Balifuna liphumile inxusa laseFrance elisePakistan
Izinkulungwane zabalandeli beqembu “elinenkani” labenkolo yamaSulumane bashayane ngezifuba namaphoyisa emgwaqeni osenhlokodolobha yasePakistan ngesonto eledlule kulandela imibhikisho mayelana nokusetshenziswa kwamakhathuni oMphrofethi uMohammed eFrance muva nje, okulimale abantu abaningi.
Ababhikishi beqembu iTehriki-Labaik Pakistan (TLP) benze ukuhlambalaza kwabo iphuzu abakhala ngalo, lapho befuna uHulumeni ukuthi uqede ngobudlelwano bawo neFrance, uphinde uxoshe inxusa layo elikuleli lizwe. Amaphoyisa avimbe ababhikishi ngesikhathi bezama ukungena e-Islamabad. Abanye ababhikishi bebememeza bethi isijeziso esifanele ukuhlanjalazwa ukunqunywa ikhanda, kusho isikhulu samaphoyisa uTauqeer Shah. Kube sekuyilapho ababhikishi behlasele amaphoyisa ngezitini, amatshe kanye nezinduku.
“Iningi lamaphoyisa lilimele,” kusho uShan lapho eveze khona ukuthi cishe izinkulungwane ezi-2 000 zababhikishi zinqume ukuhlala emgwaqeni ongena kuleli dolobha zigoloza ukuya emakhaya.
“Sifuna uHulumeni uxoshe inxusa laseFrance ngokukhulu ukuphuthuma,” kusho uSekela Mengameli weqembu iTLP uZaheer-ul-Hasan kuvidiyo ayithumelile. Uphinde wakuveza ukuthi ziphezulu izibalo zababhikishi abalimale ngesikhathi kunokungezwani phakathi kwabo namaphoyisa.
Imibhikisho iqubuke cishe kuwona wonke amazwe anobuSulumane ngempendulo ekhishwe yiFrance ngemuva kokuhlaselwa okushiye uthisha eshonile ngenyanga edlule ngemuva kokukhombisa ikhathuni egcona uMphrofethi uMohammed kubafundi bakhe abenza izifundo zezomphakathi. Kwabenkolo yobuSulumane le midwebo yoMphrofethi iyahlambalaza.
Ekuhlaselweni ngommese, owesilisa eneminyaka yobudala eli-18 omvelaphi yakhe iseChechen yanquma uthisha uSam Paty ikhanda.
Izikhulu zaseFrance zathi ukushmbulwa kwekhanda lalo thisha kube wukuhlasela ngqo ilungelo eliyisisekelo laseFrance lenkululeko yokuzikhulumela.
Ngemuva kokuthi iphephabhuku iSatirical linqume ukuphinda lishicilele la makhathuni ngenyanga kaMandulo, uMengameli waseFrance u-Emmanuel Macron wathi inkululeko yokuhlambalaza yayihambisana ngqo nenkululeko yokukholwa eFrance.
Ezweni iPakistan kanye nakwamanye amazwe anezibalo eziphezulu zabenkolo yobuSulumane, izikhamuzi zakhona zigxeke uHulumeni waseFrance ngokuzonda inkolo yobuSulumane nokucasula ngamabomu abakholwa kule nkolo. IPakistan ikugxekile ukushicilelwa kabusha kwamakhathuni. Kunomlando wokuphendula ngodlame ezigamekweni zokuhlambalaza ePakistan, lapho ukuhlambalaza uMphrofethi Mohhamed kunesigwebo esisemthethwebu sentambo.
Kuzokhumbuleka ukuthi amalungu eqembu iTLP ngonyaka wezi-2017 avala umgwaqo ongena edolobheni i-Islamabad lapho ayefuna ukuthi ushintsho oluncane emthethweni wendawo lubhekwe njengokuhlambalaza. Ekugquzulaneni okwenzeka ngalowo nyaka kwashona ababhikishi abayisithupha kanye nephoyisa elilodwa kwathi abantu abayi-150 balamela. UHulumeni waseIslamabad uvale yonke imigwaqo emikhulu engena kuleli dolobha kanye nesiginali yomakhalekhukhwinui emizamweni yawo yokuvimba ukuthi ababhikishi baphinde bazihlanganise, kodwa lesi senzo silikhubazile leli dolobha.
“Sizama ngazo zonke izindlela ukuvula umgwaqo,” kusho iPhini likaKhomishana wale nhlokodolobha uHamza Shafaat ngesikhathi ebhala enkundleni yokuxhumana uTwitter. Kuthe ngokuhamba kosuku amasosha nawo azama ukuhlakaza ababhikishi kepha nawo agcine esephoqeleke ukuba ahlehle.