Uselificile sekusele alephule elikaSchumacher uHamilton
ULewis Hamilton ongumshayeli wezimoto zakwaMercedes ngaphansi komjaho wezimoto iFormula One (F1), uthi yize bemkhuluma kabi kukhona nabamcwasayo usazoqhubeka nokuzibekela amarekhodi kulo mdlalo.
Le ngqungqulu ikusho lokhu emva kokunqoba umqhudelwano we-Eifel Grand Prix obungeSonto.
Ukunqoba kwakhe kwenze walinganisa irekhodi lokunqoba imiqhudelwano engama-91 elabekwa umshayeli odabuka eGermany uMichael Schumacher.
“Kuyona yonke iminxa yezemidlalo kunezinkulumo ezihlezi zokuthi ubani omkhulu kunomunye. Konke lokho akusho lutho kumina, okumele ngikwenze ukuqhubeka nohambo lwami oluwukuthi ngihlezi ngiphezulu nginqobe izicoco. Singabantu asizose safana, laba abathi yize ngiphule irekhodi likaSchumacher angisoze ngafana naye kungokwabo lokho asisoze safana vele singabantu,” kusho uHamilton.
UJack Stewart owaba ngumpetha womhlaba kathathu ungomunye wabantu abakhombise ukungayenameli impumelelo kaHamilton.
Ngeledlule uthe: “UHamilton noma kuthiwa uyawaphula amarekhodi kaSchumacher kodwa ngokwami akayena umshayeli omkhulu. Akekho ngisho kwabathathu ekhanda lami.”
UHamilton uthe: “Ngelinye ilanga mhlawumbe bayodlula kukhona (esho labo abahlezi bemgxeka). Ngizihlonipha kakhulu izingwazi zalo mdlalo ngisho lezi ezihlezi zingikhuluma kabi. Imisebenzi yabo ngiyihlonipha kakhulu njengoba bona bakwazi ukunqoba ezikhathini ezinzima. Ngizihlonipha kakhulu izinganekwane ezedlule ngisho nalezo eziqhubeka nokukhuluma kabi ngami ngaso sonke isikhathi. Ngisazibheka kakhulu ngoba ngiyazi ukuthi bekuyisikhathi esehlukile emlandweni. Bekunzima ngendlela emangalisayo.
Uma ngibuka indlela okwakuyiyona ukuncintisana kwakukukhulu kakhulu. Iminyaka engama-20 edlule kuze kube yimanje angeke neze wayiqhathanisa.”
Uqhube wathi: “Kunabashayeli abafana noMax (Verstappen) noma ngabe omunye abanesifiso sokuphula irekhodi engizogcina ngilibekile. Lokho bazokwenza kanjani uma kukhona konke engikukhulumayo ngikhombisa ukungayithakaseli impumelelo yabo. Abantu abakulandelayo kumele ubakhuthaze ngaso sonke isikhathi nokuyinto enhle.”
USterwart uphinde wakhuluma ngoLwesithathu nalapho ethe ubengaqondile ukumphoxa uHamilton.
“UHamilton ungumshayeli ohamba phambili kulesi sikhathi samanje. Njengoba ngineminyaka yobudala engama-81, isikhathi sami sesadlula anginalo ilungelo lokugxeka abashayeli. Ngiphoxekile ngokuthi ucabanga kanjalo, yini engizoyizuza uma sengimgxekile okanye ngamcwasa. Ngabuzwa ukuthi ngabe uHamilton ungumshayeli ohamba phambili kwabakhona, impendulo yami yathi kunzima kakhulu ukusho lokho ngoba engibabona behamba phambili uJuan Manuel Fangio, uJim Clark kanye noSchumacher,” kusho uSterwart.
UHamilton kulo nyaka kubukeka ezoliphula irekhodi lokuba ngumpetha womhlaba. Irekhodi elihlezi elikaSchumacher lokuba ngumpetha kayisi-7, wanqoba ngonyaka we-1994, 1995, ngowezi-2000 kuya kunyaka wezi2004. Yena usebe ngumpetha womhlaba kayisi-6 ngonyaka wezi-2008, 2014, 2015, 2017, 2018 nangonyaka wezi-2019.
Kuyimanje uyena ohamba phambili kulo nyaka ngamaphuzu ama205, alandelwe uzakwabo ashayela naye kwaMercedes uValterri Bottas ngamaphuzu ali-161. Ezimotweni iMercedes iyona ehamba phambili ngamaphuzu ama-366, ilandelwe iRed Bull yona enali-192.
Kusele imijaho emihlanu ngaphambi kokuthi kusongwe isizini yakulo nyaka. Esele iPortugesse Grand Prix, i-Emilia Romagna Grand Prix, iTurkish Grand Prix, iSakhir Grand Prix ne-Abu Dhabi Grand Prix ezokuba mhla zili-13 kuZibandlela.