Nalo ithemba liya ngokuphela uma zingekho izinhlelo ezicacile
Unyaka nonyaka kwethulwa isabelomali, baphile abantu, kuthi ngaphambi kokuphela konyaka kuphinde kubuyekezwe isabelomali kukhulunywe lilokhu limile ithemba lokuthi obengakawutholi umsebenzi uzowuthola, ibhizinisi ebelithwele kanzima lizovuka nokunye kuzokwenzeka. Kulo nyaka ukubuyekezwa kwesabelomali kuqondene nesikhathi esinzima eNingizimu Afrika lapho ukhuvethe seluwuthathe lawusoconga umnotho, kwavala amabhizinisi, kwaphela imisebenzi, kwabolekwa izimali, eziningi zashabalala imisebenzi ingabonakali.
Esengikubonile ngosomabhizinisi ngukuthi impilo yabo yesekeleke kakhulu phezu kwethemba. Usomabhizinisi uthatha noma yisiphi isinyathelo ngethemba lokuthi lokho akwenzayo yikona okudingekayo emhlabeni futhi uzophumelela. Uthi eqala esungula ibhizinisi, efaka imali yakhe emsebenzini ongakaze ube khona, kube kunento elawula ingqondo eyenza abone impumelelo engabonwa ngabaningi. Kuthi kusazixoxelwa nje, usomabhizinisi wangempela abe ebuka intuba azongena ngayo enze lowo msebenzi awuthandayo, nawenza kangcono.
Ngiyazi ukuthi bakhona osomabhizinisi okuthe belalele uMengemeli wezwe ethula uhlelo lokuvusa umnotho weNingizimu Afrika babona ithuba elisha baqala bazihlela kabusha ukuze babe sethubeni lokuphucula amabhizinisi abo ngesikhathi seluqala ukusebenza lolu hlelo. Abanye basalinde ngelikhulu ithemba lokuthi kukhona okuzokwenzeka emva kwenkulumo kaMengameli wezwe noNgqongqoshe Wezezimali. Ngithe uma ngilalele uMengameli wezwe uMatamela Ramaphosa ethula uhlelo lokuvuselela umnotho kwangifikela ukuthi kuyokuba kuhle ukuba ongqongqoshe babe nengqondo kasomabhizinisi, yokubona into ingakabi khona, bayifunde ivaliwe, basungule izinhlelo ezinohlonze futhi baqikekele ukuthi lolu hlelo aluweli ezandleni zamaqili ajonge emalini, ebe engawenzanga umsebenzi. Kumele ukuba bafunde isifundo esithile ngendlela okusetshenziswe ngayo imali ngesikhathi kuliwa nokhuvethe.
UMengameli wethule uhlelo walushiyela kongqongqoshe ukuba balwenze lusebenze, luthele izithelo kuguquke isimo sobubha kuleli zwe. Lolu hambo luqale ngoNgqongqoshe Wezezimali ebuyekeza isabelo sezimali, saphakathi nonyaka, lapha eyaba kabusha, esebeke emqondweni uhlelo olwethulwe nguMengameli wezwe.
Phakathi kwezinto ezabalulwa nguMengameli wezwe enkulumweni yakhe ngesonto eledlule yilezi:
Izinhlelo ezizokhulisa umnotho wezwe okungenani ngamaphesenti amathathu eminyakeni eyishumi ezayo.
Ukusungula ithimba elizokwelekelela uMengameli ekuthathweni kwezinqumo zokufukula umnotho.
Isikhwama sengqalasizinda sombuso sizosebenzisa imali eyizigidigidi ezili-R100 ukuthuthukisa ingqalasizinda.
Izinhlelo ezintsha zokwenyusa ukuphakelwa kukagesi obalelwa ezi-11 800 megawatts ngonyaka wezi-2022.
Ukusungulwa kwamathuba emisebenzi abalelwa ezi-800 000 ekupheleni kwenyanga kaNdasa ngonyaka ozayo. Kuyosetshenziswa imali ebalelwa ezigidigidini ezili-R13,8 kusungulwa la mathuba.
Kuzokhuthazwa izinhlelo zokusungula izimboni kwandiswe imikhiqizo yangaphakathi ezweni.
Kuningi nokunye akubala uMengameli, phakathi kwakho kuthinta izinhlelo zemfundo, ukwakhiwa kwemigwaqo, izinhlelo zokwelekelela abalimi abasafufusa ababalelwa ezi-75 000, nokunye okuningi.
Kuthe uma abahlaziyi belubuka uhlelo obelwethulwa nguMengameli bakusho baqinisa ukuthi uMengameli ubebeka izifiso zakhe, kodwa hhayi into ezokwenzeka. Iningi belikusho lokhu likususela ekutheni yiningi kakhulu imali okubikwa ukuthi ikhwatshanisiwe yangafinyelela ezinhlelweni ebeyiqondiswe kuzo ezinhlelweni zikaHulumeni. Umbuzo abebewubuza bewuzama ukuthola ukuthi yikuphi okwehlukile okwenziwe uHulumeni ukuvimbela ukudicilelwa phansi kwezinhlelo zokulwa nokhuvethe lapho kubikwa ukuthi izigidigidi zemali aziyisebenzanga imisebenzi ebezihlelewe yona.
Kudingeka ukuhlangana kosomabhizinisi bangayekeleli ezikhulwini zikaHulumeni zizame ukuyixazulula zodwa le mpicabadala yomnotho. Ethula inkulumo yakhe uNgqongqoshe Wezezimali uMnu uTito Mboweni (osesithombeni) ukubeke wakugcizelele ukuthi umnotho uyaqhubeka uyehla, kanti kuzokuba kubi kakhulu ngonyaka wezi2021.
Kunezinto ezishiwo uNgqongqoshe Wezezimali ezishiye imibuzo ngokuthi libhekephi ikusasa lomnotho wezwe. Udaba lweSAA luyinzukayikeyi. Wethembisa ukufaka imali eyizigidigidi ezili-R10,5 ukutakula inkampani iSAA. Enkulumweni yakhe uthe amaholo ezisebenzi zikaHulumeni azogcinwa emi kuma-0,8% isikhathi esiyiminyaka emithathu ezayo. Lokhu kuvuse uhlevane kuzinyunyana eseziqalile ukukhononda ngalesi sinqumo, zikhala ngokuthi izisebenzi yizona ezigcina zizithola zingaphansi kwengcindezi kuHulumeni. Lokhu kuchaza ukuthi kusazokuba lukhuni ukugcwalisa izikhala zemisebenzi ezinye zazo ezikade zavuleka. Ezikoleni kushoda othisha, ezibhedlela kushoda onesi nakweminye iminyango kaHulumeni kukhulu ukuxhugela ngenxa yezikhala zezisebenzi ezingavalwa unyaka nonyaka.
Kusobala ukuthi nakulo nyaka awukho umlingo umphakathi ongawulindela ngoba aziziningi izethembiso zokukhuphula umnotho. Kubalulekile ukuba kubhekwe izinhlelo ezinqala ezizoguqula isimo somnotho ngesikhathi esifushane ngoba uma kuqhubeka ngendlela okuyiyo manje, nalelo themba elincane ebelilokhu livuselelwa wukumenyezelwa kwezithembiso, lizophela. Yilona ithemba ebelilokhu ligcine abantu bengavuki indlobane bengalawuleki. Kusazoshuba.