Ithemba kwezamankomane
Uzimisele ngokubuyisa izinsuku zenjabulo kubalandeli bezamankomane KwaZuluNatal osanda kuqokelwa kwesobuMeneja kuBoxing South Africa (BSA) kulesi sifundazwe.
Kukhale ihlombe kwavunguza umoya wethemba ngesikhathi kusula ibhodi labaqondisi bekhilikithi yakuleli kuqokwa elesikhashana.
Zizine kuLwezi uNgqongqoshe Wezemidlalo, uNathi Mthethwa, umemezele ibhodi labaqondisi abasha ngenhloso yokubuyisa isithunzi senhlangano engamele ikhilikithi eNingizimu Afrika.
Kuleli bhodi labaqondisi elizoholwa uMehluleli uZak Yacoob kukhona uMnu uHaroon Lorgat owayeyiSikhulu Esiphezulu enhlanganweni engamele ikhilikithi emhlabeni i-International Cricket Council (ICC), uMnu u-Omphile Ramela, uSolwazi u-Andre Odendaal, uMnu uStavros Nicolaou, uNks uJudith February, u-Andile Dawn Mbatha, uMnu uXolani Vonya kanye noNks uCaroline Mampuru.
UNgqongqoshe uMthethwa ukubeke kwacaca ukuthi leli bhodi elakhiwe abantu besilisa nabesifazane abavela emikhakheni eyahlukene kusukela kwezomthetho kuyakwezamabhizinisi, uma lisebenza ngokuzikhandla esikhathini isiyizinyanga ezintathu, lizokwazi ukuqhubeka nalo msebenzi.
Okuphinde kwajabulisa abalandeli ukumenyezelwa kohlu lwemidlalo yeqembu iProteas ezoqala ngasekupheleni kwephezulu lapho lizobhekana nompetha bomhlaba i-England, emdlalweni ezobanjelwa eCape Town.
NgoZibandlela iProteas izokwamukela iPakistan, kuthi ngasekuqaleni konyaka ibhekane neSri Lanka ngaphambi kokufika kwe-Australia.
UMqondisi weKhilikithi yakuleli, uGreame Smith, kumthokozisile lokhu njengoba ethi usezokwazi nokusebenza kahle akwazi ukuhlela imidlalo yabesifazane kwazise yamiswa ngaphansi kwebhodi elidala ngenkathi kufanele bahambele e-England.
Uphinde washayela ihlombe ukuqokwa kukaMnu uVictor Mpitsang kwesokukhetha iqembu iProteas.
Izidubedudube ezenze kuqokwe ibhodi elisha NgoLwezi nyakenye ukuthi owayengumphathi omkhulu weCricket South Africa (CSA) uMnu uThabang Moroe waphuca izimvume zokucoshela izindaba izintatheli, lokhu okwadala ukukhala kwabezindaba kanye nabathandi bekhilikithi, kwaphinde kwalandelwa ukushiya kweStandard Bank njengabaxhasi beCSA.
Bona babekhala ngokungafuni ukungcola kwegama labo emveni kwesenzo sikaMoroe.
ICSA yabe isithatha isinqumo sokumisa uMoroe yaqoka uMnu uJacques Faul esikhundleni sakhe njengebamba. UFaul ubambe isikhundla sokuba umphathi omkhulu izinyanga eziyisishagalolunye kusuka ngoZibandlela wezi-2019 kuya kuNcwaba wezi-2020.
UFaul noMnu uChris Nenzani owayenguMengameli weCSA bakhetha ukwesula ezikhundleni zabo ngenxa yokungenami ngendlela ibhodi eliphethe ngayo ikhilikithi yakuleli.
Kwabe sekuqokwa uNks uKungandrie Govender ukuthi abambe esikhundleni esishiywe uFaul.
NgoZibandlela wezi-2019 abanye babaxhasi bekhilikithi yakuleli iMomentum yanxusa izikhulu zeCSA ukuba lixoshwe lonke ibhodi labaqondisi bekhilikithi yakuleli ngenxa yokungaphathi ngendlela. Zili-14 kuMandulo wezi-2020 iMomentum yamemezela ukuthi ayisayivuseleli inkontileka yokuxhasa iCSA kepha izoqhubeka nokuxhasa iqembu labesifazane.
UCarel Bosman oyihloko yezoxhaso kwaMomentum wathi bakhathele ukungaphathwa kahle kwekhilikithi yakuleli yikho beze bakhetha ukuhlukanisa inhloko nesixhanti.
UMoroe owayemisiwe kodwa esathola umholo wakhe ophelele, wagcina ekhonjwe indlela ngoNcwaba wezi-2020 iCSA. Kulandela uphenyo (iFundudzi Report) olwamthola ephule umthetho iCompanies Act. Lokhu kufaka phakathi ukuphuca izintatheli izimvume zokucoshela izindaba, ukuphathwa kwezimali kanye nokugxambukela ezindabeni zeWestern Province Cricket Association.
Ukungakhishwa kwemiphumelo yocwaningo iFundudzi Report yiCSA kwadala ukuthi umhlangano jikelele wonyaka ungahlali kulo nyanka.
Lokhu kwenza inhlangano engamele ezemidlalo kuleli iSouth African Sports Confederation and Olympic Committee (SASCOC) inxuse ukuthi wonke amalungu ebhodi labaqondisi kuCSA ashiye ezikhudleni. Kwabakhona ukungezwani phakathi kwalezi zinhlangano okwenza lolu daba lugcine ludluliselwe kuNgqongqoshe uMthethwa naye owabhalela i-International Cricket Coucil (ICC) ukuyazisa ngezinhloso zakhe zokungenelela alungise isimo kuCSA.
Lokhu kwakuyoholela ekutheni amaqembu akuleli amiswe ekudlaleni namanye amazwe.
Emveni kwenkulumo kaMthethwa bonke ababeyingxenye yebhodi labaqondisi basula ezikhundleni. Kwaqala owayebambe esikaMongameli uMnu uBeresford Williams noMnu u-Angelo Carolissen balandelwa uMnu uJohn Mogodi, uMnu uDonovan May, uMnu uTebogo Siko noMnu uDheven Dharmalingam.