eNingizimu Afrika.
AboHlanga uma kumele baphakame kufakwa izingane zabo. Siyaqhubeka lesi sihlava nokhondolo sokucindezelwa kwaboHlanga. Izingane zethu zihlezi emakhaya neziqu ngoba abamhlophe bengafuni ziphathe ezinkampanini. Bancamela ukufaka izingane zabo.
- nguGap Marumo Mhleli
Lesi yisikhathi sokuba abantu babone ukuthi inhlangano ephethe izwe iyabesaba abelungu uma kufe umlungu bayagijima kodwa uma benza okungalungile ababoshwa. Ziphi izinhlamvu zenjoloba, ziphi izimoto zamanzi? kukhomba ngokusobala ukuthi uHulumeni ophethe izwe uyabesaba. Khumbula i-#FessMustfall uCeketha owaboshwa ngokushisa imoto yamaphoyisa.
- nguSizwe Nzama Mhleli
Phela abantu abaqambi amanga uma bethi “nibasabani abelungu”ungabona oCele bebhoke ngomlomo bezithusela uma bephakathi kwabantu kodwa umsebenzi uyabahlula.
Abamhlophe soze wabaguqula futhi bayazitshela, abayizwa nje eyaboHlanga.
Ukuba kuya ngami ngabe izisebenzi zasemapulazini ziyateleka kuze kulungiswa izimo zazo, manje kuzolanjwa.
- nguChris Shabangu Mhleli
Cha zakhamuzi zaseNingizimu Afrika, balunge kakhulu ngalokhu abakwenzayo musani ukudlala ngoRamaphosa (angimthandi), thina sizolwa nokubulawa kobani ngoba sibulalana sodwa?
Bona balwa nokubulawa kwabalimi ngoba babulawa yithi aboHlanga bese thina sikweseke lokho ngenxa yebala. Bese lezi zigebengu ziba nequnga zibuye zijikele thina bakubo. Asilungise inkinga yethu singaboHlanga ngoba asizwani.
- nguThokoza Zibs Mhleli
Nina nidansa iJerusalema bona baziqeqeshela impi kodwa-ke ngeke sasho lutho uKhongolose. AbakuHulumeni abaphethe bantshontsha imali bazibekela ethala ukuze ithi uma isuka impi bona bebe besuthi benemali yokuyobhaca emazweni. Thina sosala sibamba khona lapha bayazi abe-ANC ukuthi usezobuya uJesu njengoba bentshontsha imali babekela ukungasokoli ngempi.
- nguMenzie Mabhelen Ntulie Mhleli
Kuya ngokuthi isimo besiqagulwe kanjani, akuyi ngebala. Naba abanye bebemba umgwaqo eMsinga zolo lokhu angibonanga neyodwa iveni yamaphoyisa. Nisalikhumbula icala lezingane zesikole eGoli okwafika ezazilovile zayoshaya eyayisesikoleni, yagwaza ezimbili kwashona eyodwa? Zacaphunana ngaphakathi amaqembu azo emigulukudu ngoba isimo sasingaqagulwanga kahle. Singasiphoqa nje lesi simo sisibhekise ohlangeni sicashisa ukuthi asinazinhloli sizihlalele.
- nguNomvikelelo Kawula Mhleli
Ababesabi kodwa bayazazi kuANC ukuthi bami ngabo, ayikho inja eluma umniniyo noma isimkhonkotha kodwa ibuya nganeno.
Yithina okumele silungise isimo sikaHulumeni ophethe, abanye bathi i-ANC mayiwe, luyeza ukhetho, ubezwa sebethi kobuya uJesu, impela uyobuya asifice sihlupheka.
Ubezwa bethi salwela le nkululeko yiphi ngoba naningekho nizwa ngendaba? Isizukulwane esizayo siyokhomba obani bangalesi sikhathi ukuthi balwa? Uma lo Hulumeni kufanele uwe akwenziwe ebhokisini lokuvota umuntu eseyedwa ngoba ngisho kungashintshwa uRamaphosa nolandelayo ulambile.
- nguZeph Sibiya Mhleli
Ngokwami ukubona nokubuka izinto indlela ezenzeka ngayo abelungu yibona abasiphethe eNingizimu Afrika. Ubuka indlela iziphathimandla ezibesaba ngayo, uHulumeni wethu omnyama uphethe ngokwepolitiki kodwa cha ngokuthi siphethe izwe. Ukona komlungu akubi yinto embi kodwa uma kone aboHlanga noHulumeni usukumela phezulu.
Sabona ngoNhlaba ngowezi-2017 emashini yabamhlophe eyayingekho emthethweni ababayethe ngeleBlack Friday, asizange siwabone amaphoyisa. Thina sibabi njalo ezweni lakithi, sibabi phesheya, sibabi umhlaba wonke siyenyanywa. Okubuhlungu kakhulu ukuthi sibabi nasendlini kwethu. Abamhlophe bona baphathiswa okwamakhosi zikhathi zonke.
Kodwa lo Hulumeni alibambe lingashoni ngoba usihlinzela ezibini. Owabamhlophe uHulumeni wawunaka bona owethu uzonda thina utotosa izitha. Abadubule phela nakumaBhunu baphi?
- nguSizwe Mazibuko Mhleli
Ngiyazi ukuthi niyongisola ngalokhu engikushoyo. AmaBhunu ayidlanzana kuleli lizwe futhi ayalithanda awafuni lutho ngalo ngoba ayawazi umnotho walo ukuthi ungakanani nokuthi linothe kanjani kuphi ngoba kade aqala ukunotha ngalo. Futhi azi nobuntekenteke bowoHlanga yingakho isikhathi esiningi eyimbumba uma kwenzeka izinto ezifana nalezi. AmaBhunu asebone konke ngobuholi boHlanga obuntengayo ayazi ukuthi ngeke baboshwe ngalesi senzo abasenzile asho kahle ukuthi amaphoyisa kwawona ayizigebengu ayehluleka ukuvikela umphakathi.
Ukuba kusuka ekuqaleni ngenkathi eqala amaBhunu edubula owoHlanga ethi abecabanga ukuthi imfene, kwaqina lapho ngabe ayikho yonke le mfishimfishi esibhekene nayo manje. Into esifuneka manje umphathi wamaphoyisa oqotho ozomela yonke inhlobo yeqiniso angachemi namuntu, ame nethimba lakhe babophe kwasani.
- nguLaduma Ndaba Mhleli
Umuntu owephula umthetho sazi ukuthi uyaboshwa. Kuthanda ukuba yinkinga lokhu kokushiswa kweveni yamaphoyisa, kwasekuqaleni ingakashiswa abekuphi amaphoyisa? SinoTatane owabulawa amaphoyisa bebhikishela ukugqoza kwentuthuko kwaphinda obaba bethu nabafwethu babulawiswa okwezinambuzane, ngemidlalo Yendebe Yomhlaba ngowezi-2010 sashaywa amaphoyisa sibanga iholo nomqashi okwakuwuStallion edlala ngathi kodwa nakhu kushiswa iveni kuze kuthwetshulwe nesithombe soyedwa wabalimi emi phezu kwayo. Kanti sikhululeka nini siyisizwe saboHlanga?
- nguMzwandile Madiya Mhleli
Ukukhala kwezinyoni kungefane lokhu kudweba isithombe emqondweni sokuthi abamhlophe badinwe kangakanani futhi banamandla angakanani ukubhekana noHulumeni uma sebengasafuni ubabuse. Asingabheki kakhulu ibala asibheke ukuthi ubaba uNdosi uyawenza yini umsebenzi awuqashelwe noma uthanda ithelevishini kuphela. Amaphoyisa akithi anakho ukubesaba abelungu ngoba kungasuka esinamathambo, abelungu banezibhamu njalo ngezimpelasonto bayazilolonga lapha ePretoria. Ngiyababona ngime ngibuze bethi balungiselela isikhathi esizayo isiseduze impi yikho beziqeqesha nezingane zabo.
- nguVumani Masondo Mhleli
UHulumeni uzobalalela ngokushesha futhi ngeke balinge bawadubule ngesisi esikhalisa unyembezi. Iqiniso lithi asilutho thina kuHulumeni wethu kubaluleke abamhlophe kuphela. Kodwa uzobabona njengoba kuza ukhetho bazongena odakeni nezinjani izicathulo lezi naphakathi nemijondolo bephethe lezi zikibha zabo bezofuna amavoti kwaboHlanga. Emva kwalokho ngekuphinde ubabone.
- nguIsrael Bonginkosi Kunene