Amaciko anxenxela uMr Music wama-Idols ivoti
Umcintiswano womculo waminyaka yonke obizwa ngokuthi iSA Idols usuya ngakuvuthondaba njengoba ngeSonto kulindeleke ukuthi kuphume umculi oyedwa bese kusala abayi-7, abazoqhubeka bancintisane.
Kulaba abayisishiyagalombili abasele kukhona uSbongile Millicent Mntambo odume ngelikaBongi odabuka eWelkom, uXolani Dhludlu owaziwa ngelikaBrandon ongowaseBarbeton, uJooma Mize waseNelson Mandela Bay ePort Elizabeth, uPhumzile Mseleku odabuka eNewlands West, eThekwini.
Abanye uNtokozo Mvelase waseKagiso eGoli, uZama Khumalo waseWitbank esifundazweni iMpumalanga, uSonwabile Ngxito owaziwa ngoZanoThando odabuka eRusternburg kube uLungisani Mthethwa yena obizwa ngoMr Music odabuka eRichards Bay KwaZulu-Natal.
Laba basele nje bekuyiTop 10, sekuphume uBoitumelo Mohutshwa obedume ngelikaBE odabuka eBloemfontein, uphuma ubelandela uSuccedor Zitha Waterval-Boven.
UMr Music uyena oyimfivilithi kubathandi balo mncintiswayo. NgeSonto eledlule ucule ingoma kaDJ Maphorisa ngokubambisana noSjava ethi “Ngempela” abantu abaningi bamugcwalisa ezinkundleni zokuxhumana bekhombisa ukumeseka.
Akugcinanga ukuba ikhono lakhe uMr Music linconywe abantu abangabona abculi, kodwa nabaculi batshengise ukulithanda iphimbo lakhe.
Umculi kaMasikandi uKhuzani “Indlamlenze” Mpungose wafaka ividiyo enxenxa abantu basesifundazweni iKwaZulu-Natal ukuthi bavotele leli bhungu lakwaMthethwa.
Kuvidiyo uKhuzani ayifake ekhasini lakhe elithi, Khuzani KING Ndlamlenze Mpungose uthe: “Ngiyanicela sizwe sakithi, ngicela wonke umuntu othanda umculo ukuthi anike uxhaso uMr Music obalwa nabalishumi futhi usaqhubekela phambili. Ngicela ukuthi siqhubeke nokumvotela enombolweni yakhe ngoba le ndondo kumele abuye nayo esifundazweni sakithi. Akekho ongazi ukuthi iKwaZuluNatal iyisifundazwe sezindondo,” kusho uKhuzani.
Uqhube wathi: “Ngiyacela njengeciko ukuthi kungagcini ngami ukumkhankasela uMr Music kodwa siphose amavoti. Ngiyacela nakunina sizwe samabhinca ukuthi nenze enidume ngakho nimvotele umfana.”
Uma enganqoba uMr Music kobe kusho ukuthi usivikelile isicoco ukuba sihlale esifundazweni iKwaZulu-Natal kwazise uyobe esengowesithathu ukhala emuke naso elandela uKhaya Mthethwa owanqoba ngonyaka wezi-2012 noNoma Khumalo yena owawunqoba lo mncintiswano ngowezi-2016.
Amanye amathemba esifundazwe iKwaZulu-Natal alele kuNdoni.
Onqobe isizini ye-15 yalo mncintiswano uLuyolo Yiba waseBuffalo River, eKing William Town owadlisela ogageni uSneziey Msomi ongowakhona KwaZulu-Natal.
Omunye umculi ofisa ukuba uMr Music anqobe uJabulani Hadebe odume ngelikaSjava.
Ekhasini lakhe ezinkundleni zokuxhumana wafaka isithombe sakhe uMr Music enxusa ukuba abantu abamuvotele.
Oyijaji kuma-Idols SA uSomizi Mhlongo-Motaung emva kokuba eseculile uMr Music, wamyalela ukuthi aqhubeke nokwenza kahle. URandall Abrahams naye oyijaji elidume ngokungahleki noma yini ngeSonto ulincomile leli bhungu lakwaMthethwa indlela elicula ngayo wafisa engathi lingaphinda licule enye ingoma.
Izingoma ezizoculwa ngeSonto
Mr Music: Blaq Diamond – ‘Woza My Love’; Jooma: S1MBA – ‘Rover’; Brandon: Post Malone – ‘Circles’; Bongi: Beyoncé – ‘DeJà Vu’; ZanoThando: Chris Brown – ‘Loyal’; Zama: Calvin Harris & Rihanna – ‘This Is What You Came For’; Ntokozo: Dua Lipa – ‘Break My Heart’; Ndoni: Beyoncé – ‘Already’.