KWEZINYE IZINGXENYE
UMengameli wakuleli zwe uJohn Magufuli unethemba lokunqoba elinye ihlandla leminyaka emihlanu okhethweni oluzayo lukaMengameli nePhalamende kuleli zwe elisempumalanga yezwekazi i-Afrika. UMagufuli ufisa lokho nje usethole ukugxekwa ngamaqembu alwela amalungelo abantu athi uHulumeni uvimbela ukuphikisana kwezepolitiki. Izimbangi ezinkulu zikaMagufuli kubalwa uMnu uTundu Lissu, owadutshulwa ngezinhlamvu ezili-16 ngonyaka wezi-2017 kanye naloyo owayenguNgqongqoshe Wezangaphandle uBernard Membe. Ukuhlaselwa kukaLissu, obuye ekudingisweni ngoNtulikazi emva kweminyaka, akukaze kuxazululwe kuze kube manje. Leli zwe elingelesithathu ngobukhulu bomnotho empumalanga Afrika, lithi lithole ukukhula okulinganiselwa kumaphesenti ayisi-7 eminyakeni emine edlule.
Lokhu kufakazelwe yizibalo ezisemthethweni ezikhishwe yileli zwe njengoba uHulumeni walo utshale izigidigidi zemali kungqalasizinda kuyo okubandakanya ujantshi omusha, idamu lamandla kagesi kanye nezindiza.
ETanzania:
Iqembu eliphikisayo iMovement for Democratic Change (MDC) kuleli zwe selisole uHulumeni ngosebenzisa udaba lwezijeziso okuhloswe ngazo ukufihla ukuphatha kwawo kabi kuleli zwe. Iqembu elibusayo iZanu PF belilokhu lifuna ukuthi kususwe unswinyo oluhlosiwe olwalubekwe ngamazwe asentshonalanga ngenxa yezinsolo zokuhlukunyezwa kwamalungelo abantu kanye nokukhwabanisa okhethweni. Okhulumela iMDC uFadzayi Mahere ekhuluma nabezindaba uthe: “Unswinyo kumane nje kuyithuluzi lwamanga olusetshenziswayo ukuthethelela inkinga embi eyenziwa ilo mbuso kanye nenkohlakalo yonke egcwele leli zwe. Uma ubuka indlela lo Hulumeni oziphethe ngayo, uma ungabuka ukuhlukunyezwa kwamalungelo abantu, uma ungabuka ukuthunjwa kwabantu, uphinde ubuke wonke amahlazo enkohlakalo avelayo uzobona ukuthi unswinyo akulona olufake leli zwe obishini, wukubusa okungalungile okuyimpande yakho konke ukuhlupheka okukhungethe lelizwe.”
EZimbabwe:
Amadoda amahlanu abehlomile abulale izingane ezinhlanu kwathi eziyisi-9 zasala zilimele ngesikhathi evulela ngenhlamvu esikoleni esisedolobheni iKumba esifundeni esiseningizimu. Izikhulu zakuleli zwe zisole lokhu kuhlaselwa kubahlubuki abafuna ubuzwe babo esifundazweni esisentshonalanga esikhuluma isiNgisi, kepha lezi zinsolo azikaqinisekiswa. Laba bahlubuki sebabeka imithetho yezikhathi zokungena ezindlini baphinde bavala izikole njengengxenye yemibhikisho yabo yokulwa noHulumeni kaPaul Biyaâs okhuluma kakhulu isiFrench kanye nezinsolo zawo zokubandlululwa kwabambalwa abakhuluma isiNgisi.
ECameroon: