Kulokhu sicheme obala noBobo
Sizomenza aphile lo mfanyana, sizomenza akhulume nathi ngale kwethuna
30 KUMFUMFU / 05 KULWEZI 2020
Sekukangaki uzwa abezindaba bethi kabachemile bekusho futhi kufanele ngoba akumele bacheme. Nokho namuhla njengephephandaba laboHlanga sisho futhi senza okwehlukile nesiziqhenyayo ngakho.
Namuhla sithatha uhlangothi odabeni olusenkantolo noluthinta umfundi waseNkosibomvu uBobo. Lo mfundi owaneminyaka yobudala eli-16 ngesikhathi edlula emhlabeni wathinta abantu abaningi, ephila noma engasekho.
Odabeni olushicilelwe namuhla ngaphansi kwesihloko esithi: Usizi lwaboHlanga: Bonke ubuhlungu buya enhliziyweni, siba yingxenye yalabo abezwa ubuhlungu ngokwenzeka kulo mfundi. Empeleni kasikhaleli yena nomndeni wakhe kuphela kepha njengoba nodaba luveza sikhalela umphakathi waseHambanathi.
Isihluku uBobo adlula ngaso emhlabeni kasiginyisi mathe. Umsindo lapho ebhongisa khona okwenkuzi yenkomo awusuki emqondweni kanjalo nesithombe lapho ebuthwa khona eseyizibhucu emfuleni sisho lukhulu ngonya lababulali bakhe.
Kulolu daba sicheme neqiniso. Sifuna kuvele ukuthi kwenzakalani nalabo abangabenzi bajeze. Yilokho kuphela okuyosenza sikholwe ukuthi ubulungiswa benzekile, okungale kwalokho ngeke sikwamukele.
Kubabulali ukukhipha umphefumulo kaBobo kwabe kuyisiphetho, nokho kithi akunjalo. Njengephephandaba sizomenza aphile lo mfanyana, sizomenza akhulume nathi ngale kwethuna. Sizomenza isigameko sakhe sibe yisifundo sobungozi bomphakathi osuphelelwe unembeza, abanye abathi buntu.
UBobo wabe eyingane yethu sonke, yebo wafika ngonina noyise kepha ubeyingane yethu ngakho okwenzeke kuye kusithinta sonke. Umphakathi wasoThongathi nabafundi baseNkosibomvu bangaqinisekiseka ngento eyodwa, ukuthi elaboHlanga lizoma nabo kuze kube sekupheleni kwalesi siwombe esibi nokungamele sibuye senzeke ngesethu isikhathi nangesikhathi sezizukulwane ezizayo.