Isivumelwano esibukwa ngezindlela ezahlukile
UMnyango Wezangapandle e-Iran uchaze isivumelwano seSudan ne-Israel esasenganyelwe yi-United States of America (USA) sokulungisa ubuhlobo phakathi kwala mazwe “njengesingekho emthethweni” futhi wasola iSudan ngokukhokha isihlengo ukuze i-USA iyisuse ohlwini lwabaxhasi bobuphekula.
Isivumelwano sangeledlule sibeka ukuthi lona uHulumeni wesithathu wamaArabhu ngemuva kokuthi i-United Arab Emirates kanye neBahrain babeka eceleni izingxabano ne-Israel ezinyangeni ezimbili ezedlule.
“Khokha isihlengo esanele, vala amehlo akho ngobugebengu obubhekiswe kumaPalestine, khona-ke uzosuswa kulokho okubizwa ngohlu lwabaxhasi babashokobezi,” lokhu kubhalwe yilo Mnyango enkundleni yokuxhumana iTwitter. Uqhubeka uMnyango uthe: “Ngokusobala, lolu hlu alulona iqiniso njengempi ekhishwa yi-USA yokulwa nobuphekula. Kuyihlazo.”
UMengameli wase-USA, uDonald Trump, umemezele ukuthi iSudan izosuswa ohlwini lwabaxhasa ubuphekula, uma isithumele imali eyizigidi ezi-$335 eyayizibophezele ukuthi izoyikhokha njengesinxephezelo.
ISudan sekuvele ukuthi isiyifakile le mali ku-akhawunti ekhethekile yeEscrow eyayizoqondana nabagilwa bokuhlaselwa yiqembu i-al Qaeda ezindlini zamanxusa ase-USA eKenya naseTanzania ngowe-1998.
UTrump uphinde wathi abasePalestine “bafuna ukwenza okuthile” kepha wangabudalula ubufakazi balokho. Abaholi basePalestine bagxeke ukunyakaza kwama-Arab okusanda kwenzeka kwaIsrael, abakuchaze njengokukhaphela inhloso yabo yobuzwe babo ngqo ezindaweni ezingaphansi kwe-Israel. Laba baholi bakhethe ukungazibandakanyi nabakuHulumeni kaTrump ngenxa yokuthi babona ukuthi bathanda ukuvuna i-Israel.
Emasontweni ambalwa edlule i-United Arab Emirates kanye neBahrain abe ngamazwe okuqala ama-Arabhu engxenyeni yekwata yekhulu leminyaka yokuvuma ubudlelwano obusemthethweni ne-Israel okwenziwe ikakhulu ukwesaba kwala mazwe i-Iran.
Abaholi bezempi kanye nezakhamuzi ngaphansi kukaHulumeni wesikhashana waseSudan banemibono ehlukene phakathi kokuthi bashesha kangakanani futhi bahamba ibanga elingakanani ekusunguleni ubudlelwano obuhle neIsrael.
Iphuzu elivele kakhulu ezingxoxweni bekuwukuphikelela kweSudan kokuthi noma yisiphi isimemezelo esizoqhamuka ngokukhishwa kwayo ohlwini lwamaphekula kungayamaniswa nobudlelwane bayo ne-Israel.
ElaboHlanga like labika ukuthi uMengameli wasePalestine, uMahmoud Abbas, emasontweni edlule ucele uNobhala Jikelele we-United Nations (UN), uMnu u-Antonio Guterres, ukuba abize ingqungquthela yamazwe omhlaba ekuqaleni konyaka ozayo ukuze kwethulwe “inqubo yoxolo lwangempela” phakathi kwe-Israel nePalestine.
U-Abbas uphinde wanxusa ukuthi uGuterres asebenze nabalamuli bezindaba zaseMiddle East okuyi-USA, iRussia, i-EU, iUN kanye noMkhandlu Wezokuphepha we-UN ukuze kuhlelwe le ngqungquthela futhi zonke izinhlaka ezithintekayo ngalolu daba zibambe iqhaza ngokugcwele ekutholeni ukuthula.
IPalestine ifuna iWest Bank neGaza Strip bese impumalanga yeJerusalema ibekwa njengenhlokodolobha yayo yonke le ndawo kodwa kuzokhumbuleka ukuthi le ndawo yathathwa noma yanqotshwa ngabakwa-Israyeli ngonyaka wezi1967. Abaholi basePalestine benqaba isiphakamiso sokuthula esethulwa uTrump lapho uHulumeni wakhe wawubeke ukuthi uzokwamukela yonke imiphakathi yamaJuda esendaweni enqotshwe ngabakwa-Israel njengengxenye yaleli lizwe.