Inkampani iTotal kufanele iphendule imibuzo nge-Uganda
Umlando ubeka ukuthi inkampani iTotal yasungulwa edolobheni laseParis ngonyaka we-1924 ngaphansi kwegama iCompagnie Française des Pétroles (Inkampani kaphethiloli yaseFrance) ngesinyathelo sikaHulumeni waseFrance. Yaziwa ngokuthi yiCFP, le nkampani yazibandakanya ekuhloleni nasekukhiqizeni kakhulukazi eMiddle East ngakho umlando uyibeka njengenkampani enomlando omude futhi okungalindelwe ukuba ibe nogcobho kepha iqiniso lithi akukho soka elingenasici njengoba sekuvele izindaba ezithi abantu abayi-100 000 e-Uganda kanye naseTanzania balinyazwe ukwephulwa kwamalungelo abantu okuxhumene nohlelo lukawoyela lweTotal i-TOTF. PA e-Uganda. Lokhu kushiwo amaqembu ezishoshovu aseFrance embikweni ngeledlule.
Amaqembu iFriends of the Earth kanye neSurvie afuna umyalo wenkantolo ukuthi iTotal idalule ukuthi ibhekana kanjani nomthelela omubi wemisebenzi yayo, esho lokho ecaphuna isibopho sokwenza kanjalo ngaphansi komthetho waseFrance.
Esitatimendeni sayo iTotal izichithile izinsolo zokuthi yephule amalungelo abantu yathi amaphrojekthi ayo akhiwe ngenhloso yokunciphisa umthelela kuzakhamuzi zakule ndawo.
Le nkampani iphinde yathi akekho umuntu okufanele noma osuswe emhlabeni wakhe ngaphandle kwesinxephezelo esifanele, nokuthi ibheke ukwethula uhlelo lokukhokha okwesikhashana ngemuva kokuthi ubhubhane ukhuvethe lubange ukubambezeleka kuphrojekthi
La maqembu ezishoshovu kanye namanye ezishoshovu akulona leli zwe, asole le nkampani ngokuthi yabethusa futhi yehluleka ukunxephezela kahle abanikazi bomhlaba abathintekayo ngomsebenzi wephrojekthi yayo eTilenga khona e-Uganda, futhi baphinde bathi izivikelo zemvelo azanele kule phrojekthi.
Bangeze embikweni wabo wakamuva ukuthi lesi simo sase siphazamisa ukutholwa kwemfundo kanye nezempilo ngezinye izikhathi noma izimo.
Enye yezinkantolo zaseFrance ngaphambilini yanquma ukuthi bekungekho emandleni ayo ukuthi yahlulele leli cala, kepha izishoshovu zasidlulisa lesi sinqumo kanti esinye sizothathwa kulo leli sonto.