KWEZINYE IZINGXENYE
EPakistan: Ngokusho kwezikhulu zamaphoyisa kanye nezibhedlela, ukuqhuma kwebhomu esikoleni senkolo edolobheni lale lizwe iPeshawar kushiye abantu okungenani abayisikhombisa beshonile kwathi abangaphezu kwamashumi ayisishagalombili bona balimala. Akubanga neqembu elivumile ukuthi yilona eliqhumise leli bhomu edolobheni elisenyakatho, eduze komngcele ne-Afghanistan osekuyisikhathi eside lihlushwa udlame lwabenkolo yamaSulumane. “Abantu abangaziwa ababeke isikhwama ebesiphethe lamabhomu,” kusho omunye wamaphoyisa kodwa onqabile ukuba adalulwe ngenxa yokuthi akagunyaziwe ukukhuluma nabezindaba. Inhloko yamaphoyisa ePeshawar, uMohammad Ali Gandapur, utshele abezindaba ukuthi isikhwama besiqukethe iziqhumane ezinesisindo esiyisi-6kg. Kuvela ukuthi udlame lwamasosha kuleli dolobha bese lwehlelile kule minyaka edlule kodwa sekuyavela ukuthi kuqala kabusha ukuhlaselwa kwabezomthetho kulo nyaka.
ENigeria: Inhlangano i-European Union (EU) isikuvezile ukuthi ixhasa loyo owayenguNgqongqoshe Wezezimali waseNigeria ukuba ahole iWorld Trade Organisation (WTO), okuthumele umyalezo wokwethemba izwekazi i-Afrika. UNks u-Okonjo-Iweala kanye noNgqongqoshe Wezohwebo eSouth Korea uNks uYoo Myung-hee bagaqele lesi sikhundla sokuba owesifazane wokuqala emlandweni weminyaka engama-25 sokuhola le nhlangano ngemuva kokusula esikhundleni ngokuzuma kuka uMnu uRoberto Azeveto ongowaseBrazil. Ukusekwa kuka-Okonjo-Iweala okuvela ku-EU kuthathwa njengesibonelo esinamandla sokuqinisekisa ukuhleleka okuqondile kanye nophawu lokwethembana phakathi kwale nhlangano nezwekazi iAfrika. Le nhlangano isibhekane nezinkinga eziningi okuwukugxekwa okuqhamuka kuMengameli waseMelika uDonald Trump kanye noHulumeni wakhe abamise ukusebenza kophiko walenhlangano lokudluliswa kwamacala ngokunqabela le nhlangano ukuthi ikhethe abahluleli bayo kanye nokwanda kokungezwani phakathi kweChina neMelika.
ERussia: Leli zwe liveze ukuthi ukuhlolwa kweRussia okwenziwe iloyo ogaqele isikhundla sikaMengameli uJoe Biden e-USA okuthe iRussia iyisitha esikhulu sokuphepha kweMelika kasilungile, siyiphutha futhi sandisa ukuzondwa kweRussia. Ukuphawula kweRussia kuqhamuka sekusele izinsukwana ukuba uBiden ayobanga noMengameli walela lizwe uDonald Trump isikhundla ngenyanga kaLwezi. Kunhlolovo kuvela ukuthi uJoe Biden usahamba phambili. “Thina ngokuphelele asivumelani nalokhu okushiwoyo,” kusho okhulumela iRussia uDmitry Peskov ngesikhathi ekhuluma nabezindaba bembuza ngokuhlola okwenziwe uBiden. “Siyazisola kuphela nje ukuthi inzondo ephelele yeRussia isakazeka ngalendlela,” kusho uPeskov. Ubudlelwane bala mazwe womabili buthande ukuphazamiseka kwaze kwafika ezingeni lempi engahlaselani kusukela ngonyaka wezi-2014 ngesikhathi iRussia ikhipha iCrimea e-Ukraine, uBiden ngaleso sikhathi wayesayiphini likaMengameli uBarack Obama.