UTHEMBISA ISIKHATHI ESINGCONO UNKOSIKHONA KOWASEKAPA
Kusaphele iminyaka eyisithupha kuphela, kodwa uNkosikhona “Caster” Mhlakwane (27) odabuka KwaMathandubisi, eHowick usengomunye wabasubathi abahamba phambili eNingizimu Afrika.
Ngakho ukuzimisela, esikhondlakhondleni sekilabhu agijima ngaphansi kwayo iMaxed Elite ayijoyne ngo-2018 usefakwe ohlwini lwabasubathi bezinga eliphezulu.
Ukuzimisela kwale nsizwa eyenza unyaka wokugcina weziqu zobuthishela eNyuvesi yaKwaZulu-Natal sekumvulele amathuba okuthi kube uyena yedwa kuleli ozomela iMaxed Elite kuSanlam Cape Town Virtual Marathon ezoqala ngehora lesi-6 ekuseni.
Ngenxa yokuvika ukhuvethe, kulo nyaka lo mjaho okuwuwona wodwa ezwenikazi i-Afrika ongaphansi kweWorld Marathon Gold Label uzogijinywa ngamaqoqo amathathu ezifundazweni ezahlukene. Kuzoba khona eliseCape Town, eWestern Cape, ePochfstroom, eNorth West nasePitoli, eGauteng.
Kusukela ngelesithupha kuya ku-9:30, iSouth African Broadcasting Corporation (SABC) 2 izobonisa bukhoma le mijaho.
Ngokwemiklomelo, kuzoba khona eyabazonqoba ngokuhlukana kuzifundazwe bese kuba khona yabanqobe sekuhlanganiswe zonke. Akuzugijima noma yimuphi umsubathi lapha kodwa kuza abathole izimemo zekhethelo.
Kuleli khethelo labahleli balo mjaho kuyathokozisa ukubona sisiningi isibalo sabaKwaZulu-Natal. Kwabesifazane khona uSanelisiwe “Lion King” Mbanjwa weNedbank Running Club, uNtokozo Mkhize (Arthur Ford AC) noJenner Challenor (Murray & Roberts). Kwabesilisa wuye uMhlakwana ocijwa inkakha uProdigal Khumalo naye ogijimela iMaxed Elite, inkunzimalanga uBongumusa Mthembu (Arthur Ford), uMsawenkosi Mthalane noThobabi Chagwe be-Ensika AC.
Zonke lezi zinyamazane zizoshukana ebangeni lama-42.2km, eGreen Point, eCape Town. UMhlakwana ogile izimanga nyakenye ephuma indawo ye-11 kuComrades Marathon ekubeni ebeqala ukuyigijima, utshele elaboHlanga ukuthi sekuyoshiyana ukwenza eCape Town, amalungiselelo akhe ahambe kahle kakhulu.
Le nsizwa ephethe irekhodi le Deloitte Challenge KZN, lesikhathi esingamahora awu-2:20, iveze ukuthi imenywe emjahweni wangeSonto ngenxa yesikhathi sama-2:18:40 eyasenza kuwo nyakenye.
“Ngiyilungiselele ngokugculisayo iCape Town Virtual Marathon, kangisafuni ukukhala ngeCovid-19, impilo kumele iqhubeke. Izicubu zami zomzimba ziphumule ngokwanele. Kanginasiqiniseko sokuthi ngizophuma kuyiphi indawo, kodwa ngifuna ukwenza isikhathi esingcono kunesanyakenye. Ngingajabula kakhulu uma ngingenza esamahora amabili nemizuzu eyi-15. Lokhu kuyongibeka ethubeni labangase badle umhlanganiso,” kubeka uMhlakwana onqobe neZululand Ultra Marathon nyakenye.
Mayelana nokuqhathwa ndawonye kwezinkunzi zaKwaZulu-Natal, eCape Town, le nsizwa ephuma esandleni somqeqeshi uXolani Mabhida ithe: “Akukho esingakwenza, nokho bengingajabula ukube besigcwele kuzona zontathu izifundazwe. Ubani owaziyo, mhlawumbe bekunganqoba thina kozona zonke. Akusenani, ngiziduduza ngokuthi maningi amathuba okuthi kube khona owakithi ozonqoba eCape Town njengoba sigcwele khona. Eish, kuzobe kushubile. Ngiqhathwe nabantu abanzima okungoMthembu, uChagwe noMthalane. Labantu banesipiliyoni esiyisimanga. Nakuba kunjalo ngizolwa kunqamuke izinyawo”.
UMhlakwana ubonge kakhulu abamsekayo. “Kangazi ukuthi bengingaba yini ngaphandle kwabaqeqeshi bami uProdigal Khumalo noCraig George , uRoss Walters imenenja yami. UMartin Ngwenya imenenja yekilabhu, uJohn McGrath umqeqeshi wami wengqondo oseCape Town nowemisipha oseThekwini, uShamim Khan. Ngeke ngiyishiye ngaphandle iPrime Human Perfomance Institute engiziqeqeha kuyo eMoses Mabhida Stadium nabaxhasi iSziolsSA okuyinkampani yezibuko nenye enginika imishanguzo i-32Gi neThreshholdSA”.
Eminye imijaho agile izimanga kuyo uMhlakwana oqede umatikuletsheni ngo-2013, e-Injoloba High School, khona eHowick, yiHeroes Marathon, iMossel Bay, iJl Dube, iDeliotte ebangeni lama21.1km, iHillcrest 21km Marathon ukusho embalwa.
Sisekuzo ezokugijima, ngalo iSonto, Ama-Ravens AC ahlela iMgiks Training Run okuwumjaho wokuziqeqesha kwabasubathi baKwaZulu-Natal ozosuka e-Underburg uphelele eBulwer. Uqala ngehora lesithupha ekuseni. UMthoko Khuzwayo isikhulu sama-Ama-Ravens uthe balindele abasubathi abeqe kancane ekhulwini. Uthe ngawo balungiselela abasubathi bakulesi sifundazwe njengoba lulunye kuLwezi belindele ukuthi uMnyango Wezemidlalo uvule ezokusubatha.