Ugwetshwe iminyaka emihlanu owahlukumeza izingane enkulisa
Nakuba kunezikhalo ngesigwebo esinikwe owesifazane owayesebenza njengonakekela izingane eNinnies Neurons Nursery School eCarletonville, obesolwa ngokushaya izingane kule nkulisa kepha kucacile ukuthi izinkantolo zakuleli azikuthathi kalula ukuhlukunyezwa kwezingane.
UNks uNellie Senwametsi (42) okwavela amavidiyo amathathu ngoMbasa wezi-2019 eshaya izingane ngesihluku, ngoLwesibili mhla zili-13 kuMfumfu wezi-2020 ugwetshwe iminyaka emihlanu ejele ngamacala okushaya nokushaya ngenhloso yokulimaza.
Ukusabalala kwala mavidiyo kwasusa umsindo omkhulu izinhlangano ezilwela amalungelo ezingane nomphakathi befuna ukuthi lona wesifazane ajeziswe kanzima ngesenzo sakhe.
UNks uSenwametsi walahlwa yicala mhla ziyisi-7 kuNtulikazi wezi-2020 kwase kubekwa usuku lomhla zili-13 Mfumfu ukuba kukhishwe isigwebo.
Ikhipha isigwebo iMantshi uJan Steyn eNkantolo kaMantshi e-Oberholzer, ithe uNks uSenwametsi akakulungele ukusebenza ngezingane futhi igama lakhe lizofakwa ohlwini lwabanamacala athinta izingane.
IMantshi uSteyn igudlukile esigwebeni esibekiwe seminyaka eyishumi ngesizathu sokuthi uNks uSenwametsi ube nokuzisola futhi ubehlose ukuxolisa emindenini kodwa engakwazi ukuhlangana nayo ngenxa yemibandela yebheyili yakhe.
Inkantolo izwe ukuthi enye yezingane eyahlukunyezwa isiphenduke uhlupho futhi isinendluzula.
Lokhu kudalulwe uMshushisi uJuliette Makgwatha okhulume ngombiko womphumela walesi sigameko obefuna ukuba uNks uSenwametsi aphonswe ejele.
Uveze ukuthi enye yalezi zingane ngaphambi kwalesi sigameko ibifundisiwe ukuthi isebenzise isitsha sokuzikhulula kodwa manje isiyazichamela. Uthe uthisha wayo uveze ukuthi isiwuhlupho futhi isihlukumeza ezinye izingane. Uthe isimo salezi zingane asisesihle kanti abazali bazo sekufanele basebenze kanzima ukubhekana nengcindezi edalwe yilesi sigameko.
Emuva kokukhishwa kwalesi sigwebo inhlangano iWomen and Men Against Child Abuse ithe sehlulekile ukuthumela umyalezo oqinile kubantu abahlukumeza izingane.
Ithe uNks uSenwametsi bekufanele athole isigwebo esingekho ngaphansi kweminyaka ebekiwe eli-10 yathi lesi sibe wuswazi oluncane.
“Umthetho ucacile ukuthi umuntu ohlukumeza ingane kufanele athole isigwebo seminyaka eli-10. Ngakho-ke thina njengenhlangano futhi esibone abazali, ezobulungiswa zisenzele phansi,” kukhala le nhlangano ebilibheke ngolokhozi leli cala kusukela liqala ukuqulwa igcizelela nokuthi ukuhlukumezeka okwenzeke ezinganeni kuzoba nomthelela wesikhathi eside emphefumulweni nasengqondweni yazo.
- nguSabelo Mbatha