Yethulwa kusasa ehlose ukuvundulula abasubathi beqophelo
Ihlose ukufukula abasubathi basezindaweni zasemakhaya ikilabhu yokusubatha yaKwaZulu-Natal ezokwethulwa ngokusemthethweni kule mpelasonto.
I-Xcel Running Club izokwethulwa kusasa ngoMgqibelo eSica’s Guest House ngaseWestridge Tennis Court, eThekwni, kusukela ngele-10 ekuseni. Le kilabhu isungulwe uMandla Mngomezulu noSibusiso Cele abebeku-Ethekwini Athletics Club (ECC). Uhlaka lwabagijima abaphezulu bazobe beqeqeshwa uXolani Mabhida kuthi abancane baqeqeshwe uSiyabonga Nkonde.
UMabhida odabuka KwaMathandubisi eHowick akadingi ukuchazwa kakhulu njengoba engumqeqeshi ohamba phambili kwezokusubatha. Uzakhele igama enqoba kathathu umqhudelwano waminyaka yonke, iComrades Marathon, eqeqesha uBongumusa Mthembu. Uneziqu zeSports Science azithole e-University of Pretoria kanti useke wafunda naseParis-Sorbonne University, eFrance.
UNkonde yena akanawo amagalelo atheni kwezokuqeqesha kodwa uthando analo ngalo mdlalo yilo oluzokwenza akwazi ukuvundulula ikhono. Ngonyaka wezi-2018 waphuma endaweni yesihlanu emqhudelwaneni iMandela Marathon, waba ngowokuqala walapha eNingizimu Afrika ukushaya intambo.
ElaboHlanga likhuluma noMngomezulu uthe le kilabu sekuphele izinyanga ikhona kodwa ima bezoyithula ngokusemthethweni kusasa.
“Inhloso yethu ngale kilabhu ukuthuthukisa lo mdlalo, sivundulule amakhono ezindaweni zasemakhaya. Kulezi zindawo sibala uMhlabuyalinga nakoMkhanyakude ukusho ezimbalwa. Kubuhlungu ukubona ingane ithi inekhono kodwa ingakwazi ukuliveza ngenxa yokungabi nezinsiza,” kusho uMngomezulu.
Eqhuba uMngomezulu odabuka eNgwavuma kodwa ngenxa yomsebenzi osezinze eThekwini uthe: “Njengoba igama lekilabhu lithi eXcel silifinyeze kwelithi excellent okusho ukuphumelela, ingoba abasubathi bethu sifuna bephumelele hhayi ngokusubatha kuphela kodwa nasezintweni zangaphandle. Ingakho sizobafundisa ngamanye amakhono, sizobafaka ezikoleni ezingamakolishi. Ingakho sizoba nosomabhizinisi abaningi esizosebenzisana nabo ukuze sifeze amaphupho ethu.”
Kubasubathi abazoba yingxenye yalekilabu uThobile noBathobile Mkhize kanye noSibusiso Kubheka odabuka eMpumalanga ukubala abambalwa.
ElaboHlanga liphinde lakhuluma noMabhida ukuzwa ngemizwa yakhe ngokuvulwa kwale kilabhu.
“Kuyintokozo ukuthi ngibe yingxenye yale kilabhu engikholwa ukuthi izozenzela elikhulu igama lapha eNingizimu Afrika. Njengoba igama lami laziwa bekuba nzima ukusebenza nabasubathi ngoba bebeqhamuka kumakilabhu ahlukahlukene. Manje njengoba isikhona ikilabhu engisebenza kuyona izinto zizoba lula kakhulu,” kusho uMabhida.
Mayelana nokuhlale enamaqhinga okugijima uMabhida uthe: “Ngesikhathi ngiqala ukuqeqesha ngafunda izincwadi eziningi zalo mdlalo. Engakuthola ukuthi zikhuluma nabasubathi abakhule kahle nangoqeqesho lwezinga eliphezulu. Azikhulumi ngomsubathi wasemakhaya okhule ezidlela noma yini. Ngabe sengizenzela olwami ucwaningo ngaluhlanganisa nolwalezi zincwadi. Ngiwuhlobo olungathathi noma yini. Ngiyalucwaningisisa ulwazi engilutholayo, kanginandaba noma lungabhalwa ubani.”
Ngasekuzuzile ekubeni engakahlanganisi ngisho iminyaka yobudala engama-30 uthe: “Kuyangijabulisa lokhu ngoba kuzogqugquzela intsha yakithi ukusukuma izenzele okwayo kungakhathalekile ukuthi ineminyaka yobudala engakanani. NoJesu wabhadanywa efundisa izintshebe ekubeni wayemncane ngendlela exakile.”
Esonga uthe: “Ngizolukhipha lonke ulwazi enginalo kule kilabu. Abantu abalindele okuhle kodwa ngoba kuningi engikuphethe emgodleni wami.”
Lo mqeqeshi uthe ngoLwezi nonyaka uzothula ngokusemthethweni iMabhida Coaching Service (MCS) ezobe isiza abasubathi ngolwazi olunzulu ngalo mdlalo.