Ayakhula amathemba okwehla kwentengo kaphethroli ngezayo
Liqale isonto isimo sintukuntuku ezimakethe zemali, kungelula ukugcizelela ukuthi siyehla noma siyenyuka yini isimo somnotho.
Ngokuqala kwesonto bekubhekwe ngamehlo abomvu inkulumo kaNgqongqoshe Wezezimali uMnu uTito Mboweni ebuyekeza isabelomali sanonyaka. Le nkulumo bekulindelekile ukuba ibe nomthelela ekusimameni nasekwehleni kwamandla erandi. Uyethulile inkulumo uNgqongqoshe uMboweni washiya abanye bekhuluma bevumelana nakushilo, kodwa kunabaningi abakubeka kucace ukuthi abayiboni into ezoletha izinguquko emnothweni ngokushesha kulokho akubeke etafuleni.
NgoMsombuluko zingama-26 kuMfumfu 2020
Kuvule izimakethe zemali ngoMsombuluko irandi lingaphansi kwengcindezi lilahlekelwe ngamasenti amabili. Idola lase-USA ekuseni ngoMsombuluko belilingana namarandi ayi-16,25.
UPondo waseBritain wenze okwehlukile ngoba uzithole ungaphansi kwengcindezi ngempelasonto waze waphunyukwa ngamasenti amabili kwavula izimakethe ngoMsombuluko limamatheka irandi. Kuvukwe uPondo ulingana namarandi angama-21,17, lisimama irandi.
Impi phakathi kweYuro nerandi ayivumi ukuphela. Ngempelasonto irandi lilahlekelwe ngamasenti ayisikhombisa kwavula izimakethe kudingeka amarandi ahlangane abe li-19,23 ukuze irandi lilingane neYuro.
Kwehla kabuhlungu ukuthi intengo yegolide liqale isonto yehlile yaba ngaphansi kwamadola ase-USA ayi-1 900. Ekuseni ngoMsombuluko intengo yegolide beyingamadola ase-USA ayi-1 896.
Intengo kawoyela ongahluziwe kuvukwe ngoMsombuluko yehlile yaba ngamadola angama-41,06.
NgoLwesibili zingama-27 kuMfumfu 2020
Kuvule izimakethe zemali ngoLwesibili irandi lisimeme lafinyelela ezingeni elingakaze libe kulo ezinyangeni eziyisishiyagalombili ezedlule uma liqhathaniswa nedola lase-USA. Kuvukwe ngoLwesibili idola lase-USA lilingana namarandi ayi-16,17.
UPondo waseBritain ucindezelwe yirandi laze lawephuca amasenti ayisikhombisa. Kuvukwe ngoLwesibili uPondo waseBritain ulingana namarandi angama-21,09. Irandi belisemandleni elagcina ukuba nawo emasontweni ayisihlanu edlule.
Irandi selokhu lagcina ezinyangeni ezintathu ezedlule, mhla zingama 23 kuNtulikazi ukuba semandleni ebelikuwo kuvukwa ngoLwesibili. Kuvule izimakethe zemali ekuseni ngoLwesibili iYuro lilingana namarandi ayi 19, 13.
NgoLwesithathu zingama-28 kuMfumfu 2020
Ekuseni irandi libukeke lehlelwe wumfutho, okungenzeka ukuba bekwenziwa wukunanela inkulumo ebeyizokwenziwa nguNgqongqoshe uMboweni. Irandi lishibilike lalahlekelwa ngamasenti amathathu, kwavukwa ekuseni idola lase-USA lilingana namarandi ali-16,20 ngoLwesithathu.
Irandi lilahlekelwe ngamasenti amane ebusuku bangoLwesibili libhekene noPondo waseBritain, kwavukwa ekuseni ngoLwesithathu amarandi kumele ahlangane abe ngama-21,13 ukuze alingane noPondo waseBritain.
Kuvukwe ngoLwesithathu iYuro lilingana namarandi ali-19,09. Lokhu bekukhombisa ukuzabalaza kwerandi elikwaze ukwengeza amasenti amane kulokho ebeliyikho ngayizolo.
NgoLwesine zingama-29 kuMfumfu 2020
Kuvule izimakethe ngoLwesine idola lase-USA ligubuzele irandi lalahlekelwa ngamasenti ayishumi nesihlanu. Ekuseni ngoLwesine bekudingeka amarandi aqoqane abe li-16,35 ukuze alingane nedola lase-USA.
Kuvukwe ngoLwesine irandi licindezelekile libhekene noPondo waseBritain laphunyukwa ngamasenti ayishumi nesithupha.
Ekuseni ngoLwesine bekudingeka amarandi abuthane abe ngama-21,29 ukuze alingane noPondo owodwa.
Lithe libhekene neYuro irandi lalahlekelwa ngamasenti ayishumi nanye, kwavukwa ekuseni ngoLwesine iYuro lilingana namarandi ayi-19,22.
NgoLwesine kuvukwe intengo yegolide ingamadola ase-USA ayi-1 882, okukhombisa ukwehla kulokho ebeliyikho kulama sonto amaningi edlule.
Emva kwesikhashana intengo kawoyela indiza phezulu, kulethe intokozo ukubona intengo kawoyela ongahluziwe yehla ifinyelela kumadola ase-USA angama-39,15.
Kuleli sonto irandi beliza kahle kubonakala likhula ngamandla, kodwa kuthe ngoLwesine labonakala lilahlekelwa ngamandla.
Asikho isidingo sokwethuka ngoba akukho simanga esenzekile esingalenza irandi liqhubeke lilahlekelwe wuzinzo ezimakethe zemali.
Okwamanje mawehle amaphaphu silibheke kahle esontweni esizoliqala.
Uzinzo olukhona kuntengo kawoyela ongahluziwe kulezi zinsuku kanye nokuhlaziya kwethu izinto ezenzekayo kulesi sikhathi esidlula kuso kwenza siqiniseke ukuthi ekuqaleni kwenyanga kaLwezi abezimoto bazozithola bethokozela ukwehla kwentengo kaphethroli nodizili.