Owamahhashi elokishini
Imizamo yokuthatha umdlalo wokutelebhela kwamahhashi esifundazweni iKwaZulu-Natal ubekwe ezingeni eliphezulu nelizophakamisa umnotho wendawo. Funda ngezinhlelo zokwenza konke lokhu.
Kusukela uSean Everitt athatha izintambo zokuba ngumqeqeshi weqembu elikhulu lombhoxo esifundazweni iKwaZulu-Natal, iCell C Sharks, izinto zihamba kahle.
U-Everitt wathatha izintambo kuRobert du Preez kusukela ngoNtulikazi nyakenye. Emidlalweni yeSuper Rugby eyamiswa ngenxa yokhuvethe amaSharks ahlezi phezulu kulogi. Ayesedlale imidlalo eyisi-7, ayenqobe eyisi-6 ahlulwa kowodwa enamaphuzu angama-24.
Kubukeka izinto zibhimba emdlalweni yeSuper Rugby Unlocked. Le midlalo yahlelwa inhlangano ephethe umbhoxo kuleli iSouth Africa Rugby Union (SARU) okwenza abadlali bangalokhu behlezi emakhaya.
AmaSharks asedlale imidlalo emibili, kowokuqala anqoba kanzima ebhekene neLions ngamaphuzu ali-19 kwali-16. Emdlalweni wesibili abe eseguqiswa kabuhlungu izimbangi zawo ezindala iBulls ngamaphuzu angama-41 kwali-14.
Amaqembu adlala kulo mqhudelwano owaqala mhla zili-10 kuMfumfu uze usongwe zingama-21 ayisi-7, kubalwa iBulls, iLions, iSharks, iStormers, iCheetahs, iGriquas nePumas.
Isekela lomqeqeshi weSharks, uDavid Williams, lithe leli qembu lizoya emdlalweni olandelayo ngenhloso ehlukile. Umdlalo olandelayo uzokuba kusasa ngoMgqibelo lapho lizobhekana nePhakisa Pumas, lo mdlalo uzobanjelwa eMbombela Stadium ligamenxe elesine ntambama.
“Inhloso yethu emdlalweni wethu nePumas ukuthi sikhombise ukuthi siyiqembu elikhulu futhi elinabadlali abaseqopheleni eliphezulu. Siyawahlonipha wonke amaqembu esisuke sidlala nawo kodwa imiphumela yethu yakamumva iyasiphoqa ukuthi sitshengise ubukhulu bethu,” kusho uWilliams.
IPumas nayo ziyayibhedela izinto njengoba emdlalweni emithathu inqobe owodwa yahlulwa kwemibili.
“Akukho engingathi kwenza singatholi imiphumela emihle. Siwubukelile umdlalo wethu neBulls sawabona lawo maphutha amancane aselungisekille. Besiba nemizuliswano emincane emihle, sihluleka ukuba sigcine ibhola ngakuthina sisebenzise namathuba. IBulls ngiyayincoma kakhulu indlela eyadlala ngayo yakhombisa ukuthi iliqembu elidlala esigabeni esikhulu salo mdlalo,” kusho uWilliams.
UWilliams uveze ukuthi kuyabashaya ukungabi khona kwabadlali abamqoka. Laba badlali banesikhathi bengadlali kodwa akafunanga ukubadalula.
Yize engababalulanga ngamagama, kusobala ukuthi labo badlalali abanamava uLouis Schreuder oyiscrumhalf, u-Andre
Esterhuizen odlala maphakathi noTyler Paul ezinhlangothini.
“Manje sisabalalisa ulwazi kulaba badlali abakhona. Kubuhlungu ukuswela abadlali abasuke bemqoka eqenjini. Kodwa kwesinye isikhathi ubuhlungu buyadingeka ukuze ukhule. Lokho kusho ukuthi njengomqeqeshi kumele ubheke kwezinye izindawo, okusho ukuthi kuvuleka amathuba kwabalandela ngemumva,” kusho uWilliams.
IStormers isenkingeni yokulahlekelwa abadlali abamqoka ngenxa yokulimala kanzima. Ukaputeni waleli qembu ophinde abe ngukaputeni weqembu lesizwe, uSiya Kolisi, uzohlala amasonto amathathu engadlali. UPieter-Steph du Toit yena ngeke esadlala nhlobo kulo nyaka njengoba alimala ngaphambi kokumiswa kwemidlalo.
Umqeqeshi weStormers uJohn Dobson uthi kuyamjabulisa ukuthi uKolisi ngeke ahlale isikhathi eside.
“UKolisi ungumholi weqembu, siyajabula ukuthi uzohlala isikhathi esincane. Okubuhlungu sifake uNama Xaba esikhundleni sakhe uKolisi wadlala kahle kakhulu ngeshwa wathinteka eqakaleni ngasekupheleni komdlalo, lokho kusho ukuthi uzobe engekho ngempelasonto. UDu Toit njengoba ezohlala isikhathi eside kangaka sithemba ukuthi uzobuya esesimweni futhi enze kahle njengoba kade enza eqenjini nakwelesizwe,” kusho uDobson.
Ithakwe kanje imidlalo yeSuper Rugby Unlocked
Namuhla
ILions neTafel Lager Griquas e-Emirates Airlines Parks Stadium, ngele-19:00 kusihlwa.
Kusasa
IPumas neSharks eMbombela Stadium, ligamenxe ele-16:30.
IBulls neStormers eLoftus Stadium, ngele-19:00 kusihlwa.