Siyotakulwa kuze kube yinini?
Ukutshela izakhamuzi iqiniso ngesimomnotho okuyosiweza siyeke ukuba ngokhangezile nsukuzaphuma
UHulumeni ungumzali kithi sonke. Nguye osibonelela kokuningi. Nokho kungaliphutha ukuba kwamukeleke ukuthi lo mzali onguHulumeni sekuyoba nguye osifukula nsukuzaphuma ungunaphakade.
Iqiniso lithi noma ngabe uyathanda ukwenza njalo ngeke akwazi ngoba phela nayo leyo mali uHulumeni kumele ayithathe kithi. Uma thina mphakathi singenawo amandla omnotho ngeke kunyakaze lutho. Eminyakeni engama-26 eyedlule lo Hulumeni usithwale ezintweni eziningi.
Kusuka ezimpeshenini zokukhula nalezo zesibonelelo. Usithwale lapho enzela abantu izindlu kokunye abantu abangabongi ngoba ubenzela namuhla kusasa bavuke sebeqashise ngayo indlu leyo. Ngenxa yomlando wethu uHulumeni uhlelembele ukuba singene kwezamabhizinisi nayilapho elungise inqubomgomo yezamabhizinisi ebiqinisekisa ukuthi labo ababe cindezelwe bayangena. Zolo lokhu uhambe wayoboleka imali phesheya ethi wenzela ukuthi thina singazitholi sesigubuzelwe wukhuvethe.
Nokho umbuzo omqoka ngothi kuyoze kube nini kwenzeka lokhu. Kuyoze kube nini sitakulwa. Khona lo mzali osibeletha kukho konke uyokwazi ukwenza lokhu kuze kube yinini? Izimpendulo kule mibuzo zimqoka ngoba yizo ezingaletha inqubomgomo engcono. Ngeshwa lena esisayinikwa nguMengameli uRamaphosa kanye noHulumeni wakhe ungeke uthi iletha isixazululo esingunaphakade. Zehluleka ngisho ukuqondana nemiklamo yakhe uHulumeni azibekele yona.
Uzothi omunye ngabe yini pho okumele yenzeke? Umbono wethu uthi okuyosikhulula lapha yiqiniso. Yiqiniso lapho abaholi bethu bevezela isizwe izingqinamba esibhekene nazo. Yiqiniso elizosho ukuthi isimo esikuso singahle siphoqe ukuthi senze isizukulwane esithize njengalesi sethu umnikelo ukuze esizayo singaphinde siphile le mpilo. Lokhu kungethusa kepha amazwe asimeme enza njalo, azincisha okuthile ukuze kuphakame okuthile.
Nokho ukhiye usekuthembaneni kwabaholi nomphakathi ngoba angeke kulunge uma kuthiwa akube ngabantu abazincisha okuthile kepha abaholi bona kubonakale beqhubeka nempilo ethize. Ngakho uHulumeni kumele achithe isikhathi esiningi edala ukuzwana, ukuthembana phakathi kwakhe nezakhamuzi. Okuyothi uma lokho sekwenzekile bese ekwazi ukukhuluma amaqiniso ababayo ngomnotho wethu. Asikho esinye isikhathi esedlula lesi esikuso ukuthi lokhu kwenzeke.