Lizodlala eyokuhlunga iqembu uMvoti United
Sibongele abadlali baso ngokusebenza kusakhanya isikhulu soMvoti United, okuyiqembu eligijima ku-ABC Motsepe esifundazweni iKwaZulu-Natal.
UMvoti United uzomela isifundazwe emidlalweni yokuhlungela ukungena kuGladAfrica Championship ngesizini yangowezi-2020/2021.
Yize imidlalo ingaqedelwanga ngenxa yokhuvethe, uMvoti United ubuhlezi phezulu ngamaphuzu angama-60 emidlalweni engama-24. Inhlangano ephethe unobhutshuzwayo kuleli iSouth Africa Football Association (SAFA), ithathe isinqumo sokuthi amaqembu akuzona zonke izifundazwe eziyisi-9 ahlezi phezulu kube yiwo ayodlala imidlalo yokuhlunga kwasekuba yiwo uMvoti KwaZulu-Natal.
Bekusele imidlalo eyisi-6 ngaphambi kokuthi isongwe iligi. Nokho leli qembu belihlezi esicongweni ngesinqe esisodwa njengoba ubumpintshwe iSummerfield Dynamos ebinamaphuzu angama-57 endaweni yesibili, kulandele iKwaDabeka Sporting neHappy Wanderers abebebambene ngamaphuzu angama-53.
“Kuqinisiwe uma kuthiwa kumele usebenze kusakhanya ukuze kuthi uma kufika izikhathi ezinzima kube ukuthi uphephile. Lokhu kusisebenzele kakhulu, besikufuna ngempela ukuyodlala eyokuhlunga. Uma kubhekwe ilogi, asihlulwanga nakowodwa umdlalo. Ngibonga abadlali kanye nethimba labaqeqeshi ngokusebenza kanzima, kuze kube isifiso sethu siyafezeka,” kusho uBongani Msomi oyiMeneja yeqembu.
Leli qembu eliqeqeshwa uDoctor Mkhonza lizobhekisa ababombo eGoli kusasa ukuyozilungiselela le midlalo.
Le midlalo izoqala mhla ziyisi-9 kuLwezi ize isongwe zili-15 kuwona uLwezi. Izobanjelwa eVaal University of Technology.
Ebuzwa uMsomi ngamalungiselelo abo ukuthi ahamba kanjani uthe: “Abadlali bakulungele ukudlala, akekho olimele noma onezinkinga. Kulesi sikhathi bazimisele ukuba ngompetha. Njengoba singakahlulwa nje kuligi sifuna ukuqhubeka lapho.”
Akukhona okokuqala leli qembu lifika kulesi sigaba njengoba kwenzeka ngonyaka wezi-2018 kodwa langenza kahle kanti okubukeka kwathikameza abadlali ukudlula emhlabeni kowayengumqeqeshi uBheka Phakathi.
UMsomi uthe akafuni ukuthi abadlali beqembu lakhe bekhulume nabezindaba ngoba bazodidiseka emqondweni.
ElaboHlanga liphinde lakhuluma nesikhulu saleli qembu uBonginhlanhla Gwala.
“Ngibonga kakhulu kusukela ethimbeni labaqeqeshi kuya kubadlali ngokuzinikela kuze kube sifika lapho esikhona manje. Sibajabulisile abadlali ngokuthi babe sendaweni yokuqala kulogi kodwa ngibatshelile ukuthi ngizojabulisa kakhulu uma bengaqedela umsebenzi okuwukunqoba imidlalo yokuhlunga,” kusho uGwala.
Amaqembu ayisi-9 azodlala kweyokuhlunga iBizana Mpondo Chiefs yase-Eastern Cape, iMangaung United yaseFree State, iPretoria Callies yaseGauteng, iMikhado FC yaseLimpompo, iHungry Lions Northern Cape, iFC Mpumalanga United yaseMpumalanga, iPolokwane City Rovers yaseNorth West, iZizwe United yaseWestern Cape noMvoti United.
Kuzobe kubanjwe umoya ngoMvoti United neFC Mpumalanga United ukuthi banqobe njengoba bezoba senkingeni uma behluleka.
Inkinga abazobhekana nayo ukuthi uma behluleka ukunqoba, amaligi abo azoba namaqembu ali-19. Okwenza lokho ukuthi amaqembu akulezi zifundazwe adliwe izembe kuGladAfrica Championship iRoyal Eagles yaKwaZulu-Natal neMbombela United yaseMpumalanga.
UMvoti United abadlali edlala ngabo bazana bonke njengoba sebechithe isikhathi eside ndawonye bedlala kuleli qembu.
UMsomi uthe umdlali oseke wadlalala kuGladAfrica Championship isayiNational First Division (NFD), uSthembele Vukani Ngcamu owayedlalela iSantos FC.
Omunye uMpendulo Dlamini ongunozinti owavimbela iRoyal Eagles.