Abagilwe ukhuvethe

Abangasekho bangabavikeli babantu abazicabangelayo nabazinakekelayo

Kwabashaywe wubhubhane ukhuvethe kulo nyaka ayikho into engashiwo kwedlule kepha yisikhathi kuphela esingathunga lapho kudabuke khona, yisikhathi kuphela esiyothoba amanxeba.

Akusasele zinsuku zingaki siwugoqe unyaka. Ngalesi sikhathi abanye bazobe bebuyela emakhaya emzini yoyise.

Kwabanye kuyobe kuwukujabula kodwa ngoba abayobe bebona bayobe besuke kade bagcinana. Kuyohlatshwa izinkukhu, izimbuzi abanye bawise ngisho inkabi imbala. Kuzobe kuyintundabebhekene kubhiyozwa, zisina ziqhuza izintombi nezinsizwa kuduma amathafa. Abanye bazosebenzisa lesi sikhathi ukwenza imisebenzi ehlanganisa imindeni okuyimishado. Kanti ngazo lezi zikhathi kuvamile ukuthi abanye benze imisebenzi yokukhumbula abangasekho, abafa bengafi.

Bakhona nokho ngalesi sikhathi ababuyela endaweni ebakhumbuza okuningi okubuhlungu. Laba babuyela kwabo nje abasaphelele ngoba unyaka nesifo lesi esibatshazwa lapha phandle sesidle amanye amalungu omndeni. Kulabo bantu ayikho into ongayisho kwedlule kepha yisikhathi kuphela esingathunga lapho kudabuke khona. Kulaba yisikhathi kuphela esiyothoba amanxeba.

Konke lokhu okungenhla kujwayelekile kwenzeka cishe yonke iminyaka. Nokho kulo nyaka kukhona okukhona okungejwayelekile ngalesi sikhathi. Ukhuvethe lufike ngezinkani luchoboza abancane nabadala. Iqiniso lithi okwamanje kusewumqansa ukuphuma kulesi simo. Abanye ngalesi sikhathi basemgonqweni benxusa ukuthi kuvele izimpendulo. Angingabazi ukuthi nakanjani ziyovela kepha okwamanje kusekubi phandle. Yikho nginxusa ukuthi ngalesi sikhathi sokuhlaselwa kungabi nankolo, nasiko, naziqu eziyokwenza singabi namandla okuzithathela izinqumo ezizosindisa thina nemindeni yethu kanjalo nemiphakathi yethu.

Inkulumo lapha esiZulwini ithi idlozi liyabhekelwa. Lapha kusuke kuthiwa phezu kokuthi idlozi likumela kepha lokho akungakwemuki amandla akho omqondo okuthatha isinqumo esiyiso. Asenze njalo sonke ukuze nedlozi nalo lenze lokhu okumele likwenze.