Indlelakwenza igalikuni
Sesisondele isikhathi sikakhisimuzi nakuba kungaqondakali ukuthi lesi sikhathi siyofika kunjani ngenxa yemigomo yemvalelwakhaya. Nokho ukuze uluhlele kahle nomndeni wakho, sikucobelela indlela yokupheka igalikuni ehlabahlosile.
Amazwe amaningi asekuthatha njengomgomo ukuthi lapho kuhlangenwe kubungazwa okuthile, kudliwe igalikuni. Lokhu ukubona kakhulu kumaholide afana ne “thanksgiving” kanye nokhisimuzi. Nokho, akusiyo inyama ekhonzwe kakhulu lapha eNingizimu Afrika lapho kunemigidi, nokungasho kodwa ukuthi akusiyona inyama esiyidlayo.
Ngiyacabanga lesi esinye sezizathu esenza igalikuni kungabi yinyama etholakala kalula ezitolo nasemabhusha. Igalikuni livame ukuba yinala ezitolo lapho sesibheke ezikhathini zikakhisimuzi. Sengike ngalibona muva nje ezitolo, njengoba abantu sebeqalile ukulungiselela lesi sikhathi.
Abaningi balithenga manje ukuze bazijwayeze ukulipheka ngaphambi kukakhisimuzi, bezama izindlelakwenza ezintsha. Lokhu bakwenzela ukugwema amaphutha ngosuku olukhulu. Lena yinto engivame ukuyenza nami kakhulu lapho ngilungiselela usuku oluthize. Ukudla engikuhlelele ukuthi kudliwe ngalolo suku ngikupheka kusenesikhathi ukuze ngibone ukuthi kuphuma kanjani, kanjalo nokunambitheka kwakho.
Lokhu kunginika ugqozi nokuzethemba ngaphambi kokuthi ngiphekele lolo suku. Uma ungakaze uzame ukupheka igalikuni ngaphambilini, mhlawumbe nawe kuzomele uzame le ndlela, ukuze uzejwayeze.
Igalikuni livame ukunconywa ngenxa yokuthi alinawo amafutha amaningi. Kodwa-ke lokhu futhi kwenza ukuthi lome kakhulu lapho liphekwa. Kuliqiniso ukuthi akuthokozisi ukudla okomile. Sengathi ukudla kungaba manzana ukuze kulumeke kahle kuphinde kwehle kahle nasemphinjeni. Yingakho kunconywa kakhulu ukuthi licwiliswe kumarinade isikhathi eside ngaphambi kokuphekwa. Lokhu kwenza ukuthi amanzana lawa anokunambitheka, angene eziqwini zalo igalikuni nokwenza lithambe lingomi futhi.
Okunye ongakwenza ukuvikela ukoma ukuthi lapho seliphekwa, ulokhu ulininda ngemarinade lize livuthwe. Elinye iqhinga elingisebenzelayo mina lapho ngipheka igalikuni, ukushutheka ulamula okanye iwolitshi (nesikhumba salo) ngaphakathi kulo. Lokhu kwenza umusi lapho liphekeka nokulekelela ekutheni lithambe.
Ngiyakuncoma kakhulu ukuthenga igalikuni elisha, hhayi leli elisuke liphuma kufriza, bese ulipheka ngokushesha. Uma uthenga eliqinisiwe, kuzomele uqinisekise ukuthi lincibilika ngokuphelele (nokungenzeka kungenzeki ngendlela). Uma lingancibilikile ngokuphelele, lokhu kungaholela ekutheni lingavuthwa kahle kanti futhi kungaholela nasekungenweni wubuthi bokudla.
Ukuncibilika kungathatha izinsuku ezimbalwa efrijini noma isikhathi esingafinyelela emahoreni alishumi ngekhilogremu elilodwa.
Kuyasiza ukulikala igalikuni emva kokufaka konke okufaka ngaphakathi kulona, loku kuzokusiza ekutheni wazi ukuthi uzolipheka isikhathi esingakanani. Uma igalikuni lakho liyi-1kg isisindo, kuzomele ulipheke ihora elilodwa nemizuzu engamashumi amathathu.
Ngekhilogremu elilodwa elingaphezulu, kuzomele wengeze ngemizuzu engamashumi amabili, okusho ukuthi uma lingama-2kg, uzolipheka ihora elilodwa nemizuzu engamashumi amahlanu, njalonjalo. Emva kokulipheka, kufanele ulibeke lizinze cishe ihora elilodwa ngaphambi kokuthi ulidle.
Kwesanamuhla isiqephu, sizocobelelana ngendlelakwenza yegalikuni elilula yewolintshi.