UHulmeni emalungiselelweni okwakha inkundla yamahhashi elokishini
Unyukela kwelinye izinga umjaho wokutelebhela KwaZulu-Natal njengoba uMnyango Wezemidlalo ngokubambisana nezinkampani ezizimele besemalungiselelweni okwakha iDundee Horse Racing Track eselokishini iSibongile khona kule ndawo engaphansi kwesifunda uMzinyathi.
Enkulumweni elaboHlanga elibe nayo noMphathiswa uHlengiwe Mavimbela, uveze ukuthi nakuba engakabi nalo usuku oluqondile okuzokwakhiwa ngalo le ndawo kodwa sekuqaliwe ukuboniswana ngohlobo lwesakhiwo.
Phakathi kokuzokwakha lapha yizitulo okuhlala kuzo abantu abazobukela, igumbi elizokwenza okuningi, umzila wamahhashi, ukufaka izibani zezinga eliphezulu nokunye okuningi.
Uthe inhloso wukubona umdlalo womtelebhelo ufika ezingeni le miqhudelwano efana neVodacon Durban July osekuphele iminyaka bephupha ngalo.
Uqhube wathi bazolwa kuze kunqamuke izandla, inhloso yabo wukuthi lolu hlobo lo mjaho bafuna lususe ikati eziko njengoba sekuqalile ukwenzeka.
“Ngikhuluma nawe nje abanye babaxhasi bethu iHollywoodbets isiqalile ukuhlola ukuthi le ndawo izokwakhiwa kanjani. Sifuna ibe sezingeni eliphezulu ifane neHollywoodbets Greyville Racecourse, eThekwini. Ngokuyakha kuzosongela imali eningi. Sesizoyeka ukuqasha izindawo zokuhlala uma kuneDundee July. Sizoyeka nokuqasha amatende. La magumbi esizowakha sizophinde siqashise ngawo, senze imali. Sifuna ukuwubeka kwelinye izinga umjaho wokutelebhela,” kubeka uMhlonishwa uMavimbela.
uMphathiswa uthe okumjabulisayo ukuthi sekungenelele uHulumeni wesifundazwe ekuthuthukiseni lo mdlalo.
Uveze ukuthi uHulumeni wesifundazwe usujube uMnyango Wezolimo ukuthi wenze isiqiniseko sokuthi ufundisa abanikazi bamahhashi ukuthi kusukela ebuncaneni akhuliswa kanjani kuze kuba afika esigabeni sokutelebhela.
UMnyongo Wezokuthuthukiswa Komnotho Ezokuvakasha Nezemvelo kulesi sifundazwe uzoqikelela ukuthi lo mdlalo uphendulwa kanjani ibhizinisi. Okunye okusha ukuthi kusukela kuDundee July Horce Racing yangonyaka ozayo izivakashi ngeke zisalala emahhotela kodwa zizolala emizini ehlonzwe yilo Mnyango.
Inkampani iGaming and Betting izokwenza isiqiniseko sokuthi imithetho yomdlalo wamahhashi iyalandelwa. Kukhona neHollywoodbets nebhange i-Ithala.
UMhlonishwa uMavimbela obechichima ebusweni kuye injabulo udalule ukuthi kusukela kuDundee July yangonyaka ozayo kuzoqalwa ukubhejelwa amahhashi. Uthe njengamanje kukhona ithimba elimatasa elilekelelana nezinkampani ezinjengeHollywoodbets neGaming and Betting elihlanganisa iminingwane yamahhashi efana nokuthi likhuliswe kanjani, selike lanqoba miphi imijaho, lineminyaka emingaki nokunye. Lokhu kuzosiza amaphanta.
“Amaphanta kawavive, kuyasuka lokho ngonyaka ozayo. Le mininingwane izobe seyikhona ngonyaka ozayo. Ngalokhu sihlose khona ukunyusa izinga lo mjaho womtelebhelo. Lokhu kubheja kakuzokwenzeka nje kuphela kuDundee July kodwa nakweminye yokutelebhela egcwele sonke isifundazwe. Ngeke kusagcina ngojokhi nabanikazi bamahhashi ukuthola inkece kodwa namaphanta,” kuqhuba uMphathiswa uMavimbela.
Phakathi kwezimfivilithi esezizakhele igama ngokushaya intambo kukhona uSigwebosentambo, uNxakanxaka, uSummer Time, u-Album ukusho ambalwa.
Ngeledlule khona eDundee Horse Racing Track bekunomcimbi lapho obekubukiswa ngemifaniswano yojokhi, izitulo nezicathulo zamahhashi, amatomu nokunye okuningi kwalo mdlalo okukhiqizwe ngabantu baseDundee.
UMphathiswa uMavimbela uthe sesiphelile isikhathi sokuxhasa izitolo zabelungu. UMnyango awuphathisiwe sewuzothenga kuzakhamuzi zakuleya ndawo.
Ngalo isonto eledlule kuhanjelwe eminye yemizi eselokishini iSibongile, izivakashi ezizolala kuyona. Phakathi kwehanjelwe ngabaphathiswa yindawo yokulala esezingeni eliphezulu yamawele akwaZwane.
“Siphelile isikhathi sokunothisa izitolo nezindawo zokulala zabezinye izinhlanga. Kusukela izintweni zokugqoka zamahhashi nojokhi kuya kuzindawo zokulala sekuzokuba ngezabantu baseDundee. Kwasekuqaleni kwakumele ukube kwaba kanjalo. Umnotho siwushiya kubo abantu balapha. Silindele ukuthi sishintshe kakhulu isimo sale ndawo. Sicela nomphakathi ubambisane nathi, uvikele izivakashi ezinswelaboyeni”. Kulo nyaka umjaho iDundee July kayibanga khona ngenxa yokhuvethe.