Usezibona elunqobile ukhetho lobuMengameli uDiallo eGuinea
Umholi weqembu eliphikisayo uMnu uCellou Dalein Diallo uveze ukuthi uwunqobile umzuliswano wokuqala wokhetho lobuMengameli kepha amagama akhe aphikiswe ngokushesha yiKhomishini Yokhetho. Lokhu kuphikisana kwalo mholi nale nhlangano kube ukuvuleka kokugquzulana kwalaba ababili.
“Yize kunamaphutha amabi aphazamise ukuqhutshwa kahle kokhetho futhi ngenxa yemiphumela ephumile emabhokisini okuvota, ngisinqobile isiwombe sokuqala salolu khetho,” kusho uDiallo ngesikhathi etshela abezindaba kanye nabalandeli bakhe abebethokozile.
Akabekanga zibalo kodwa uthe lesi sibalo athi sikhomba ukuthi unqobile sisuselwa ekubalweni kweqembu lakhe hhayi isibalo esisemthethweni esenziwa yiKhomishini Yokhetho njengoba ngalesio sikhathi le nhlangano ibingakayishicileli imiphumela.
IKhomishini Yokhetho ithe isimangalo sikaDiallo asinaso isisindo.
“IKhomishini Yokhetho yiyona kuphela egunyazwe ukunikeza imiphumela yesikhashana. Akukho ezandleni zeqembu lezepolitiki noma umuntu uqobo ukuthi kukhishwe lemiphumela,” kusho isikhulumi sayo seKhomishini uMamadi Kaba.
“Eseqhubeka kulokhu akushilo uKaba uthe: “Siyazisola ngokuziphatha kukaDiallo futhi sithi lesi simemezelo asenzile asilutho futhi asisebenzi.”
UDiallo uyimbangi enkulu kaMengameli u-Alpha Conde oneminyaka yobudala engama-82, kodwa kuzokhumbuleka ukuthi uConde ufuna ihlandla lesithathu ngemuva kokushintshwa komthethosisekelo ngenyanga kaNdasa okwadala ukuqubuka kwemibhikisho eyaholela ekushoneni kwabantu.
Iqembu likaDiallo lithumele abaqaphi balo bokhetho eziteshini zokuvota ezingaba yizinkulungwane eziyishumi nanhlanu laphinde lathi lizoshicilela imiphumela ethunywelwe ngayinye.
Ngemuva kwesimemezelo sikaDiallo kuvele izindaba ezithi kubulelwe iphoyisa enhlokodolobha yaleli zwe iConakry ngeledlule ngesikhathi kuba nokuhilizisana phakathi kwamaphoyisa nababhikishi beqembu eliphikisayo ngemuva kokuthi ababhikishi beshise izivimbelo emigwaqeni ngemuva kwemiphumela yokhetho yokuqala eveze ukuthi uConde uhamba phambili.
Abaseki bembangi enkulu kaMengameli bashise impahla namathayi ezimoto emiphakathini ehlala abaseki beqembu elibusayo khona enhlokodolobha. Amaphoyisa ahlakaza ababhikishi ngesisi esikhalisa unyembezi.
UNgqongqoshe Wezokuphepha uDamantang Albert Camara uthe: “Ukunqubuzana kuqubuke emgwaqeni uPrince Road lapho okugcine sekubulawa khona iphoyisa.” Lokhu kubulawa kwaleliphoyisa kubeka izibalo zokubulawa kwabantu kwabantu abayisithupha libele kwaqala ukhetho.