Ukhuvethe luqinisa imigomo yesimo esibucayi eSpain
UNdunankulu waleli zwe, uPedro Sanchez (osesithombeni), umemezele isimo esibucayi ngeledlule emzamweni wakhe wokunqanda ukwanda kwezibalo zabantu abanokhuvethe. Imigomo emisha ngaphansi kwalesi simo ithinta isikhathi sokufika ekhaya ebusuku kanye nokuvinjelwa kwabantu ukuhamba phakathi kwezifunda ezimweni ezithile.
Le migomo nesimo kuqale ngemuva kwenkulumo noma isimemezelo sikaNdunankulu futhi kuvele ukuthi kuzodingeka zonke izifunda ngaphandle kweCanary Islands ukuthi zilandele imigomo yokubekwa kwezikhathi zokungena endlini nokuhamba emgwaqeni ephinde yabeka inani labantu abavunyelwe ukuhlangana kwabayisithupha kuphela.
“Siphila esimweni esingesihle ngempela, lesi yisimo esibucayi kakhulu kwezempilo kuleli khulu leminyaka elidlule,” kusho uNdunankulu ekhuluma esithangamini sabezindaba ngemuva kokuhlangana kweKhabhinethi.
ISpain yabeka enye yemigomo yemvalelwekhaya enzima kunazo zonke ekuqaleni kwalolu bhubhane, yabe isiyehlisa imikhawulo ngehlobo kepha ukuhlehla kwenqama akuchazanga ukubaleka kepha ukulanda amandla njengoba selibuya ngamandla ukhuvethe.
Njengawo wonke amazwe asezwenikazi i-Europe igagasi lesibili lokhuvethe lihlasele emasontweni adlule njengamanje leli zwe yilo elinezibalo eziphezulu entshonalanga ne-Europe. Ngesonto eledlule nje kubikwe abantu abatholwe benaleli gciwane sebeyisi-1 046 132 kanti asebeshonile bayizi-35 000. Isimo esibucayi sizodinga ukuthi sivunywe iPhalamende ukuthi siqhubeke izinsuku ezingaphezu kweziyishumi nanhlanu. UNdunankulu ucele iPhalamende ukuba livume ukwelulwa kwalesi simo kuze kube mhla ziyisi-9 kuNhlaba kozayo.
Okuvelile ukuthi bese zanda izifunda ebezicela ukuba uHulumeni afake izinyathelo ezithize ngenxa yokwanda kwabantu abanokhuvethe. ICatalonia ibe isifunda sokuqala lapho kusetshenziswe umyalelo kaNdunankulu njengoba sibike ukuthi zonke izakhiwo ezivulelekele imiphakathi kuzofanele zivalwe njalo ngehora lesi-9 ebusuku.
Isifunda iMadrid sona bese sivele sesiqalile ukubeka imikhawulo yokuhlangana kwabantu ezindlini lapho bekudingwa abayisithupha kuphela, kwaphinde kwavinjwa ukuhlangana kwemindeni ehlukene ebusuku.
Lokhu kuzosebenza njengohlaka lwezomthetho lokuqala uhlelo olusha lokuxwayisa lwamazinga afana nalawo asevele esetshenziswa emazweni afana neGermany neFrance.
Ngokwezinga lobungozi, ukuhamba phakathi kwezifunda kungavinjelwa uma isifunda sithatha leso sinqumo, ngaphandle uma kunezizathu ezizwakalayo ezinjengokusebenza. Ukuhamba kungabuye kuvinjelwe ngaphakathi kwezifunda yimithetho yemvalelwekhaya yazo.