Amanyundululu kaKhongolose kuMasipala iNquthu
Izikhulu zikaMasipala iNquthu nabanye abaholi be-Inkatha Freedom Party (IFP) kule ndawo basola uqhekeko kuKhongolose abathi yilo olubambezele ukufakwa kukamlawuli ukuze kugwemeke izigigaba okuthiwa sezidale ukukhishwa kwabathile ezikhundleni kwaqashwa nabantu izikhala zingakhangiswanga.
Izinsolo ezivezwa yilaba abacele ukuba bangadalulwa zithi amakhansela e-ANC awahambisani nokwenzeka eNquthu kodwa ukukhala kwawo akunakwa.
Kuthiwa isizathu ukuthi uMphathiswa Wezokubusa Ngokubambisana Nezindaba ZoMdabu KwaZulu-Natal, uMhlonishwa uSipho Hlomuka, akezwani nobuholi be-ANC esifundeni iNkosi Bhambatha esiholwa uMnu uLucky Moloi njengoSihlalo noMnu uBheki Lembede onguNobhala.
Bathi inkinga uHlomuka ubona sengathi uma efaka umlawuli kuzobe kufana nokuthi unikeza amandla ubuholi baseNkosi Bhambatha ukuba bulawule iNquthu ekubeni yena engahambisani nabo.
Esinye isikhulu sithe isimo saseNquthu asisavumi ukuba kuphathe amakhansela ewodwa sekudingeka nesandla sesifundazwe noMnyango.
“Sisenkingeni lapha eNquthu. Kufike kwaxoshwa iMeneja kaMasipala nabaqondisi ababili kwabe sekufakwa abantu ngendlela engaqondakali.
I-ANC izamile ukuya eNkantolo yaseMgungundlovu iyovimba ukuba izikhulu ezintsha zingakwazi ukufinyelela emalini kaMasipala kuze kuba kulungiswa eyalezi ezixoshiwe. Inkinga ukuthi abakutholi ukwesekwa ngoba uMphathiswa uHlomuka akazwene nabo njengoba ehamba no…(emgagula ngegama) ongabhekani noMoloi. Sithwele ugodo olushunqa intuthu ngenxa yempi yalaba bantu. Efika lapha uHlomuka sasithi usezoyinikeza umlawuli iNquthu kodwa samangala kungasenzeki. Siyizisebenzi sigcina singalazi nekusasa lethu angikhulumi amanga ngoba kwenzekile saba nezimeneja ezimbili zikaMasipala kwagcina kungasaziwa ukuthi ubani ophethe. Besikade sisuka kolunye utalatiya lapho besineziMeya ezimbili,” kusho lesi sikhulu.
IKhansela le-IFP ngaphakathi lithe akusasebenzeki eNquthu ngoba izinto zimapeketwane.
“Okunzima kakhulu ukuthi i-ANC ixabene yodwa yingakho amakhansela akhona uma ecela uHlomuka ukuba angenelele kuvele kufane nokuthi ayadlala. Manje le nto yabo thina njengeNkatha isilimaze kakhulu ngoba besesithembe bona ukuthi uma behlaba ikhwelo kuzophela nokubukelwa phansi kwezinqumo esesizithathile njengoba sasivumelene singamakhansela eNkatha ukuba sizeseke enkantolo izikhulu ezintathu ebezixoshwa ezikhundleni. Besesikwazile ukudoba amakhansela e-ANC ukuba alwe asilekelele kulolu daba njengoba abesekuhoxisa ukufuna ukuba udaba lokubuyekezwa kwesinqumo sokususwa ezikhundleni kweMeneja nabaqondisi bakhe abaqashwe ngaphansi kweSigaba 56,” kusho leli khansela nalo elicele ukungadalulwa.
USotswebhu waMakhansela e-ANC eNquthu, uJoe Motloung, uthe kungamanga okushiwoyo ngoba udaba lusasingethwe i-ANC esifundazweni futhi bayaxhumana noMphathiswa ngempumelelo.
“Inkinga eNquthu ukuthi kunezinto eziningi ezibheke eceleni ezenzekayo nokuthi uma sikhala ngazo amakhansela e-IFP asibalela nokuthi siwenza aphathe uMkhandlu kabuhlungu basinikeza iCity of Johannesbug. Ukuvota kwe-IFP nathi eGoli kusilimaze kakhulu ngoba basihlukumeze ngayo bezama ukusivala imilomo baze babhalela ngisho ubuholi bethu KwaZulu-Natal. Yikho-ke lokhu okuphazamise nokuthi uHlomuka akwazi ukusheshe angenelele. Le nto ibisisixakile sagcina sesibatshela ukuthi isivumelwano asenziwanga ngeNquthu kodwa ngoMasipala Abaqulusi ngakho ayikho into abayishoyo. Bebefuna sithule kodwa inkohlakalo idla lubi,” kusho uMotloung.
Uqhube wathi kube nesikhathi lapho bekuvele kuqashwe abantu izikhala zingazange zikhangiswe.
Uveze nokuthi muva nje balwile bevimba ukuba kuphume amaloli nomshini wokulungisa umgwaqo ngoba besekuqashwe abashayeli abese kuthiwe bazoshayela kodwa kungazange kukhangiswe.
“Thina noHlomuka lapha eNquthu sixoxa kahle akahluphi ngingakukhombisa nobufakazi beWhatsapp ayithumele esho ukuthi udaba uphezu kwalo noNobhala uNtuli ubekhuluma nabo phakathi kwamabili ngodaba lwaseNquthu esho ukuthi bayalubhunga ezingeni lesifundazwe ,” kusho uMotloung.
Okhulumela uMnyango, uMnu uSenzelwe Mzila, uthe akulona iqiniso okushiwoyo ngoba uHlomuka akazithatheli isinqumo sokufaka umasipala kumlawuli.
Uthe kuye kuhlale iKhabhinethi bese ivumelana ukuthi umasipala othile ngenxa yezinkinga kumele ufakwe ngaphansi komlawuli.
“Kuthi uma isinqumo iKhabhinethi isisithathile bese uMphathiswa esidlulisela kulowo masipala othintekayo ngokugunyazwa izigaba zomthethetho. Ngakho kuyiphutha ukuthi eNquthu akakwenzi nje yingoba kukhona ipolitiki emvimbile,” kuchaza uMzila.