Kuyamanela uMasiphula kaMamba wakwaNtshangase
Lokho kwenziwa amabutho kaZulu ayelapho awaze ethuka kwazise ayetsheliwe. Ngemuva kwalokho uShepstone naye wathi uZulu katshengise ayekwenza ngokwesiko lesiZulu. Amabutho ngomyalelo kaMasiphula ashaya ingomane. Amahhashi ethuka adlubulundela awisa abagibeli agqabula amatomu, naye uShepstone wethuka kakhulu yize ayebonile ukuthi uZulu wawungahlomile ngemikhonto. Wafunga wagomela ukuthi naye wayezoletha izinsizwa zakubo.
Ingakashaywa ingomane oMnyamana, uHhamu noMavumengwana Ntuli babephikisene nezwi likaCetshwayo. Kwasuka ingxabano-ke emva kokuba amahhashi ethukile uMnyamana ethi uMasiphula wabe esekhathele ukubusa izwe nakhu ethukuthelisa abelungu.
Kulokhu wayesekwa nguHhamu kaMpande kakhulu uMnyamana. Kwasukwa-ke kwaphikelelwa kwaNodwengu lapho uShepstone wahamba engasahlatshisawanga njengesiko. Wagcina enikwe izinkomo njengesipho. Ebusuku uMasiphula waphuza utshwala ayebunikwe nguMnyamana wafa khona lapho. ISilo uCetshwayo saya kwaGqikazi ezangomeni zanuka uMnyamana kodwa kwangenziwa lutho ngoba kwakuyizikhulu oMnyamana noHhamu. Wafa kanjalo-ke uMasiphula ngowe-1873, ngokufakelwa ubuthi otshwaleni. Akuzange kusetshenzwe ilanga lonke kuzilelwe ukufa kukaMasiphula. Uma kukhethwa esizweni sakwaButhelezi kwakuhutshwa leli hubo elilandelayo:
Amadoda: Bayakwazi loku ukuthi sasinikezwe ukuvikelela endulo! Abesifazane: Ngihlale egcekeni noma indawo endulo yayingeyobaba; manje sihlala emnyango.
Kwathi uma iNgonyama uMpande izwa ngalelo hubo, yathukuthela yabuza ukuthi ngubani othi uMnyamana uhlala emnyango? Yabuza ukuthi ngubani endlunkulu owayehlaliswa emsamo. Yanquma ukuthi lelo hubo lingaphindi lihutshwe. Ngakho-ke kuyacaca ukuthi kwakukhona ukungaboni ngasolinye phakathi kukaMnyamana noMasiphula kaMamba Ntshangase owayenguNdunankulu, abakwaButhelezi bethi yibona ababebakhulu kusukela endulo.
Esehambile emhlabeni walandelwa yindlalifa yakhe uZikode okubutho lakhe kwakunguMxhapho. Nokho inkosana kwakufanele kube nguMajumba okubutho lakhe kwakunguMthuyisazwe kodwa lokho akwenzekanga ngoba unina wayenqabile ukuyohlala ekhabo Masiphula ukuze ahlale nonina. Unina uZikode yena wavuma ukwenza lokho. Kuthe ngemuva kokushona kukaMasiphula ngowe-1873 kwaqubuka umbango phakathi kukaZikode noMajumba mayelana nobukhosana. INgonyama uCetshwayo yawunqamula ngokuchaza ukuthi ngunina kaMajumba owenza ukuba indodana yakhe ilahlekelwe ubundlalifa ngokwenqaba ukuyohlala nonina kaMasiphula. Ngakho-ke kwakufanele ubundlalifa bube ngobukaZikode unina wakhe owavuma ukuyohlala nonina kaMasiphula. Zasala izibongo zikaMasiphula kwaba yizona ezisitshela ngaye:
UBhubhu yandaba, namuhla kungendaba! [kushiwo ehashwa uma egiya enza umsindo ofana nowenyoni ishaya amaphiko ibhajiwe] uMdilimba wendlwengula. [indima enkulu, njengokulima insimu enkulu] uMahamule kaMlomo! uMahamule kangitshelanga ngibaleke;
Nami bengizobaleka.
uNomandindi wemilambo [undinda Emfuleni, uhamb’ ezula ngakhona], uNkomo zava’ imzil’ emdala Ukudla kunamndla kunamaHemulekazi. Ngoba zavus’ eyakwaMagonondo, Zavus’ ekaNdungunya noSomhlola [aMakhosi aseSwazini]. uNkomo kazidlelani nezakwaMathe. Oze noMgidla, ezalwa uSobhuz’, eSwazini; Weza noThekwane ezalwa uSobhuz’, eSwazini;
Weza noMalambule’, ezalwa uSobhuz’, eSwazini.
Ubudlelwano nezwe laseSwazini
Imingcele phakathi kwezwe laseSwazini nelakwaZulu idwetshwe yizwe laseEngland ngowe-1894. Ingakadwetshwa izwe laseSwazini belixhumene kakhulu nelakwaZulu. Isibonelo salokhu ngesokuthi izibongo zikaNdungunya iNkosi yaseSwazini ezala uSomhlola/Sobhuza I zingolimi lwesiZulu azibhaliwe ngolimi lwesiSwati. Ngakho-ke ngisho iSilo uShaka sihlanganisa amaZulu asizange siwahlasele amaSwazi. NguSomhlola owaganisela iSilo uShaka enye yamadodakazi akhe eqinisa ubudlelwano phakathi kwezwe laseSwazini nobukhosi bakwaZulu.
Imbangela yokuthi amaSwazi ahlasele iSilo uDingane ngenkathi sibhace kwaNyawo ngowe-1840 ukuthi amaSwazi ayenesivumelwano namaBhunu sokubambisana. Ngakho-ke amaBhunu abonisana nawo amaSwazi ukuthi ahlasele iSilo uDingane eziphindiselela ngokubulawa kukaPiet Retief nabahlaseli bamaBhunu ngowe-1838 eMgungundlovu. Ngakho-ke ngamaSwazi aciba iNgonyama uDingane ngemikhonto ebusuku kwaNyawo amabutho ayo engekho. Yopha kwaze kwasa yakhothama.
Kuthe sekubusa iNgonyama uMpande [1840-1872] kwaba nezimpi ezahlasela izwe laseSwazini njengonyaka yangowe-1852 lapho uMntwana uCetshwayo walwa ngobuqhawe.
Lo mlando ucashunwe encwadini: Izizwe ZaMakhosi AkwaZulu, Umqulu 3. Ukuthola le ncwadi enothe ngomlando wezizwe ungabhalela uSolwazi uMaphalala kule email: maphalala04@ gmail.com; noma ushayele kulezi zinombolo: 082 730 5782 noma ku-083 548 1918.