Awembudlu afuna ukuzikhotha amanxeba
Amasonto amathathu edlule abe nganzima emaqenjini abizwa ngamakhulu e-England njengoba emidlalweni ahlulwe kuyona engenelwe inqwaba yamagoli.
Kwaqala iManchester City yehlulwa iLeicester City ngamagoli amahlanu kwamabili, kwaba iManchester United yehlulwa iTottenham Hotspur ngayisi-6 kwelilodwa.
Mhla zizine kwephezulu kuthe kusabatshazwa lokho, kwabe sekubhaxabulwa iLiverpool FC engompetha beligi i-English Premier League (EPL) yi-Aston Villa ngamagoli ayisi-7 kwamabili.
Lezi zingqungqulu zizobuyela enkundleni kusasa ngoMgqibelo ziyolungisa amaphutha eziwenzile.
Umdlalo wokuqala ozoba phakathi kwe-Everton FC neLiverpool FC uzoqala ngele-13:30 ntambama.
Kulo mdlalo kuzoba izinkani zababili ngoba i-Everton FC ibukeka ingagayelwa mphako kule sizini. Emidlalweni yayo emine iyinqobe yonke, kuyimanje ihlezi esicongweni kulogi.
I-Everton FC eteketiswa ngokuthi iThe Toffees, izoya kulo mdlalo igabe ngomgadli wayo uDominic Calvert-Lewin ongalibheki ipali njengoba emidlalweni emine eseqobele phakathi amagoli ayisi-6. Namagalelo omqeqeshi uCarlo Ancelotti asebenza kakhulu muva nje.
Lo mqeqeshi uthe: “Abadlali banokuzithemba okukhulu, lokho kwenziwa imiphumela yethu yakamumva. Sizobhekana neqembu elikhulu futhi elingenzanga kahle emdlalweni walo wokugcina. ILiverpool inabadlali kanye nomqeqeshi abasezingeni eliphezulu. Yize konke lokho sikuhlonipha kodwa ngeke sifune isihlule, sifisa ukuqhubeka nokuthola amaphuzu aphelele.”
U-Ancelloti usanda kuqokwa njengomqeqeshi ovelele kuMandulo, uCalvert-Lewin yena waqokwa njengomdlali ovelele.
ILiverpool FC izoya kulo mdlalo iqinile njengoba kubuye abadlali bayo ababili abamqoka okuwuSadio Mane noThiago Alcantara. Laba badlali bebengadlali ngenxa yokuthi kwatholakala ukuthi banokhuvethe.
Umdlali ongeke abonakale uNaby Keita okuvele ngoLwesithathu ukuthi naye limuhaqile leli gciwane. Lokho kwenzeke kade izwe lakhe iGuinea libhekene neCape Verde kowobungani.
Kuzolandela iMan City ezotholana phezulu ne-Arsenal FC emdlalweni ozoqala libumbene elesi-6 kusihlwa. Lo mdlalo uzokuba ngomnandi kakhulu njengoba emdlalweni wokugcina etholene kwaba ngowandulela owamanqamu eFA Cup, nalapho kwagcina kunqobe khona i-Arsenal ngamagoli amabili eqandeni.
ICity eyiqale ngesizotha isizini izofuna ukuziphindiselela, iphinde iqhubeke nokufuna ukugcina irekhodi lokungahlulwa ekhaya. Okulindelekile kulo mdlalo ukubonakala okokuqala kukaThomas Partey ogijimela i-Arsenal osayiniswe esuka ku-Atletico Madrid yaseSpain. Ekhuluma nabezindaba uPartey uthe: “Ngifike eqenjini lapho wonke umuntu enenhloso eyodwa okuwukunqoba izicoco. Lokho kuchaza ukuthi angijoyinanga iqembu elingangifanele kwazise nami isona sifiso sami leso ukunqoba izicoco. Ngizimisele kakhulu ukusiza i-Arsenal, ngizimisele ukuba senkundleni emdlalweni wethu neMan City kodwa lokho kulele kumqeqeshi uMikel Arteta ukuthi ubona kungifanele yini ukudlala.”
Umdlalo okuyiwo ozovala oweNewcastle United neMan United ozoqala ngele-21:00 kusihlwa. Yize iMan United (iRed Devils) iqede isizini edlule ibalwa namaqembu amane aphezulu, okuyenza idlale i-UEFA Champions League kodwa ayenzi neze kahle. Okuwubufakazi balokho emidlalweni emithathu ingenelwe amagoli ali-11 yashaya amane, ihlulwe kabili yanqoba kanye.