Akubizi mali ukukhuluma iqiniso
Njengephephandaba kuningi esikubhalayo. Okunye kuyathakaselwa ngabantu kanti okunye akwehli kahle. Lezo yizintwala zomkhakha wobuntatheli. Nokho okufikiselana amahloni yilapho luthi udaba lubhaliwe, inhloso kuwukucosha ulwazi bese kuthi laba amasemandleni babone kulula ukuluphebeza. Ukuluphebeza lokhu kusuka ekukhetheni ukungaphenduli imibuzo ngesikhathi noma ukusasazela iphephandaba ngabameli.
Yile mihlola-ke esiyigilwe uMasipala waseMtubatuba. Lo Masipala osezindaweni zasemakhaya akukho ukungabaza ukuthi udinga yonke imali onayo ukuba ulungise ingqalasizinda noma uhambise izidingo kubantu kepha cha. Kulokhu unqume ukuthatha kuleyo mali ukhokhele abameli ukuthi kabavimbe udaba. Namuhla sikhethe ukushicilela konke ukubhalelana kwethu neMeneja uNtuli ngenhloso yokuveza okuthile okumqoka.
Imibuzo yonke ebithunyelwe iMeneja ibingeyona imfihlo. Uze wanikwa nobufakazi ukuze angazihluphi ngokudlinza konke lokhu kwenziwa mahhala. Esikhundleni sokuthi naye anikeze izimpendulo mahhala, ulande abameli ukuba bavimbe iqiniso. Lona umkhuba osuvamile kulabo ababanjiswe izimali zethu bakhokhintela ukuba ngoba umuntu kungeke kuthathwe emalini yakhe kube lula nje ukuthi azavune le eyethu aqashe abameli.
Omunye angazibuza ukuthi yini ebihlula isisebenzi somkhandlu ukuba siphendule imibuzo eqondene nomkhandlu. Nathi sizibuza lokho ngoba nanamuhla akasho uMeneja ukuthi kulokhu obekubuzwa iphephandaba lonephi, kunalokho usijezisela ukuthi lolo lwazi siluthathephi. Okunye okumangazayo wukungaphenduli kweMeneja umbuzo olula nje ekutheni kuzo kuthathwe abameli baseThekwini akusekho yini abendawo, bona kanti kumele bahwebe kuphi?
Singeke siwemuke uMkhandlu ilungelo lawo lokuya enkantolo ngoba nathi sizobe sikhona. Esingeke sikunanaze nokho wukubuza nokukhuleka ukuthi phela abasiyisa enkantolo abakhokhe emaphaketheni abo. Okunye esingeke sikumele wukusatshiswa ngezinkantolo. Yikho nje sizoqhubeka siwubuze lo Masipala neminye uma kukhona okumele baphendule kukho.