OwoHlanga wase-USA ufakwe ohleni lwalabo bangaba nguPhapha
UPhapha uFrancis useqoke amaKhadinali amasha ali-13 ebandla lamaRoma Akhatholika wafaka abayisishiyagalolunye abafanele ukungena kusithangami sokukhetha ozongena esikhundleni sakhe uma engasekho noma esesulile.
Isimemezelo ngala maKhadinali esimangaze abaningi uPhapha usenze eSt Peter’s Square. Okumangaze abaningi kube ukufakwa kukaSobaba Omkhulu uWilton Gregory (osesithombeni) waseWashington DC. Lokhu kusho ukuthi uSobaba uWilton angaba ngowokuqala woHlanga e-USA ukubamba lesi sikhundla.
La maKhadinali azonyuselwa ezikhundelni zawo kumcimbi owaziwa ngeConsistory eVatican mhla zingama-28 kuLwezi futhi ukukhethwa kwamasha phezu kwalawa akhona kwandisa ithuba lokuthi uPhapha olandelayo aqhubeke nezinqubomgomo zikaPhapha uFrancis.
UPhapha uFrancis manje useqoke cishe amaphesenti angama-57 amaKhadinali, isibalo sawo esesikhuphukile saya ku-128 ngokumenyezelwa kwalawa amasha.
Amanye amaKhadinali baqokwa oPhapha baphambilini uBenedict XVI noJohn Paul II. Imithetho yaleli bandla ibeka ngokuthi inani lamaKhadinali okufanele babe khona bayi-120 kodwa oPhapha abawulandelanga babeka abangaphezulu kwaleli nani.
AmaKhadinali amasha aqhamuka e-Italy, emazweni ase-Afrika afana neRwanda, e-United States of America (USA), ePhilippines, eChile naseBrunei.
Abane kulama Khadinali ngeke bavunyelwe ukungena esithangamini esizoqoka uPhapha omusha ngenxa yokuthi baneminyaka yobudala engaphezu kwengama-80.
Baqokelwe kulesi sikhundla ngenxa yokwethembeka nokuzinikela kwabo kuleli bandla.
AmaKhadinali amasha kubalwa kuwo uSobaba Omkhulu uSilvano Tomasi wase-Italy osebenze emhlabeni jikelele futhi ongomunye wochwepheshe baleli bandla abahamba phambili ezindabeni zokufuduka kwabantu.