Ngabe wena uyisimila sini ziningi zingaka?
Abelaphi ngabanye babantu ababekwe njengabavikeli bezihlahla eziyimpilo kithi
Ngesonto eledlule sikhulume kabanzi ngokuxhumana phakathi kwaboHlanga kanye nemvelo. Sithe thina sixhumene nezilwane. Senza nezibonelo ngezibongo ezithize lapha kubeNguni, sikhulume ngoNkomo, oMfene bakhona noDube. Ngifisa ukuvala leso sigaba ngokwenza esinye isibonelo ngolwazi lwethu lwezilwane kanye nokuxhumana nathi nazo.
Lapha kubeNguni bakaZulu loyo oyiNkosana yesizwe ubizwa ngesilwane, kuthiwa yiSILO noma yiMbube. Kukhona okwakuthi uma bebizwa yiNyosi eleNdlovu, eleNyathi nelikaBhejane. Lokho kumqoka ngoba kusondeza iSihlalo nemvelo eyizilwane.
Namuhla ngifisa ukukhuluma ngezimila nokuxhumana kwethu nazo. Empeleni lokhu akwehlukile kunokwezilwane. Ezibongweni (khumbula ukuthi zisuka emagameni abantu nokuthile) kukhona kokubili, isilwane kanye nesimila esithile. Nokho okwethu kuze kujule ngoba umuntu nje ongumAfrika izihlahla nemvelo jikelele ukwenza kube umsebenzi wakhe ukuba ayivikele.
Lapha phakathi kwethu kukhona ababizwa ngokuthi ngabalaphi bomdabu, mina engithi ngabalaphi, kwaphela.
Laba okungaba zinyanga
(engithi zifana nosokhemisi) nezangoma babekwa ukuba babe ngabavikeli bezihlahla. Shiya nje ukuthi sekwaba khona ubudlabha ekongeni izihlahla lezi kepha uhambo lwabo lokuchazelwa ngobizo lwabo lwedlula ekwazini ngezihlanhla nomsebenzi wazo.
Lesi yisipho esiyingqayizivele ngoba kokunye sifika kumuntu elele noma kunkenteze okuthile kuye bese eba nolwazi. Yilolu lwazi olwenza kuphile abantu. Lapha sifundiswa ukuxhumana nemvelo nabantu, lapho uMama (okuyimvelo) esihlizeka ngezimpendulo ezifweni esinazo.
Ngiyafisa ukuqinisekisa ukuthi ezihlahleni ezikhona asikho isifo esingelapheke ngoba nalezi okuthiwa kazelapheki yingoba asikambulelwa isihlahla okuyiso. Angingabazi ukuthi impendulo yethu kuzo zonke izifo nezingalapheki ikuzo izihlahla lezi.
Okubi-ke ngezihlahla nezimila wukuthi ziyezwela. Ingani ziyakwazi ukushabalala uma kunobudedengu. Yikho kumele njengabantu siqonde ngazo kanjalo nobudlelwano bethu nazo. Samukele ukuthi kokunye siwutho ngazo, ngakho ukushabalala kwazo kungasho ukuphela kwethu.